¹ Pade mule nye adelah Firman; Firman etok besame-same dengan Allah dan Firman etok adelah Allah. ² Iye pade mule nye besame-same dengan Allah. ³ Segale suatu di jadi oleh die dan tanpe ide ade sutu yang lah jadi da’i segale yangp lah jadi. ⁴ Dolom die ade idop dan idop etok adelah te’ang manusie. ⁵ Te’ang etok becahaye ka dolom gelap etok ide menguase nye. ⁶ Dotang la seu’ang yang di utos Allah, name iye Yohanes; ⁷ Iye dotang macam sak’si untok mem’bei sak’si da’i masala te’ang etok, supaye oleh die semue u’ang jadi pejaye. ⁸ Iye bukon te’ang etok,tapi iye aros be’i sak’si masalah te’ang etok ⁹ Te’ang yang sesungguoh iye, yang mene’ang tiap u’ang, sedeng dotang ke dolom dunie. ¹⁰ Iye lah ade ka dolom dunie dan dunie di jadi oleh-iye,tapi dunie ide kenal -iye. ¹¹ Iye dotang pade mike yang punye,tapi u’ang-u’ang yang punye iye etok ide terime nye. ¹² Tapi semue u’ang yang terime-iye kuase supaye jadi budak-budak Allah,yaitu mike pecaye dolom name-iye; ¹³ U’ang-u’ang yang di lah kan bukon da’i dageng,bukon pule secare nyawe oleh kehen’dek seu’ang jantan,laen kan da’i Allah. ¹⁴ Firman etok elah jadi manusie,dan iyem ka antare kite,dan kite elah tengok mulia-iye,yaitu kemuliaan yang di be’i kan pade iye sebagei budak tue pak, penoh kaseh karunie dan betol-betol. ¹⁵ Yohanes be’i saksi pasal die dan bese’u ,kate iye; “ikin lah die,yang aku maksod ketike aku bekate; kenian da’i pade aku aken dotang die yang lah bedulo aku,sebob die lah ade sebelom aku” ¹⁶ Ka'ena da’i penoh-iye kite semue lah nerime kuase karunia demi kaseh karunie; ¹⁷ sebob hukom taurat di be’i kan oleh Musa,tapi kaseh karunie dan betol-betol dotang oleh Yesus Kristus. ¹⁸ Ide seu’ang pon yang perna nampak Allah; tapi budak tunggal Allah yang ade ka pangko pak, die la yang nunjokkan. ¹⁹ Dan ikin la sak’si Yohanes ketike u’ang Yahudi da’i Yerusalem mengutos berape imam dan u’ang-u’ang lewi kepade iye untok betanye die:” siape kah ikau?” ²⁰ Iye ngaku dan ide beduste, kate iye :”aku bukon Mesias.” ²¹ Lalu mike betanye pade iye;”kalau gitu,siape ikau? Elia?“ dan iye jawab: ”ukan!” ikau kah nabi yang aken dotang?”dan iye jawab:”bukon!” ²² Make kate mike pade iye: siape kah ikau? sebob kamek haros membe’i jawab pade mike yang ngutos kamek. Ape kah kate ikau masala di’i ikau se’uang?” ²³ Jowob iye:”Aku la sua’e u’ang yang bese’u-se’u ka lapang pase: Luros kan jolon Tuhan! Macam yang lah di capkap nabi Yesaya.” ²⁴ Dan ka antar’e u’ang-u’ang yang di utos etok ade berape u’ang Farisi. ²⁵ Mike tanye pade iye,kate iye:” mengape ikau bukon Mesias, bukon Elia. Dan bukon nabi yang aken dotang?” ²⁶ Yohanes jawab mike,kate iye: ”aku babtis dengan a’e; tapi ka tengah-tengah ikau bedi’i die ikau kenal, ²⁷ Yaitu die, yang dotang kenian da’i paade aku.membuke tali kasot iye pon aku ide pantas.” ²⁸ Pasal etok jadi ka Betania yang ka sebe’ang sungai Yordan, ka mane Yohanes membaptis. ²⁹ Pade esok ha’i nye