Yesus ngecam ahli-ahli Taurat ngau urang-urang Farisi ¹ Yesus banai ngau bala murid, ngau urang mayuh ugak, jekuh Ya: ² "Ahli-ahli Taurat ngau urang Farisi udah nuduk bangku Musa. ³ Maka tunak ke semua nama te dajar sidak ngau kitak, tapi nang nunak nama te depulah sidak, empadai sidak ngajar na tapi ndai ngerja ke nama te dajar. ⁴ Sidak ngetang mak berat de bau urang, tapi sidak ndai neguk yak. ⁵ Semua te dekerja sidak ngau maksud isak depedak urang, sidak ngau tali semayang te luar, beramai panyai. ⁶ Sidak rajin duduk de tempat tehormat, palin depan de rumah semayang. ⁷ Sidak gaga dehormat urang depasar, gaga dekumai Rabi. ⁸ Tapi kitak, nang kitak dekumai Rabi, empadai cuma surang Rabi, kitak menyadik. ⁹ Nanglah kitak nelah apai ngau sapa-sapa, empadai cuma surang apai kitak, Ya te de surga. ¹⁰ Nang ugak kitak detelah pemimpin, empadai cuma surang pemimpin kitak, Mesias. ¹¹ Sapa te kak besai dentara kitak, kalah jadi pelayan. ¹² Sapa te ningik ke dirik, ya dempas kebabah, sapa te ngerenah ke dirik, ya detingik ke. ¹³ Celaka kitak ahli-ahli Taurat, urang Farisi, ngau urang munafik, kitak nutup lawang kerajaan surga demua urang. Empadai kitak ndai tamak, udek kitak ngerintang urang te berusaha kak tamak. ( ¹⁴ Celaka kitak ahli Taurat, urang Farisi, ngau urang munafik, kitak nelan langkau bala janda, kitak ngelabuk urang ngau doa te panyai-panyai. Kitak bakal dukum lebih berat.) ¹⁵ Celaka kitak ahli Taurat, urang Farisi, ngau urang munafik, kitak nengah laut ngau darat, untuk nubat ke sikuk mensia isak jadi penganut agama kitak, udah ya betubat, kitak nyadi ke ya urang neraka, dua kalik lipat pengejaik re kitak. ¹⁶ Celaka bala pemimpin butak te madah: Besumpah demi Bait Suci, sumpah yak ndai sah, tapi sumpah demi mas Bait Suci, sumpah yak ngikat. ¹⁷ u bala kitak urang budu ngau butak, ni te lebih penting, mas atau Bait Sucite ngudus ke mas yak? ¹⁸ Besumpah demi mezbah, sumpah yak ndai sah; tapi sumpah demi persembahan te datau yak, sumpah yak ngikat. ¹⁹ Ui kitak urang-urang butak, ni te lebih penting, persembahan atau mezbah te ngudus ke persembahan yak? ²⁰ Barang sapa te besumpah demi mezbah, ya besumpah demi mezbah ngau semua te datau yak. ²¹ Sapa te besumpah demi Bait Suci, ya besumpah demi Bait Suci ngau demi Ya te nugau diyak. ²² Sapa te besumpah demi surga, ya besumpah demi takhta Allah ngau demi Ya te besemayam datau yak. ²³ Celaka kitak ahli Taurat, urang Farisi, ngau urang munafik, pesepuluh ari selasih, adas manis, ngau jintan, kitak bayar, tapi te palin penting alam ukum Taurat kitak abai ke: keadilan, belas kasih ngau kesetiaan. Nunai ke te sutik, te bukai nang dabai ke. ²⁴ Ui kitak bala pemimpin butak, nyamuk kitak tepis ralam peminum kitak, tapi unta dalam yak kitak telan. ²⁵ Celaka kitak ahli Taurat, urang Farisi ngau urang munafik, cawan ngau pingan kitak basuk sepiak luar, sepiak te kedalam penuh ngau rampasan ngau perangkak. ²⁶ Ui urang Farisi te butak, bersih ke lau sepiak dalam cawan yak, maka sepiak luar pesti bersih ugak. ²⁷ Celaka kitak ahli Taurat, urang Farisi ngau urang munafik, kitak upa kubur te delaabur putih, sepiak kate ke luar tampak bersih, tapi kate ke dalam penuh tulang belulang ngau semua jenis kutur. ²⁸ Upa yak ugak kitak, sepiak luar tampak benar demata urang, tapi sepiak dalam penuh kemunafikan ngau kedurjanaan. ²⁹ Celaka kitak ahli Taurat, urang Farisi ngau urang munafik, empadai kitak mulah kubur bala nabi ngau ngemaik tugu bala urang taat ³⁰ lalu banai: Antik kami idup de zaman akik inik kita, tentu kami ndai tamai munuh bala nabi. ³¹ Berete kitak dah besaksi ke dirik kedirik kalau kitak yak kenturun pemunuh nabi. ³² Jadi, penuh ke sekalik takar inik akik kitak. ³³ Ui kitak kenturun ular beludak, tipa cara kitak nangkis ke ukum neraka? ³⁴ Maka, pedak em, Aku ngutus bala nabi, urang bijaksana, ahli Taurat ngau kitak: Setengah re sidak kak kitak bunuh ngau desalib ke, te bukai bakal kitak sesah de rumah ibadat, ngau deburu keteridak ari kuta ke kuta, ³⁵ isak kitak nangung darah urang ndai besalah mulai re Habel urang benar yak sampai ke Zakharia anak Berekhya te kitak bunuh dentara tempat kudus ngau mezbah. ³⁶ Aku madah kitak: Semua yak bakal detangung angkatan tuk!" ³⁷ Yerusalem, Yerusalem, kitak te munuh bala nabi, nikam urang te dutus ngau kitak ngau batu! Bekalik-kalik-kalik Aku gauk ngumpul ke anak-anak kitak, upa inuk manuk ngumpul anak ya debabah sayap tapi kitak ndai kak. ³⁸ Pedak rumah kitak tuk bakal dedudi, jadi sunyik selangut. ³⁹ Aku madah kitak: Mulai re pituk kitak ndai bakal medak Aku agik, sampai kitak madah: Deberkat Ya te datai alam nama Tuhan!"