Peruba (permulaan) ¹ Teofilus te mulia, mayuh urang dah berusaha nyunsun berita tentang bala utai te tejadi de'entara kita, ² upa te udah depadah ngau kita ulih sidak, te mulai re peruba yak saaksi mata ngau pelayan firman. ³ Nyak nyuruh seudah aku nyelidik semua peristiwa yak ngau bebenar mulai re peruba, aku ngamik keputus untuk mukak yak secara teratur ngau mih, ⁴ isak mih tau ketau, semua utai te d'ajar ngau mih yak benar. ⁵ Rama jaman Herodes, raja Yudea, bisik sikuk imam benama Zakaria re rum'ung Abia. Bini ya berasal re kenturun Harun, nama ya Elisabet. ⁶ Sedua yak urang benar de mua Allah, ngau idup menurut segala perintah ngau ketetapan Tuhan ndai becacat. ⁷ Tapi sedua ndai sik anak, empadai Elisabet matai ngau sedua udah tuai. ⁸ Bisik sekalik rama giliran rumung sidak, Zakharia nunai tugas keimanan dadap Tuhan. ⁹ Empadai rama deun'i, upa selama, untuk nentu ke imam te betugas, ya me te detunyuk tamak k'alam Bait Suci ngau nunu ukupan diak. ¹⁰ Sementara yak seluruh umat bekumpul de luar ngau semayang. Rama yak penunu ukupan. ¹¹ Maka tampak ngau Zakharia sikuk malaikat Tuhan bediri desepiak kanan mezbah penunu ukupan. ¹² Medak yak, ya ketejut ngau takut. ¹³ Tapi malaikat yak banai ngau ya: "Nang takut Zakharia, doa mih dekabul, ngau Elisabet bini mih beranak bakas, ngau mih kalah merik ya nama Yohanes. ¹⁴ Mih ngau mayuh urang gaga ngau pengadai nemiak yak. ¹⁵ Empadai ya bakal besai dadap Tuhan, ngau ya ndai ngirup anggur ngau ngirup ke bisa, ya penuh ngau Roh Kudus mulai re deperut inai ya; ¹⁶ ya bakal nyuruh mayuh urang Israel bebalik ngau Tuhan, Allah sidak, ¹⁷ ngau ya bakal bejalai ngenulau Tuhan alam roh ngau kuasa Elia, untuk mulah ati bala apai bebalik ngau anak, ngau ati urang neraka bebalik ngau pemikir urang-urang benar, ngau upa yak me nyiap ke bagi Tuhan umat te pantas bagi Ya." ¹⁸ Udek jekuh Zakharia ngau malaikat yak: "Tipa aku ketau, antik hal tuk bakal tejadi? Empadai kami dua udah sama tuai." ¹⁹ Saut malaikat yak ngau ya: "Aku me Gabriel te ngelayan Allah ngau aku dah d'utus untuk banai ngau mih, ngau madah ke berita baik tuk ngau mih." ²⁰ Mih bakal jadi bisuk, ndai tau banai, sampai ari semua yak tejadi, empadai mih ndai pecayak ngau anai ku te nyata ngau kebenar rama yak senta." ²¹ Sementara yak, bala urang nunguk Zakharia. Sidak iran nama nganok ya lamak bebenar alam Bait Suci. ²² Rama ya keluar ya ndai tau banai ngau sidak, udek nyaruk me sidak, pasti ya bisik pemedak de Bait Suci. Udek ya merik isarat ngau sidak, empadai ya bisuk. ²³ Rama temuk jangka waktu tugas jabatan ya, ya pulai ke langkau. ²⁴ ndai lamak udah yak Elisabet bini ya nganung, selamak limak bulan ya ndai sik mansut ke dirik, jekuh ya: ²⁵ "Tuk me pempulah Tuhan ngau aku, ngau pituk Ya bekenan ngapus aib aku demua urang." ²⁶ Alam bulan ke enam Allah nyuruh malaikat Gabriel angkat ke kota de Galilea benama Nazaret, ²⁷ ngau sikuk dara te betunang ngau Yusuf re keluarga Daud; nama inuk yak Maria. ²⁸ Rama malaikat yak tamak ke langkau Maria, ya banai: "Salam, dik te dekaruniai, Tuhan nyereta dik." ²⁹ Maria tekejut ninga anai yak, udek betanyak alam ati nama rete salam yak. ³⁰ Jekuh malaikat yak ngau ya: "Nang takut Maria, empadai dik bulih kasih karunia dadap Allah. ³¹ Dik bakal nganung ngau beranak bakas, ngau dik kalah benama Ya Yesus. ³² Ya bakal jadi besai ngau detelah Anak Allah Te Palin Tingik. Ngau Tuhan bakal ngarunia ke ngau Ya tahta Daud, apai leluhur Ya, ³³ ngau Ya bakal jadi raja atas kaum kenturun Yakub sampai page lusak, ngau kerajaan Ya ndai sik kebadok." ³⁴ Jekuh Maria ngau malaikat yak: "Tipa tau piak, aku pan belaki?" ³⁵ Saut malaikaat yak ngau ya: "Roh Kudus turun k'atau dik, ngau kuasa Allah Te Palin Tingik menaungi dik, nyak nyuruh Anak de delahir ke dik detelah kudus Anak Allah. ³⁶ Ngau Elisabet menyadik dik, ya sik me nganung anak bakal de penuai ya, ngau tuk mek bulan ke enam bagi ya, te depadah matai yak. ³⁷ Empadai