¹ Due olo eso olo paskah nelang perayaan Rote sa beragi kawan imam kelapa ali kawan ahli taurat desung ngeto alan ye ngedakep Yesus ali menteng - menteng, dian munu da. ² Et ya taka nampelor iro kede te perayaan" ulek dali," et nede timbul perawekan. ³ Kede Yesus naan te Betania, te belai Simon ye one ye bepenyakit kadan, erai keulun bawe demasu da, da ngoit minyak buen ewo ye larang te suang erai bemuli ke pualam, olou iro na ene ke wakat kayu kede Yesus desung tuet man, bawe iro nepikak bemuli iro pelos demuru olau buen ewo iro tong utek Yesus. ⁴ Sasenu keulun ye naan te iro belalu bereket nelang ngulek ali sesameh dali, sedii ye olan buen ewo iro na ene menaya.? ⁵ Olau iro tau na jual ali uman lewi ketolu jatus duit perak, nelang duit ye na okoi tong ulun susah.! belalu dali bereket ali bawe iro. ⁶ Et Yesus ngulek, dion ye da.! kone me kam mada da.! da nampelos ye buen nelang ye na hormat tong ab. ⁷ Ulun susah seleur naan te botuk kam, tiap kede ga kam kakan, kam tau ngawat dali et ab sa ke se ola - ola ye naan sendro ali kam. ⁸ Bawe ihe apu nampelos se ye ahan da nempelos da apu natap nyedia ab ali olau buen ewo nget tong olo ab na lebeng be one ke kawan olo ye. ⁹ Percaya. te kawus geliling denia, te kame kabar buen ke Allah na ulek, pengkoe bawe ihe sagar na kesah ade dian pakai ngingat da. ¹⁰ Belalu da Yudas Iskariot, erai ke ulun kekedue belas ulun murid Yesus tulak demasu kawan imam kepala nge ga ngehianat Yesus tong dali. ¹¹ Dali sanang bene keringa tawaran iro, pelos bejanji sagar ngokoi duit tong da Yudas, belalu da Yudas mulai ngeto kesempatan dian ngehianat Yesus. ¹² Te olo nyentela Perayaan rote sa beragi - kede ulun nyemalis bebiri Paskah - kawan murid Yesus nyituk tong da," te kame ko kakan kain nyadia pengokan Paskah tong ko.! ¹³ Belalu Yesus nyiu due keulun kedali alan tong jaa, te biduh naan erai keulun upo desung ngoit erai kandi tong suang danum, sagar sengkeruku ali kam, dasu da. ¹⁴ Tong belai ye na masuk da pelos ulek tong puun belai iro, Guru nyituk, te kame runa da sendro kawan murid da sagar man pengokan Paskah. ¹⁵ Ulun iro sagar nyituk tong kam erai ruangan solai te moo Ruangan iro apu na sedia, sukup ali kawan perabotan ye, sadia kekawus ye te biduh tong taka." ¹⁶ Belalu kedue murid Yesus iro tulak tong jaa. te biduh dali sengkeruku kawus ye bene nget ye na ulek ene Yesus. belalu dali ade nyedia pengokan Paskah. ¹⁷ Malem iro Yesus sulet sendro kedue belas murid da. ¹⁸ Desung dali tuet man, Yesus ngulek, dinga erai ke ulun ke kam ye ihe man sendro ab sagar ngehianat ab. ¹⁹ Keringa iro, kawan murid Yesus belalu nare ate bene belalu senu unuk dali beganti nyituk tong Yesus, Betentu sa ab ye na ulek ene ko.? ²⁰ Yesus ngulek da erai ulun ke kam due belas ihe sa man erai lumbah ali ab ²¹ Ye anak meresia sagar mate nget ye na surah te suang surat berasih, et leha selaka ye ulun ye ngehianat anak meresia iro.! lewi buen tong ulun iro aka da budas ya na belolos.! ²² Kede dali desung man Yesus ngepe rote pelos bedoa ngulek terima kasih tong Allah. Uli iro da motek ne pikak rote iro makai kami da, belalu ngokoi tong kawan murid da nelang ngulek, epe okan, ihe unuk ab. ²³ Uli iro da ngepe erai sangker anggur da bedoa ngulek terima kasih tong Allah, belalu ngokoi sangker iro tong kawan murid da uli iro dali kawus isep anggur iro. ²⁴ Uli iro Yesus ngulek ihe daya ab ye daya janji Allah, daya ye na duru tong ulun deo. ²⁵ Percaya : ab sa sagar isep anggur ihe eso, empe te wayah ab isep anggur ye kado sendro kam te denia kado na ma ab. ²⁶ Uli iro dali menyanyi erai nyanyian dian ngehormat, belalu uli iro dali tulak tong Bukit Zaitun. Kawan murid Yesus sagar ngikah Da. ²⁷ Uli iro Yesus ngulek tong dali, kam kawus sagar ngikah ab leka te suang firman naan te surat," Allah sagar munu pekatik ye belalu sawayan babiri ye sagar tebar tuar. ²⁸ Et uli ab na iluk bolum mulik,ab sagar tulak one ke kam tong Galilea." ²⁹ Sa," ulek Petrus, biar dali kawus uras ngikah ko,ab bene sa ngikah." ³⁰ Ingat, ulek Yesus, malem ihe ade samale piak mengkoko ye kedue kali, tolu kali ko menyangkal ab. ³¹ Ali teges da Petrus ngulek biar ab harus mate sendro ali ko, ab pasti sa sagar ngulek ab sa kataru ko.! belalu kawan murid Yesus ye bali ngulek nget iro ade. ³² Dali empe te erai runa bearan Getsemani, belalu Yesus ngulek tong kawan murid da, tuet te ihe pedinge ab laang bedoa." ³³ Belalu Yesus nuntut da Petrus, da Yakobus ali da Yohanes tulak sendro ali da, da mulai kesa nare ate nelang belisah. ³⁴ Ate ab nare bene ulek Yesus tong dali "sa'an ab ye lah kakan mate. ondo te behe nelang bejaga.! ³⁵ Yesus tulak oroo idis belalu be tunuk te tana pelos bedoa, tesuang doa ye da kaweng aka ahan da sa usah ke sa ke nare iro. ³⁶ Ma, u ma," ulek ye, " beloh naan sunah erai, ye mustahil tong ko, pindah ke nare ihe ke ab, je ye ya lah nget ga ab melengkan kengakan Ma.! ³⁷ Uli iro Yesus mulik pelos kesurek kawan murid ye desung turui da ngulek tong da Petrus," Simon, se ko turui,! je erai jam, ko sa kate bejaga. ³⁸ Belalu Yesus ngulek tong dali, buen kam bejaga, nelang bedoa, dian kam sa kesa kune pencobaan, puna roh kam kakan nampelos sa patut, et kam sa sanggup leka tabiat meresia iro lome. ³⁹ Sindai eso Yesus tulak bedoa ali ngotus kawan engan ye sameh. ⁴⁰ Uli iro da mulik eso demasu kawan murid ye pelos kesurek dali eso desung turui, leka dali mengatuk bene, empe dali sa ketoan se ye harus na ulek dali tong Yesus. ⁴¹ Kede Yesus ye ketolu kali ye mulik demasu dali, da ngulek," se kam turui eso nelang beranai.? cukup! apu empe masa ye anak meresia na okoi tong kami kawan ulun bedosa. ⁴² Buet ayu taka tulak, ite! ulun ye ngehianat ab apu sulet. ⁴³ Desung Yesus bepander, sulet da Yudas,erai ke ulun kekedue belas murid ye da iro, sendro ali da, sulet ade ulun deo ye ngoit odak ali peleng kayu. dali na utus leka kawan imam kepala, kawan ahli taurat ali kawan pemimpin Yahudi. ⁴⁴ Da Yudas apu nundru erai tanda tong dali." ulun ye na nok ab, ulek ye tong dali, da iro ulun ye. dakep da pelos oit da nelang jaga behimat. ⁴⁵ Kede da Yudas sulet, da pelos demasu Yesus nelang ngulek,"Guru.! uli iro da belalu ngenok Yesus. ⁴⁶ Belalu kawan ulun ye sulet sendro ali da Yudas iro de makep Yesus pelos ngerantai da. ⁴⁷ Et erai kedali ye naan te iro nyitak odak panyang ye pelos nares pelayan imam solai empe kelingge