¹ Diahta pamule Injil tentang Yesus Kristus, Anak Jabata. ² Ulah ani gatnnulis sadatn kitab nabi Yesaya: "Mile'mih, Iko' ngadu utusan-Ko nyantulu Akupm, Ini' ao' nyadia pagala' ya' di-Mu; ³ ani saratn sok da ngampak-ngampak ka taya udu': nyadiamih gala' ya' Tuhan, ngatamutmih gala' ya' Dini', ⁴ Jadi Yohanes ngabaptis ayo sok ka taya udu' ge' bakotbah tentang baptisan ya' ngampun duse. ⁵ Ge', smaan panduduk Yudea ge' smaan sok Yerusalem utukng wa' Yohanes. Ini' mambaptis ayoa' ka sungi Yordan, gae ayoa' ngako' duse-dusea'. ⁶ Yohanes ngiak abok unta ge' pantingo' apakng kurit ka kalilikng apakng a'. Ini' uman buntak ge' madu utan. ⁷ Yohanes bakotbah ge nyansana, "Ngalaka iko' ao' utukng Nyungan da labih bakuasa daripada iko'. Iko' kati layak ngabungkok ge' ngarapas tari sandal-A ⁸ Iko' mambaptis imu' nige' paitn, tatapi Ini' ao' mambaptis imu' nige' Roh Kudus. Yohanes Mambaptis Yesus ⁹ Ge', tajadilah ka ano-ano dakoh, Yesus utukng umpatn Nazaret, rappo Galilea, ge' gatnbaptis ya' Yohanes ka sungi Yordan. ¹⁰ Segra ngalaka mungkas umpatn paitn, Yesus mile' rangit tabatah ge' Roh ulah manuk acang disah ka tumukng-A. ¹¹ Ge', ani saratn utukng umpatn surga, "Imu' anilah Anak da Ko'nyayang. Wa'-Imu Iko' barkenan." Yesus Gatn Balis Cubai ¹² Segra ngalaka dakoh, Roh minsakng Yesus ka taya' udu'. ¹³ Ini' madi' ka taya'udu' salama apat puluh ano ge' gatn Balis cubai. Yesus madi' ka antara binatang-binatang liar ge' ayo malaikat malayan Ini'. Yesus Ngabar Injil Jabata ka Galilea ¹⁴ Ngalaka Yohanes gatnmanjara, Yesus anu ka rappo Galilea ge' ngabar Injil Jabata. ¹⁵ Ini' nyansana, "Ganapta waktu a', Karajaan Jabata nga jiket. Batobatmih ge' pacayamih wa' Injil!" Yesus milih Nyamani Murid ¹⁶ Jangkah Yesus agi' ngarinsi' tapi timu' Galilea, Ini' mile' Simon ge' Andreas agea', agi' ngampar jala ka timu' karna ayoa' anilah panjala ikatn. ¹⁷ Lalu, Yesus nyansana wa' ayoa', "Nganangmih Iko', ge' Iko' ao ngajadi imu' panjala talino." ¹⁸ Simon ge' Andreas segra ngagatn jala ayoa' ge' nganang-A. ¹⁹ Jangkah Ini' anu labih jauh agi', Ini' mile' Yakobus, anak Zebedeus, ge' Yohanes, agea', da madi' ka parahu ge' agi umas jala. ²⁰ Lakadakoh, Yesus segra maba' ayoa' ge' ayoa' ngagatn apa a', Zebedeus, ka parahu samahu nige' ayo pakaraje bayarana', lalu anu nganang Yesus. Yesus Mangajar nige' Panhu Kuasa ²¹ Lalu, ayoa' sampe ka Kapernaum ge' segra wa' ano Sabat, Yesus maruh ka sinagoge. Tampat sambayang sok Yahudi ge' mangajar. ²² Ayoa' heran dangah ajaran-A, karna Ini' mangajar ulah nyungan da ani umpu' kuasa, kati' ulah ayo ahli Taurat. ²³ Wa' ano dakoh, ka sinagoge ani nyungan are da karasukan roh jahat ge' ini' ngampak, ²⁴ waatna', "Jai urusan antara Akupm nige' kai, Yesus umpatn Nazare? Ania Akupm