bagi Allah ndai sik te ndai tau." ³⁸ Jekuh Maria: "Aku tuk hamba Tuhan; tejadi upa yak me upa te jekuh nuan." Udek malaikat yak nudi ke ya. ³⁹ Ndai lamak udah yak, Maria lansung angkat ke bukit nuju kuta de Yehuda. ⁴⁰ Diak ya tamak ke langkau Zakharia, merik salam ngau Elisabet. ⁴¹ Rama Elisabet ninga salam Maria, enkanyuk anak alam perut ya, ngau Elisabet penuh Roh Kudus, ⁴² udek banai ngau ingan kayah: "Deberkat dik dentara semua inuk, ngau deberkati buah rahim dik. ⁴³ Sapa aku tuk sampai inai Tuhan ku datai beranau ngau aku?" ⁴⁴ Empadai rama salam dik datai ke pening aku, anak deperut ku enkanyuk gaga. ⁴⁵ Ngau gaga me ya te udah pecayak, empadai nama te depadah ngau ya re Tuhan, bakal telaksana." ⁴⁶ Udek jekuh Maria: "Jiwa ku memulia ke Tuhan, ⁴⁷ ngau ati ku gaga empadai Allah Juruselamatku, ⁴⁸ empadai Ya dah merati ke aku, hambay Ya te ndai bereti (kerendahan). Mulaia re pituk, semua kenturun madah ku bahagia, ⁴⁹ empadai te Palin Bekuasa dah ngereja pempulah-pempulah besai ngau ku, ngau nama Ya kudus. ⁵⁰ Ngau rahmat Ya turun temurun ngau urang te takut ngau Ya. ⁵¹ Ya madah ke kuasa Ya ngau pempulah jari Ya, ngau berarak urang te cungkak ati; ⁵² Ya nurun ke urang-urang te bekuasa re tahta sidak, ngau ningik ke urang te ndai bereti (rendah); ⁵³ Ya merik ke semua utai te baik ngau urang te lapar, ngau nyuruh urang kaya angkat ngau jari puang; ⁵⁴ Ya nulung Israel, hamba Ya, empadai Ya ngingat rahmat Ya, ⁵⁵ upa te dejan'yi ke Ya ngau akik inik kita, ngau Abraham ngau kenturun ya sampai page lusak." ⁵⁶ Ngau Maria nugau diak kekira tiga bulan pelamak tamai Elisabet, udek baruk mek pulai ke langkau dirik. ⁵⁷ Udek genap bulan Elisabet ngau beranak, ya ngelahir ke anak bakas. ⁵⁸ Rama bala tetangga ngau menyanak ya ninga, Tuhan dah nunyuk ke rahmat te besai ngau ya, sidak gaga ugak tamai ya. ⁵⁹ Maka sidak datai kiak ari ke lapan, kak nyunat nemiak yak, ngau sidak kak merik ya nama Zakharia nunak nama apai ya, ⁶⁰ tapi inai ya madah: "Nang, ya kalah deberik nama Yohanes." ⁶¹ Jekuh sidak ngau ya: "Ndai sik dentara menyanak kitak te benama miak." ⁶² Udek sidak merik isarat ngau apai nemiak yak, kak nanyak, nama ni te kak deberik ngau anak ya. ⁶³ Ya mintak batu tulis, udek nulis ke kata tuk: "Nama ya Yohanes." Udek sidak iran semua. ⁶⁴ Ngau sekelin yak ugak mulut ya tebukak, ngau dilah ya telecut, udek ya banai ngau muji Allah. ⁶⁵ Nyak nyuruh sidak te diak takut bebenar, ngau semua hal yak jadi buah anai de sekamat bukit Yudea. ⁶⁶ Ngau semua urang, te ninga, ngerenung ke yak ngau banai: "Jadi nama nemiak tuk page lusak?" Empadai jari Tuhan nyereta ya. ⁶⁷ Ngau Zakharia, apai ya, penuh Roh Kudus, udek benubuat, jekuh ya: ⁶⁸ "Tepuji Tuhan, Allah Israel, empadai Ya nyaga umat Ya ngau ngemaik kelepasan bagi ya, ⁶⁹ Ya numuh ke tan'uk keselamatan bagi kita kenturun Daud, hamba Ya yak, ⁷⁰ - upa te udah defirman ke Ya re subak meliak ulih ngelalu mulut nabi-nabi Ya te kudus - ⁷¹ untuk ngelepas ke kita re munsuh-munsuh kita, ngau ari jari semua urang te ngemencik kita, ⁷² untuk nun'yuk ke rahmat Ya ngau akik inik kita ngau ngingat ke jan'yi Ya te kudus, ⁷³ yak mek sumpah te d'ucap ke Ya ngau Abraham, apai leluhur kita, antik Ya ngarunia ke kita, ⁷⁴ isak kita telepas re jari munsuh, tau semayang ngau Ya ndai sik takut, ⁷⁵ alam kekudusan ngau kebenaran dadap Ya s'umur idup kita. ⁷⁶ Ngau mih anak ku, detelah nabi Allah Te Palin Tingik; empadai mih bakal bejalai ngenulau Tuhan untuk nyiap ke jalai bagi Ya, ⁷⁷ untuk merik ngau umaat Ya paham keselamatan te bedasar ke pengampunan dosa sidak, ⁷⁸ ulih rahmat ngau belas kasih re Allah kita, dini Ya te nyaga kita, mata panas lam kenyung re tempat te tingik, ⁷⁹ untuk mancak sidak te nugau ara te keleman ngau alam naungan maut untuk ngarah ke kaki kita ke jalai damai sejahtera." ⁸⁰ Nemiak yak betamah besai, ngau makin kuat alam roh ya. Ya nugau de padang pasir sampai pada ari ya mansut ke dirik ngau urang Israel.