¹ Tagal te, ketun dia tau buhau hindai, oh kalunen, eweh bewei je manyalan uluh beken, awi katika ketun manyalan ewen, ketun kea mahukum arep muh kabuat; awi, ketun je manyalan te kea malalus kare gawi je sama. ² Itah katawan amun hukuman Hatalla impamuhun te bujur akan kakare uluh je malalus kare gawi je kilau te. ³ Tagal te, en ketun manyangka tau liwus bara hukuman Hatalla, oh kalunen, ie te ketun je manyalan ewen je malalus kare gawi kilau te, tuntang kea malalus gawi je sama? ⁴ Atawa, en ketun maanggap enteng atei Hatalla je pamasi tuntang kasabar Ayu je paham hai te, tuntang kahalap atei Ayu tuntang dia ingatawan, awi kahalap Hatalla uka tau mampahayak ketun hubah? ⁵ Tapi tagal kakaras tabiat takuluk muh tuntang atei muh je dia handak hubah, ketun akan mingkes hukuman melai bereng muh kabuat sampai andau kiamat metuh penghakiman je tutu bara Hatalla imparahan. ⁶ Ie handak mambaleh kakare uluh tumun gawin ewen kagenep biti: ⁷ ie te pambelum je katatahi akan ewen je baketep huang gawi bahalap manggau asi tuntang je ihormat, ⁸ awi kalait tuntang kasingi akan ewen je mamikir arep kabuat tuntang dia manumun kahalap, tapi manumun je dia bahalap. ⁹ Kareh tege kapehe tuntang kajake akan kakare uluh je rajin manguan gawin kakapa, sulak akan uluh Yahudi kea akan uluh Yunani. ¹⁰ Kareh kahalap tuntang hormat kea kahanjak tege akan kakare uluh je malalus gawi bahalap, sulak akan uluh Yahudi limbas akan uluh Yunani. ¹¹ Awi, Hatalla dia mintih olun. ¹² Akan genep uluh je malalus dosa dia ngasene Hukum Taurat, ewen kareh akan ihukum jatun Hukum Taurat. Tapi kakare uluh je malalus dosa mamenda Hukum Taurat akan diadili manumun Hukum Taurat. ¹³ Awi, dia sakadar mahining Hukum Taurat uluh ingilak tandipah Hatalla, malengkan uluh je manumun taluh je akan insanan bujur. ¹⁴ Awi, katika bangsa beken Yahudi je dia mangatawan Hukum Taurat malalus manumun kahandak kabuat inuntut awi Hukum Taurat, kareh ewen, je dia manumun Hukum Taurat, kareh Hukum Taurat akan ewen kabuat. ¹⁵ Awi te insanan, ie te gawin Hukum Taurat je inyurat huang atei ewen, bereng ewen manenga pangingat, tuntang pikiran ewen kareh tau hakasalan tuntang imbujur ewen. ¹⁶ huang andau katika Hatalla palus mahakim kare pikiran kalunen ije basilim mahalau Yesus Kristus sama kilau auhku. (Uluh Yahudi tuntang Hukum Taurat) ¹⁷ Tagal te, amun ketun manyewut arep muh uluh Yahudi tuntang bahapang huang Hukum Taurat, tuntang hanjak intu Hatalla, ¹⁸ ngasene kahandak Ayu, manumun taluh je bahalap, jadi iajar tahiu Hukum Taurat, ¹⁹ tuntang percaya awi bereng muh kareh mamimpin uluh babute, kalawa akan ewen je melai huang kakaput, ²⁰ pengajar akan kakare uluh je humung, guru akan kakare uluh je hindai bakas, tuntang jadi mandinu kare macam pangatawan tuntang katutu je melai Hukum Taurat, ²¹ uh ketun je majar uluh beken, mbuhen ketun dia majar arep muh kabuat? Ketun je majar ewen uka dia manakau, padahal ketun kabuat manakau? ²² Ketun je ngahana uluh habandung, padahal ketun kabuat habandung? Ketun je basingi tandipah kare hampatung dewa, tapi ketun kabuat manduan kare sarahan bara pasah taluh? ²³ Ketun je hanjak taharep Hukum Taurat padahal mampahawen Hatalla awi dia manumun parentah Ayu! ²⁴ Sama kilau tege tarasurat:"Aran Hatalla imapa huang marak uluh beken awi ketun." ²⁵ Sunat puna tege guna amun ketun manumun Hukum Taurat, tapi amun ketun kabuat malanggar Hukum Taurat, maka sunat te sama kilau dia inyunat. ²⁶ Tagal te, amun je dia basunat manumun kakare auh parentah huang Hukum Taurat, mbuhen je dia basunat te ihitung kilau basunat? ²⁷ Kea, mbuhen uluh je dia inyunat manumun gawin kalunen, amun ie manumun Hukum Taurat, tau mahakim ketun, uluh je ngatawan Hukum Taurat kea inyunat, ketun kea malanggar hukum. ²⁸ Awi, je inyewut Yahudi asli dia awi uluh je gitan bara luar bewei, tuntang sunat je tutu-tutu dia sakadar bereng bewei. ²⁹ Ije Yahudi asli ie te uluh je bereng tutu-tutu Yahudi, tuntang sunat je tutu iete sunat je ilalus awi atei, je impahayak awi Roh, dia awi hukum je tarasurat. Tara tandipah uluh kilau tuh dia dumah bara kalunen, tapi bara Hatalla kabuat.