utukng ya' ngamis kai? Iko' pane asi Akupm. Akupm anilah Da Kudus umpatn Jabata!" ²⁵ Namun, Yesus ngarato' ini', waatn-A, "Madi! Mungkas umpatn sok diah!" ²⁶ Ngalaka roh najis dakoh nguncang-nguncang ini' gae ngampak nige' saratn da nyarekng, mungkasta roh dakoh umpatn ini'. ²⁷ Ayoa' smaan heran singge mansikatn nyungan ge' da laitna', waatna',"Jailah diah? Nyabuah ajaran bahu nige' kuasa! Ini' malahan mamarintah roh-roh najis dakoh ge' ayoa' taat wa'-Ini'." ²⁸ Lalu, nige' capat kabar mangani Ini' manyabar ka dume-dume sampe ka smaan rappo Galilea. Ama Martua Simon ge' Sok Karah Gatnngangkauhatn ²⁹ Segra ngalaka Yesus ge' ayo murid-A ngagatn sinagoge, ayoa' maruh ka ramin Simon ge' Andreas, samahu Yakobus ge' Yohanes. ³⁰ Namun, Ama martua Simon agi' gurikng karna sanguh, maka ayoa' segra muji' kaadaana' ka Yesus. ³¹ Yesus pun anu kini' ge' minte barekng a' gae nulonga' agutn. Jangkah dakoh uga' sanguh a' tigi' ge' mahu dakoh mule malayan ayoa'. ³² Jangkah ngarum utukng, ngalaka matuano maruh, ayoa' minsakng wa Yesus smaan sok da anapm ge' da karasukan roh jahat. ³³ Lakadakoh, smaan panduduk kota bakumpur ka tura' pintu ramin dakoh. ³⁴ Yesus ngangkauhatn karah sok anapm nige' bamacam pangkanapm ge' uga' nguser sitan. Tapi, Ini' mingat sitan-sitan dakoh nyansana, karna ayoa' kanal Kini'. Yesus Badoa ge' Ngabar Firman ³⁵ Baru buka asat, jangkah ano maseh patakng, Yesus umpatn ge' anu ka tampat da sunyi', lalu Ini' badoa ka teetn. ³⁶ Lakadakoh, Simon ge' ayo sok da samahua' najo Yesus. ³⁷ Jangkah ayoa' amput Yesus, ayoa' nyansana, "Smaan sok najo Akupm!" ³⁸ Ge', Yesus nyansana, "Kai te' anu ka kota-kota da jiket sapaya Iko' uga' bisa bakotbah wa' ayo sok ka teetn. Sabab, diahta alasan Iko' utukng." ³⁹ Karna dakoh, Yesus anu ngaranto smaan rappo Galilea. Ini' ngabar firman ka sinagoge-sinagoge ayoa' ge' nguser sitan-sitan. Sok Kusta Gatnngangkauhatn ⁴⁰ Lalu, ani nyungan da anapm kusta utukng wa' Yesus. Ini' bamuhon ge' nyambah Kini' ge' nyansana, "Sa' Akupm ituh, Akupm kaatn ngangkauhatn iko'." ⁴¹ Tagarak kat pamase', Yesus nyulo' barekng-A ge' nyangkam sok dakoh gae nyansana, "Iko' ituh, auhatnmih!" ⁴² Jangkah dakoh uga' anapm kusta a' auhatn ge' sok dakoh jadi barasih. ⁴³ Yesus segra ngadu sok dakoh boho ge' mamparingat a' nige' tagas. ⁴⁴ Ini' nyansana kini', "Iya' muji' jai-jai wa' asi pun tentang hal diah. Namun, anumih, ngadu ayo imam mile' adupmu', ge' parsambahlah korban karna mu'nga auhatn ulah da Musa ngadu ya' jadi kasaksian wa' ayoa'." ⁴⁵ Tapi, sok dakoh anu ge' mule ngabar terus tarang ge' nyabar kabar dakoh sampe luas. Karna dakohta, Yesus kati' kaatn agi' maruh ka kota, tatapi madi' ka sato, ka rappo da sunyi'. Namun, ayo sok umpatn sagala tampat tatap utukng Kini'.