bekat. ⁴⁸ Belalu Yesus ngulek tong dali, se ab ihe penjahat, empe kam sulet ali odak panyang ali gagada nget demakep ab. ⁴⁹ Nongku olo ab ngajar te belai Tuhan tehadapan kam, et kam sa demakep ab et puna apu patut ye nget iro, dian tulus se ye na surat te suang firman Tuhan. ⁵⁰ Kawus ulun ye murid da mensit ngikah Yesus. ⁵¹ Erai keulun anak muda, ye je makai erai kelamar kain dian nutup unuk da, siut Yesus, kawan ulun deo kakan demakep da ade. ⁵² Et da ngikah kain ye iro, belalu mensit nelang belawoi. Yesus te pengadilan pemipin Yahudi. ⁵³ Yesus na oit tong belai imam solai te biduh kawus imam kepala, pemimpin Yahudi, ali ahli - ahli taurat desung bekumpul. ⁵⁴ Da Petrus demasu Yesus keoro empe masuk tong natar belai imam solai. te biduh da tuet bedere dani apui ali sendro kawan pengawal. ⁵⁵ Kawan imam kepala ali kawus Pengadilan agama ngusaha dian mahan bukti ye dian pesala Yesus dian tau pelotu hukuman mate tong da et dali eloh mahan bukti sunah erai. ⁵⁶ Deo saksi ye na took dian ngokoi kesaksian palsu ngehadap Yesus, et ke saksian dali sa sameh erai ali ye bali. ⁵⁷ Belalu sasenu ke ulun saksi jakat pelos ngokoi kesaksian palsu nget Yesus nget ihe. ⁵⁸ Kain ngeringa ulun ihe ngule, ab sagar mungkar belai Allah ihe ye na ene meresia, uli iro, uli tolu olo, da sagar na muet ye bali ye sa enean meresia. ⁵⁹ Et kesaksian kawan ulun iro ye sameh erai ali ye bali. ⁶⁰ Maka imam solai jakat te one waee dali kawus pelos nyituk tong Yesus, se ko sa ngejawab kawan dakwaan ye na tuju tong ko.? ⁶¹ Et Yesus menteng da puna sa bepander belalu imam solai iro nyituk sindai eso tong da, se ko raja penyelamat, anak Allah maha suci.! ⁶² Ab raja Penyelamat,ulek Yesus, et kam kawus sagar kite anak meresia tuet te sila sanan Allah ye maha suci nelang sulet te awan kelangit.! ⁶³ Belalu imam solai nyeset pama ye pelos ngulek, sa perlu eso saksi.! ⁶⁴ Kam apu keringa gegales kawan engan ye pedai Allah, nehe se keputusan kam.! dali kawus ye memutus Yesus iro sala, nelang patut na hukum mate. ⁶⁵ Belalu sasenu keulun mupus Yesus, belalu dali nutup mate da belalu nampar da, belalu ngulek, suba tangguh, dase ye nampar ko,? kawan pengawal ade siut nampar Yesus. ⁶⁶ Desung da Petrus nondo te natar, erai keulun pelayan bawe na imam solai sulet tong duh, ⁶⁷ Kede da kite da Petrus badere dani apui, da behimat nyempeneng waee mate Petrus belalu ngulek," sa sih ko ade siut ali Yesus ulun Nasaret iro.! ⁶⁸ Et da Petrus sa mengaku, ab sa ketoan nelang sa ketaru se ga ko," Ulek da pelayan iro, belalu da Petrus tulak tong jaweng gerbang belai imam solai iro. ( kede iro piak mengkoko.) ⁶⁹ Pelayan bawe iro kite da Petrus eso, belalu ngulek ade tong ulun te iro, da puna erai keulun kedali.! ⁷⁰ Et da Petrus sa mengaku eso, sa ola uli iro, kawan ulun te iro ngulek eso tong da Petrus," beloh tau na opau eso pasti ko erai ke ulun kedali, leka ko ke Galilea,! ⁷¹ Belalu da Petrus mulai nyumpah unuk nelang ngulek, ab sa ketaru ulun ye na ga ene kam iro.! ⁷² Te kede iro ade piak mengkoko tong kedue kali ye, belalu da Petrus kingat nget Yesus apu ngulek tong da, se male piak mengkoko kedue kali, ko tolu kali sa mengaku ab da Petrus belalu ngerodoi.