¹ Ake nyerahko kepadome Febe, dolor kite nyo adolah seurang pelayan jemaat de Kengkrea. Terimolah nye de delom Tuhan selayaknye urang-urang kudus, ngan tolonglah nye delom segelo sesuatu nyo deperlukonye derime sabab nye dewek lah membori bentuon kepado lobot urang ngan jugo kepado dirike. ³ Sampoikolah salamke kepado Priskila ngan Akwila, kanti-kanti sepelayanonke delom Kristus Yesus, ⁴ nyo lah mempertaruhko nyawo mike demi hidopke. Atas mika, bukon hanyo ake saja nyo mengucap syokor hambok jugo seluruh jemaat bukon Yahudi. ⁵ Sampoiko jugo salamke kepado jemaat de rumah mike. ⁶ Salam kepado Maria nyo lah bekerjo karas untok kowe. ⁷ Salam kepado Andronikus ngan Yunias, dolor-dolor sebengsoke sekaligus sesamo tahanon nyo jugo tekenal de antaro para rasul, nyo jugo lah berado de delom Kristus sebolom ake. ⁸ Salam kepado Ampliatus, nyo kekasehi de delom Tuhan. ⁹ Salam kepado Urbanus, kanti sepelayanon kite de delom Kristus, ngan kepado Stakhis nyo ke kasehi. ¹⁰ Salam kepado Apeles, nyo tebukti lah tahan uji delom Kristus. Sampoiko jugo salamke kepado para anggota keluarga Aristobulus. ¹¹ Sampoiko salamke kepado Herodion, dolor sebengsoke. Salam kepado para anggota keluarga Narkisus, nyo ado delom Tuhan. ¹² Sampoiko salamke kepado Trifena ngan Trifosa, nyo berjerih litak de delom Tuhan. Ngan, kepado Persis nyo kekasehi, nyo jugo lah bekerjo karas de delom Tuhan. ¹³ Salam jugo kepado Rufus, urang pelehon de delom Tuhan, ngan jugo kepado indoknye nyo menjedi indok bageke pula. ¹⁴ Salam kepado Asinkritus, Flegon, Hermes, Patrobas, Hermas ngan dolor-dolor nyo besamo dengan mika. ¹⁵ Salam kepado Filologus ngan Yulia, Nereus ngan dolornye, serta kepado Olimpas, ngan segelo urang kudus nyo besamo ngan mika. ¹⁶ Borikolah salam satu samo loen ngan cium kudus. Seluruh jemaat Kristus menyampoiko salam mike kepadome. ¹⁷ Kinie ake dorong kowe, dolor-dolor, awasilah mike nyo menimbulko perpecahon ngan penyosoton, serta nyo betentangan dengan pengajaron nyo lah kowe terimo; jouhilah mike. ¹⁸ Sabab, urang-urang upa iye hopi melayani Tuhan kite Yesus Kristus, hambok melayani hasrat mika dewek; ngan dengan pemboekon nyo hulos serta kato-kato sanjongon, mike nipu hati urang-urang nyo hopi menaruh curiga. ¹⁹ Sabab, ketaatonme lah deketahui segelo urang, sabab iye ake besukacita ulenyo kowe. Cuma hambok, ake nak empok kowe bijaksana terhadop ape nyo beik ngan berseh deri hal nyo jahat. ²⁰ Allah sumber damai sejahtera nak segera meremukko beles de bewoh kakime. Anugerah Yesus, Tuhan kite, menyertaime. ²¹ Timotius, kantike sepelayanonke, menyampoiko salam untokme, ngan jugo deri Lukius, yason, ngan Sosipater, dolor-dolor sebengsoke. ²² Ake Tertius, nyo menules surat nie, menyampoiko salamke kepadome delom Tuhan. ²³ Gayus, nyo membori tumpangon kepadoke ngan kepado segelo jemaat, menyampoiko salam kepadome. Erastus, bendahara kota, ngan Kwartus dolor kite, menyampoiko salam kepadome. ²⁴ (Anugerah Yesus Kristus, Tuhan kite, menyertai kowe segelo! Amin.) ²⁵ Bage Nye nyo sanggop menogohko kowe sesuoi Injil nyo keundah ngan pemberitaonke tentang Yesus Kristus, ngan nyo sesuoi dengan penyingkapon rahasia nyo lah dekerawoko selamo berabad-abad, ²⁶ hambok nyo kinie lah denyatako melalui kitab-kitab para nabi, sesuoi dengan perentah Allah nyo kekal nyo lah degerako kepado segelo bengso untok memempen menuju ketaaton iman, ²⁷ kepado sikok-sikoknye Allah nyo ponoh hikmat melalui Kristus Yesus; kemuliaon sampoi selamo-lamonya! Amin.