¹ Tabe teka Yakobus, pelayan Alatalla Tuhan Yesus Kristus, ma kaduawalas suku isa bangat hante hang anteru dunia. Ujian Iman kaiyuh katabahen ² Kuan pulaknaiku, angableh nyalah isa kaaraian mun hanyu lawu ma wuang sansara . ³ Daya, hanyu karasa katuluh ujian ma hanyu ru kaiyuh kasabaren. ⁴ Maraeh katabahen ngami iyuhan isa penu himpan hanyu jari paruna nelang ganab, puang uweng kakurangen inun-inun. ⁵ Walehanni, amun hang lehelang here naan naun isa kakurangen kaharapen, ware hanye ilaku ma Alatalla, andri ran'nah atei tau ngami ma katuluh ulun sa puang hamnpe mada, nelang iru sagar na ami ma hanye. ⁶ Kude, hanye ilaku mahanye humpan ba iman nelang puang raragu daya ulun isa raragu hanyene yalah galumbang laut, tapi riwut mayaru mayati. ⁷ Ulun yalah iru ada natanguh sagar narime isa maeh teka Tuhan. ⁸ ulun isa mandrueh atei puang sagar ranai atei hang wuang pamelumni. Katatauwen Isa Kapinu'u ni ⁹ Mara eh naun welum sadang araihewu tawuk hanye naami pamelum tamam, ¹⁰ Balalu ulun tatau tawuk hanye naami kapersayaan rahat kaadaan lagi hang ime yalah wunge rikut, hanye sagar lawu. ¹¹ Daya, Mateandrau hulet laingni magin mehet, balalu ngampi layu rikut, wungeni pada lawu, balalu kaehni pada jari wawai. Kalahie pada, ulun tatau sagar wawai hang penah-penah usahani. Cobaan Puang Hawi Teka Alatalla ¹² Naberkat ma ulun isa tu'u tabah hang narime subaan udi katuluhni tahan uji, hanye sagar narime mahkota pamelum isa haut najannyi ma ulun sa nakalelu daya Ni. ¹³ Amun erang kaulun napansuba, ada hampe hanye kaeau, "Aku rahat napansuba daya Alatalla." Daya, Alatalla puang iuh napansuba daya ulun jahat nelang hanye erai puang napansuba daya hie-hie leh. ¹⁴ Kude, tatiap ulun isa napansuba tawuk hanye nasasia nelang najannyi daya aheng ni raerai. ¹⁵ Tawuk angeng ni haut jari, hanye sagar kaiyuh dusa tawuk dusa haut jari, hanye sagar kaiyuh pampatei. ¹⁶ Pulaksanai-pulaksanai isa nakalelu, ada naun tawang. ¹⁷ Tatiap pangamian isa maeh baya tatiap pangamian isa paruna hawini teka amau, na ampinau teka Am'mah hang piraai, hang wuang Hanye puang uweng baubah atawa tapahurup andri kunuan ai. ¹⁸ Daya kabahumen Ni raerai, Hanye nyanyari takam makai firman* pikaeh himpan takam jari wua sa palanungkai teka katuluh isa nasanyari daya Ni.Nyandrengei baya Nampalus Firman Alatalla ¹⁹ Pulaksanai sa nakaleluku, pansiningleh sa ina: maehni tatiap ulun hinang umak nyandrengei, kude unte umak bapaner, nelang unte tau sangit, ²⁰ Daya, ulun hinang iraraat puang ngaraja kapinu'u Alatalla. ²¹ Daya iru, umpe katuluh kunuan isa puang barasis baya heneni kajahaten, nelang tarimeleh makai kalemean katulusan firman Alatalla isa haut jari tatu'u hang wuang pamelumnu, isa tau nyalamat amiruenu. ²² Jari ulun isa ngaraja firman nelang puang ekat nyandrengei ai ; Amun puang, hanyu ipusu ma tenga nu raerai. ²³ Daya, amun ulun haut karengei firman, kude puang ngarajani, hanye nyalah ulun isa rahat mansining uruwawani hang dahapan saramin. ²⁴ Dami udi mansining dirini raerai balalu mahulu, hanye palus puang kaitung lagi kewangun uruwawani huni. ²⁵ Amun, naan ulun isa naniki hukum isa paruna, hanyene hukum isa mambebaskan, nelang tugul hang wuangni, hanye puang jari pandrengei isa pakaitung, kude jari pangaraja firman. Ibadah Isa Kapinu'u hang dahapan Alatalla ²⁶ Amun naan erang kaulun ngakira hanye erang kaulun isa taat baibadah, kude hanye puang ta'u ngakali lela ni, hanye sameh ipusu ma dirini. kataatan ni ru sasia. ²⁷ Ibadah isa maeh nelang puang mahalaen hang dahapan Alatalla balalu Am'mah takam nyuwuk kuan ia anule pihatu baya kuan wawei walu hang wuang kakekean here, balalu malihara diri tengani humpan ada natangkurun daya dunia.