¹ Ari Raya Paskah ge' Ari Raya Roti Kati Baragih ao' utukng dua ano agi', imam-imam kapala ge' ahli-ahli Taurat agi' najo cara ya' naap Yesus nige' tipu muslihat ge' ngamis-A. ² Sabab, ayoa' nyansana, "Iya' jangkah ari raya sapaya ti' ani kaributan ka antara rakyat." Yesus Gatnngangkabinyak nige' Narwastu ³ Samantara Yesus ani ka Betania, ka ramin Simon si Kusta, jangkah agi' unyung ka meja paruman, utukngta nyungan mahu nige' nyabuah butol inek umpatn batu' pualam biatn binyak narwastu da murni ge' mahal. Ini' mucuh butol dakoh ge' nuntoknga' ka tumukng aba' Yesus. ⁴ Tapi, ani bamani sok da nyansana samu ka adup a' nige' kesal, "Jailah mamburos binyak wangi ulah diah? ⁵ Sabab, binyak dakoh kaatn gatnnyual 300 dinar labih ge' kaatn magia' wa' sok papa." Ge', ayoa pun baji ka mahu dakoh. ⁶ Namun, Yesus nyansana, "Mambiar kini'. Jailah imu' nyusah ini'? Ini' nga umas parbuatan da bait ya'-Iko'. ⁷ Sabab, sok papa ao' salalu ani samahu ayo kupm, ge' ngina pun imu' ituh, mu' kaatn umas parbuatan da bait ya' ayoa'. Tapi, imu' kati salalu samahu' nige' Iko'. ⁸ Mahu diah ngalaka umas jai da ini' bisa. Ini' ngangkabinyak ungan-Ko labih uru ya' panyibur. ⁹ Iko' muji' kimu' da sabanara', kadume Injil gatnngabar ka smaan-man dunia, jai da nga laka gatn mahu diah umas ao gatnmuji' sebage panyanuut wa' ini'." Rancana Yudas ya' Barhkianat ¹⁰ Lakadakoh, Yudas Iskariot, salah satu umpatn kadua balas murid, anu wa' imam-imam kapala ya' nyarah Yesus ka ayoa'. ¹¹ Jangkah ayoa' dangaha', ayoa' auhatn ate ge' bajanji mangkatn Yudas uang. Karna dakoh, Yudas najo kasampatan da bait ya' nyarah-A. Paruman Paskah ¹² Wa' ano pamule Ari Raya Roti Kati' Baragih, jangkah ayoa' ngorban anak domba Paskah, ayo murid Yesus mansikatn wa'-Ini', "Kadumelah Akupm ngatte ngadu kai anu nyadia ya'-Dimu' paruman Paskah?" ¹³ Lalu, Ini' ngadu dua ungan murid-A wa' ayoa', }Anumih ka kota, ge' nyungan are da agi' minsakng kandi da biatn paitn ao' amputmu'. Nganangta kini', ¹⁴ ge' kadume saja ini' maruh, muji'lah wa' daumpu' ramin, 'Guru nyansana: Kadumelah uhakng tampatIko' kaatn uman Paskah samahu ayo murid-Ko?' ¹⁵ Lalu, ini' ao' nyua' wa'imu' nyabuah uhakng ahyo ka lante samo da nga cukup alat ge' siap sadia. Nyiaptalah Paruman ya' ite' ka teetn." ¹⁶ Lakadakoh, ayo murid anu ge' sampe ka kota. Ka teetn, ayoa' amput tapat ulah da Yesus muji' ka ayoa', lalu ayoa' nyiap Paskah. ¹⁷ Jangkah ano ngarum, uukngta Yesus samahu ka dua balas murid. ¹⁸ Ge', waktu ayoa' agi' unyung ge' uman, Yesus nyansana, "Iko' muji' da sabanara' kimu', ani nyungan umpat antara imu', da agi' uman samahu nige' Iko', ao' mangkhiati-Ko." ¹⁹ Ayoa' mule gatn umas sedih ge' nyungan-nyungan muji' wa' Ini', "Pasti inya iko', kan?" ²⁰ Yesus muji' wa' ayoa', "Ini' anilah salah satu umpatn dua balas murid, sok da nyihup roti samahu Iko' ka sadatn mangkok. ²¹ Sabab, Anak Talino ao' anu, ulah da ngan laka tartulis tentang Ini', tatapi celakata sok da karna a' Anak Talino gatnhianati! Malah labih bait bagi sok dakoh sa' ini ti' suah gatnbaranak." Paringatan ao' Ungan ge' Daya' Kristus ²² Jangkah ayoa' agi' uman, Yesus naap roti, ge' ngalaka mamberkat a', Ini' mata'-mata a' ge' mangkatna' wa' ayoa', gae