Yohanes nengok Yesus dotang pade iye dan iye dan bekate:”nengok la budak dombe Allah.yang hapos dose dunie. ³⁰ Iye la yang aku maksod ketike aku bekate: kenian da’i pade aku dotang seu’ang, yang lah bedolo aku ,sebob die lah ade sebelom aku. ³¹ Dan seu’ang pon mule-mule ide kenal die,tapi untok etok la aku dotang dan membaptis dengon a’i, supaye iye di nyate kan kepade israel.” ³² Dan Yohanes membe’i sak’si, kate iye:” aku lah tengok roh teroda’i langit macam merpati.dan iye tinggel ka atas iye. ³³ Dan aku pon ide kenal-iye, tapi die yang ngutos aku untok membaptis dengon a’ie,lah ber Firman pade aku: Jikelau ikau tengok roh etok tu’un ka atas seu’ang dan tinggel ka atas iye, die la e’tok yang aken membatis dengon roh kudos. ³⁴ Dan aku la tengok iye dan membe’i sak’si:iye ikin la budak Allah. ³⁵ Pade esok ha’i iye Yohanes bedi’i ka situ pule dengon due u’ang budak buoh iye. ³⁶ Dan ketike iye tengok Yesus liwat, iye bekate:”tengok la budak dombe Allah!” ³⁷ Kedue budak buoh e’tok mendenga ape yang di cakap iye etok,lalu mike pegi ngekot Yesus. ³⁸ Tapi Yesus nengok ke blokong.iye tengok, bohwo mike ngekot die lalu bekate pade mike:” Ape kah yang ikau ca’i?” kate mike pade-nye:” gu’u,kat manekah ikau tinggel?” ³⁹ Iye bekate pade mike:” yoklah dan ikau akan menenggok iye.” mike pon dotang dan tenggok kat mane iye tinggel, dan a’ri etok mike tinggel besame-same dengon iye: watu etok kire-kire pukol empat. ⁴⁰ Salah seu’ang da’i kedue nye yang mendenge pecakapan Yohanes lalu ngekot Yesus adelah Andreas saudae Simon petrus. ⁴¹ Andreas mule-mule bejumpe dengon Simon,saudae iye,bekate padenye:”kamek lah jumpe Mesias.” ⁴² 42Iye membawe nye pade Yesus,Yesus mandang iye dan bekate “ikau Simon,budak Yohanes,ikau akan dinamekan kefas.” ⁴³ Pade esok kan a’rinye Yesus putoskan untok pegi ke Galilea. Iye jumpe dengon Filipus,dan bekate padenye:”ekotlah Aku!” ⁴⁴ Filipus etok berasal da’i Betsaida, kute Andreas dan petrus. ⁴⁵ Filipus jumpe dengon Natanael dan bekate padenye:”kameklah jumpe iye,yang di sebot oleh Musa dolom kitab taurat dan ole nabi,yaitu Yesus budak yusuf do’i Nazaret.” ⁴⁶ Kate Natanael padenye:” mungkenkah suatu yang baek dotang da’i Nazaret?” ⁴⁷ Kate Filipus padenye:” yoklah dan nenggok lah!”Yesus nenggok Natanael dotang padenye.”lalu bekate psal iye.”tengok,ikin lah seu’ang israel sejati, ide ade kepalsuan kat dolomnye!” ⁴⁸ Kate Natanael padenye:”macam mane ikau kenal aku!”jawab Yesus padenye:”sebelom Filipus panggel ikau,akulah tenggokl ikau kat bawah po’on ara.” ⁴⁹ Kate Natanael pade nye :”gu’u,ikau budak Allah,ikau raje u’ang israel. ⁵⁰ Yesus jawab katenye”karerene aku bekate pade ikau: aku tenggok ikau kat bawah po’on ara,maka ikau pecaye?ikau akan tenggok hal-hal yang lebeh besa da’i pade etok.” ⁵¹ Lalu kate Yesus pade nye:”Aku bekate pade ikau,sesunggoh nye ikau akan tenggok langet tebuke dan melekat-melekat Allah tu’un naek pade budak manusie.”