Bala murid mutik genum pada ari Sabat ¹ Pada ari Sabat, rama Yesus bejalai de uma genum, bala murid Ya mutik igik genum ngau makai yak dekusuk ngau jari. ² Tapi bisik urang Farisi banai: "Nama kitak mulah utai te ndai desagi pada ari Sabat?" ³ Udek yesus nyaut sidak: "Ndai nama kitak maca nama te depulah Daud, rama ya ngau sidak te tamai ya lapar, ⁴ tipa ya tamak kalam Rumah Allah ngau ngamik ruti te dentang, udek demakai ya ngau deberik ya ngau sidak te tamai ya, padahal ruti yak cuma tau demakai bala imam?" ⁵ Jekuh Yesus agik ngau sidak: "Anak Mensia Tuhan atas ari Sabat." ⁶ Pada ari Sabat bukai, Yesus tamak ke rumah ibadat, udek ngajar. Diak bisik urang te temati jari sepiak kanan. ⁷ Ahli-ahli Taurat ngaau urang Farisi ngupuk ke Yesus, sapa ketau Ya nyemuh ke urang pada ari Sabat, isak sidak bulih alasan nyalah ke Ya. ⁸ Tapi Ya ngetau pemikir sidak, udek banai ngau urang te temati jari sepiak yak: "Angkat, bediri detengah!" Udek mensia yak bediri. ⁹ Udek Yesus banai ngau sidak: "Aku betanyak ngau kitak: Ni te tau depulah pada ari Sabat, mulah te baik atau mulah te jaik, nyelamat ke nyawa urang atau ngemenasa ke urang?" ¹⁰ Udah yak Ya merati de sekelingik sidak semua, udek banai ngau urang pedih yak: "Surung ke jari mih!" Urang yak nunak munyi te jekuh Ya ngau semuh jari ya. ¹¹ Nyak nyuruh meluap me peluat sidak, udek sidak bepekat, nama te kak depulah sidak teradap Yesus. ¹² Rama yak Yesus angkat ke bukit untuk bedoa ngau semalam malam Ya bedoa ngau Allah. ¹³ Rama tengah ari Ya ngumai murid-murid Ya ngau Ya, udek milih dentara sidak dua belas urang, te detelah rasul: ¹⁴ Simon te deberik nama Petrus, ngau Andreas menyadik ya, Yakobus sedua Yohanes, Filipus ngau Bartolomeus, ¹⁵ Matius ngau Tomas, Yakobus anak Alfeus, ngau Simon te detelah urang Zelot, ¹⁶ Yudas anak Yakobus, ngau Yudas Iskariot te page lusak nyadi penghianat. ¹⁷ Udek Ya turun tamai sidak ngau betegak de tempat te rata: Diak bekumpul mayuh urang re murid-murid Ya ngau mayuh urang bukai te datai re sekamat Yudea ngau ari Yerusalem ngau ari daerah pantai Tirus ngau Sidon. ¹⁸ Sidak datai untuk ninga ke Ya ngau untuk desemuh re pemedih sidak; ngau sidak te kesarung sitan tau semuh. ¹⁹ Ngau semua urang mayuh yak berusaha kak nyapai Ya, empadai bisik kuasa te keluar repada Ya ngau semua urang yak desemuh ke Ya. ²⁰ Udek Yesus medak murid-murid Ya ngau banai: "Bahagia , sapa te miskin, empadai ya me te ngempu Kerajaan Allah. ²¹ Bahagia, sapa te pitok lapar, empadai ya bakal depuas ke. Bahagia sapa te pitok nyabak, empadai ya bakal ketawak. ²² Bahagia kitak, antik empadai Anak Mensia urang ngemencik kitak, ngau antik sidak ngucil ke kitak, ngau mencela kitak ngau ndai nerimak kitak sebagai utai te jaik. ²³ Bersukacita rama yak ngau gaga am, empadai sebenar, upah kitak besai de surga; empadai piak ugak inik akik sidak dah mulah bala nabi. ²⁴ Tapi celaka urang kaya, empadai alam kekaya kitak dah bulih pengiburan. ²⁵ Celaka urang te pitok kenyang, empadai kitak bakal lapar. Celaka te pitok ketawak, empadai kitak bakal nyabak. ²⁶ Celaka kitak, antik semua urang muji kitak, empadai piak ugak akik inik sidak dah mulah nabi-nabi pelsu." ²⁷ "Tapi ngau kitak te ninga ke Aku, Aku