nyansana, "Naapmih, diah ungan-Ko." ²³ Ge', Ini' naap cawan, ge' ngucap syukur. Ini' mangkatna' wa' ayoa', ge' ayoa' smaan nyucur umpatn cawan dakoh. ²⁴ Lalu, Yesus nyansana ka ayoa', "Diahta daya'-Ko', daya' parjanjian, da gaatn nuntokng ya' sok da karah. ²⁵ Iko' muji' kimu' da sabanara, Iko' ti' ao' nyucur agi asel buah umpatn puutn anggur, sampe wa' ano jangkah Iko' ao' nyucur anggur da bahu wa' Karajaan Jabata." ²⁶ Ngalaka ngado nyabuah lagu rohani, ayoa pun anu ka Bukit Zaitun. Murid-Murid Yesus ao' Ngagatn-Ini' ²⁷ Lakadakoh, Yesus nyansana wa' ayoa', "Imu' smaan ao' ngagatn Iko', karna ani tartulis, 'Iko' ao' nyarang gambala, ge' domba-domba dakoh ao' tarcare-bare.' ²⁸ Tapi, ngalaka Iko' gatnngabangkit, Iko' ao' anu ka Galilea nyantulu' imu'." ²⁹ Namun, Petrus nyansana wa'-Ini', "Sakalipun ayoa' smaan ngagatn-mu', tatapi iko' kati'." ³⁰ Ge', Yesus nyansana wa'ini', "Iko' muji' da sabanara' kimu', ngarum diah, katinga siap ngankuak dua kali, imu' ao' nyangkal Iko' taru kali." ³¹ Tapi, Petrus bakaras naham, "Sakalipun iko' arus kabis samahu Akupm, iko' ti' ao' nyangkal Akupm!" Ge', ayoa smaan muji' samu dakoh uga'. Yesus ka Taman Getsemani ³² Lakadakoh, utukngta ayoa' ka nyabuah tampat da bagaatn Getsemani, ge' Ini' nyansana wa' ayo murid-A, "Unyungta ka diah samantara Iko' badoa." ³³ Ge', Ini' minsakng Petrus, ge' Yakobus, ge' Yohanes samahu-A, ge' mule ngajadi aru buut ge' tartakan. ³⁴ Lalu, waatn-A ka ayoa', "Jiwa-Ko aru tao sedih, ulah ngatte kabis. Madi'ta kadiah ge' bajaga-jagamih." ³⁵ Maka, ngalaka nyingah adup-A, Ini' basujud ka tumukng tana ge' badoa, sa' mungkin, no dakoh balalu umpatn Ini'. ³⁶ Ge', Ini' nyansana, "Sama', sagala tarutn mungkin bagi-Imu'. Naaplah cawan diah umpay-Iko. Namun, inya jai da Iko' ngatte, malainkan jai da Akupm ngatte." ³⁷ Lakadakoh, Ini' utukng agi' ge' amput ayo murid-A agi' buus, ge' Ini' nyansana wa Petrus, "Simon. jailah imu' buus? Ti' aba' a' imu' bajaga-jaga salama nyajam? ³⁸ Bajaga-jagamih ge' badoa sapaya imu' ti' jantu ka sadatn pancubaan. Roh memang panurut, tatapi dagin lamah." ³⁹ Ge' agi', Ini' anu ge' badoa nige muji' sarat da samu'. ⁴⁰ ge' agi, Ini' utukng ge' amput ayoa' agi buus karna matu' ayoa' bahat kuat, ge' ayoa' ti' pane arus naham langkina wa'-Ini. ⁴¹ Ngalaka dakoh, Yesus utukng ya' kataru kalia' ge' nyansana wa' ayoa', "Imu' masih buus ge' baristirahat? Cukup, anoa' nga utukng. Mile', Anak Talino gatnnyarah ka barekng ayo sok baduse. ⁴² Umpatmih, kai ite' anu. Mile', da nyarah Iko' nga mangkin jiket." Yesus gatnnaap ⁴³ Segra ngalaka dakoh, samantara Yesus maseh nyansana, Yudas, da nyungan umpatn kadua balas murid, utukng samahu sok karah nige' padang ge' pamantokng, gatn ayo imam kapala, ayo ahli Taurat ge' ama-ama bangsa Yahudi ngutus. ⁴⁴ Ini' da nyaraha' nga mangkatn ayoa' nyabuah tande, waatna', "Sok da ao' ko' nyium Ini'talah Oranga'. Nangkap Kini' ge' minsakng Ini' anu ka sadatn pangawasan." ⁴⁵ Ge', jangkah Yudas sampe, ini' segra ngajiket Yesus ge' nyansana, "Rabi!" Llalu, nyium Yesus. ⁴⁶ Lakadakoh, ayoa' minte Yesus ge' nangkap-A. ⁴⁷ Namun, salah satu umpatn ayoa' da agutn, nubut padanga' ge' nyarang palayan Imam Ahyo, lalu nyantak rajak a'. ⁴⁸ Ge', Yesus nyansana wa' ayoa', "Anita imu' utukng nige' padang ge' pamantokng ya' nangkap Iko' ulah nyungan parampok? ⁴⁹ Bilakng kano, Iko' samahu nige'mu' ka Bait Jabata gae mangajar, tatapi imu' ti nangkap Iko'. Namun, hal diah tajadi sapaya Kitab Suci kaatn gatnganapi." ⁵⁰ Lakadakoh, smaan ayoa' ngagatn-A ge' talama' boho. ⁵¹ Ani nyungan bujakng nganang Yesus, hanya ngiak saput lenan wa' ungana'. Ge', ayoa' nangkap a', ⁵² tatapi ini' ngagatn saput lenan dakoh ge' talama' adupa' nige' ugakng. Pamimpin Yahudi Manghakimi Yesus ⁵³ Lakadakoh, ayoa' minsakng Yesus wa' Imam Ahyo. Ge', smaan imam kapala, ge' ama-ama, ge' ayo ahli Taurat bakumpur samahu. ⁵⁴ Ge', Petrus nganang Yesus umpatn jauh, sampe ka kalangan ramin Imam Ahyo. Ka teetn, ini' unyung samahu ayo pangawal gae ngadadakng adup ka tungko. ⁵⁵ Ayo' Imam Kapala ge' smaan Mahkamah Agama trus najo kasaksian ya' malawan Yesus sapaya ayoa' kaatn ngamis-A, tatapi ayoa' ti' amput jai-jai. ⁵⁶ Sabab, karah sok mangkatn kasaksial palsu ya' malawan-A, tatapi kasaksian ayoa' ti' sasue nyungan ge' da laitna'. ⁵⁷ Lakadakoh, nyamani sok da agutn ge' mangkatn kasaksian palsu ya' malawan Yesus, waatna', ⁵⁸ "Kai dangah Ini' nyansana, 'Iko' ao' ngaruruh Bait Jabata da barekng talino umas, ge' sadatn taru ano, Iko' ao' mantagutn da laitna', da ti' gatn barekng umas." ⁵⁹ Namun, ya' hal diah pun kasaksian ayoa' ti' sasue nyungan ge' da laitna'. ⁶⁰ Lalu, Imam Ahyo agutn ka tuda'-tuda' ayoa' ge' mansikatn wa' Yesus, "Ania Akupm kati' tuh naham ayo sok da basaksi malawan-Mu'?" ⁶¹ Tapi, Ini' tatap tunguh ge' ti' naham. Imam Ahyo mansikatn agi' wa' Yesus ge' nyansana, "Ania Akupm Mesias, Anak Jabata da Tarpuji?" ⁶² Ge;, Yesus muji', "Iko'talah Ini', ge' imu' ao' mile'vAnak Talino unyung ka suutn sentao' Da Mahakuasa ge' utukng samahu nige' rahu'-rahu' ka rangit." ⁶³ Lalu, gae ngarara' jubaha', Imam Ahyo nyansana, "Jailah ite' maseh palalu saksi agi'? ⁶⁴ Imu' ngalaka dangah hujatan. Jai kaputusanmu?" Ge', ayoa' smaan manghukum-A nige' hukuman kabis. ⁶⁵ Nyamani sok mule ngaruja' Ini', ge' nutup muka-A, ge' ninggu-A, ge' nyansana wa'ini', "Barnubuatmih!" Ayo pangawal nyamut-A nige' nampar-A. Petrus Kati' Ngako Yesus ⁶⁶ Ge', samantara Petrus maseh ani ka saroh kalangan ramin Imam Ahyo, nyungan umpatn palayan mahu Imam Ahyo utukng. ⁶⁷ Ge', mile' Petrus agi' ngadadakng adupa', palayan dakoh nyantununga'ge' nyansana, "Imu' uga' samahu Yesus, Sok Nazaret dakoh." ⁶⁸ Namun, Petrus nyangkal gae nyansana,"Iko' ti'pane ge' kati' ngarati jai da imu' nyana." Lalu, ini' anu ka pintu garbang, ge' siap abakng ngangkua'. ⁶⁹ Palayan mahu dakoh mile' Petrus nyakali agi' ge' mule nyansana agi wa ayo sok da agutn, "Sok diah anilah salah satu umpatn ayoa'." ⁷⁰ Tapi, Ini' nyangkala' agi'. Ge', ti tuhi' lakadakoh, ayo sok agutn nyansana agi' wa' Petrus, "Imu' pasti salah satu umpatn ayoa' karna imu' uga' sok Galilea." ⁷¹ Namun, Ini' mule mangutul ge' basumpah, "Iko' ti' kanal Sok da Imu' muji' dakoh! ⁷² Segra, siap abakng ngangkua' ya' kadua kalia ge' Petrus sanuut ao' jai da nga Yesus muji' kini', "Katinga siap abakng ngangkua' dua kali, imu' ao' nyangkal Iko' taru kali," Lalu, Petrus kati' kaatn nahan unse a'.