mdah: "Kasih ke munsuh kitak, mulah te baik ngau sidak te ngemencik kitak; ²⁸ mintak ke berekat bagi sidak te ngutuk kitak; bedoa bagi sidak te ngelai kitak. ²⁹ Barangsapa te nampak kuyuk sepiak kitak, berik ke ugak kuyuk sepiak agik, ngau barangsapa te ngamik jubah kitak, berik ke ugak baju kitak. ³⁰ Berik ke ngau urang te mintak ngau kitak, ngau nang ngamik agik nama te dah damik sidak re kitak. ³¹ Ngau upa ni kitak kak depulah urang, pulah ke piak ugak ngau sidak. ³² Antik kitak ngasih urang te ngasih kitak, nama jasa kitak? Empadai urang-urang bedosa sik ngasih urang-urang te ngasih sidak. ³³ Empadai antik kitak baik ngau urang te baik ngau kitak, nama jasa kitak? Urang-urang berdosa sik piak ugak. ³⁴ Ngau antik kitak minyau ke ngau urang empadai kitak ngarap bulih utai re sidak, nama jasa kitak? Urang-urang berdosa sik me minyak ke ngau pangan isak bulih sepemayuh. ³⁵ Tapi kitak, kasih ke munsuh kitak, ngau bepepulah baik ngau sidak, ngau pinyau ke utai ndai sah ngarap balas, maka upah kitak besai, ngau kitak bakal jadi anak-anak Allah te Palin Tingik, empadai Ya awas bagi urang-urang te ndai numut beterimak kasih ngau urang-urang jaik. ³⁶ Kitak kalah murah ati, upa Apai kitak murah ati." ³⁷ "Nang kitak menghakimi, maka kitak pun ndai dehakimi. Ngau nang kitak ngukum, maka kitak pun ndai d'ukum; ngampun ngau kitak bakal d'ampun. ³⁸ Merik ngau kitak bakal deberik: Sutik takaran te baik, te depadat, te degunsar, ngau te tetumpah keluar, bakal decurah ke ngau kitak. Empadai ukuran te kitak ngau untuk ngukur, bakal d'ukur ke ngau kitak." ³⁹ Yesus madah ugak sutik perempamaan ngau sidak: "Tau nama urang butak nuntun urang butak? Ndai mek sidak sama-sama jatuk kalam lubang? ⁴⁰ Surang murid ndai lebih repada guru ya, tapi barangsapa dah tamat pelajaran ya, bakal sama ngau guru ya. ⁴¹ Nama kitak medak repas alam mata urang, sedang ke baluk alam mata dirik ndai kitak ketau? ⁴² Tipa kitak tau banai ngau pangan: "Menyadik, ilak ku ngulih repas alam mata mih, padahal baluk te alam mata kitak ndai kitak pedak? Ui urang munafik, keluar ke lau baluk ari mata kitak, maka kitak tau medak ngau jelas untuk ngeluar ke repas re mata pangan." ⁴³ "Empadai ndai sik pun te baik ngasil ke buah te ndai baik, ngau ndai sik ugak pun te ndai baik ngasil ke buah te baik. ⁴⁴ Empadai setiap pun dekelala re buah ya. Empadai re jumpuk durik urang ndai mutik buah ara, ngau ari durik2 urang ndai mutik buah anggur. ⁴⁵ Urang te baik ngeluar ke baik re alam ati ya te baik ngau urang te jaik ngeluar ke te jaik ari alam ati ya te jaik. Empadai te d'ucap re mulut meluap re ati." ⁴⁶ "Nama kitak nyeru ngau Aku: Tuhan, Tuhan, padahal kitak ndai ngereja nama te Ku padah? ⁴⁷ Setiap urang te datai ngau Aku ngau ninga anai Ku sereta ngereja yak - Aku bakal madah ngau kitak, ngau sapa ya tau desama ke -, ⁴⁸ ya sama ngau urang te niri ke rumah: Urang yak ngali dalam-dalam ngau ngeletak ke dasar atau batu. Rama datai aik bah ngau pasang ngenak rumah yak, rumah yak ndai mampu de guyah empadai rumah yak kukuh. ⁴⁹ Tapi sapa te ninga anaiKu, tapi ndai dekereja, ya sama ngau urang te niri ke rumah atau tanah ndai ngau dasar. Rama aik pasang, rumah yak rubuh sekelin, ngau sampal abis."