¹ Jedi, kite nyo kuat haros menanggong kelamahan urang nyo hopi kuat, ngan hopi menyenangko diri dewek. ² Hendaklah setiap urang de antaro kite menyenangko sesamonye demi kebeikonnye, untok membengun rohaninye. ³ Sabab, Kristuss hopi menyenangko diri-Nye dewek, hambok upa ado tetules, "Kato-kato hinoon mike, nyo menghino-Me, lah menimpa Ake." ⁴ Sabab, ape pon nyo detules dehulu lah detulesko untok mengajor kite empok melalui ketekonon ngan penghiboron nyo deboriko Kitab Suci, kite depot memeleki pengharapon. ⁵ Semoga Allah, sumber kesabaron ngan penghiboron memborime anugerah untok depot hidop delom kesehation satu samo loen sesuoi dengan Yesus Kristus, ⁶ sehingga dengan sehati ngan satu suaro kowe memuliako Allah ngan Bepa Tuhan kite Yesus Kristus. ⁷ Ulenyo iye, nerimolah satu dengan nyo loen, samo upa Kristus jugo nerimo kite demi kemuliaon Allah. ⁸ Ake boek kepadome bahwa Kristus sodah menjedi pelayan bage urang-urang nyo besunat demi kebonoron Allah, yaitu untok menogohko jenji nyo deboriko kepado nenek puyang kite, ⁹ ngan untok bengso-bengso bukon Yahudi empok mike memuliako Allah atas belos kasih-Nye. Upa ado tetules, "Sabab iye, aku nak memuji-Me de antaro bengso-bengso bukon Yahudi; ngan ake nak nyanyiko mazmur untok namo-Me." ¹⁰ Ngan lagi boeknye, "Besukacitalah hai bengso-bengso, besamo dengan umat Allah!" ¹¹ Ngan lagi, "Pujilah Tuhan hai segelo bangsa! Biarlah segelo umat memuji Tuhan." ¹² Ngan, Yesaya boek lagi, "Akan detong deri ketoronon Isai, ngan Nye nak bangket untok memerentah bengso-bengso, ngan de delom Nye, bengso-bengso nak berharop." ¹³ Kiranye Allah sumber pengharopon memonohime dengan segelo sukacita ngan damai sejahtera delom imanme sehingga kowe nak belimpah de delom pengharopon uleh kuaso Roh Kudus. ¹⁴ Dolor-dolorke, ake dewek deyakenko tentang kowe, bahwa kowe ponoh dengan kebeikon, melimpah dengan segelo pengetahuon, ngan sanggop mensehati satu dengan nyo loen. ¹⁵ Cuma hambok, ake lah menules dengan sangat berani kepadome mengenai beberapo hal untok mengingotko kembali, ulenyo anugerah nyo lah Allah boriko kepadoke, ¹⁶ ake menjedi pelayan Yesus Kristus bage bengso-bengso bukon Yahudi sebagai imam bage Injil Allah, sehingga bengso-bengso bukon Yahudi depot menjedi kekelongon nyo bekenan, nyo dekudusko uleh Roh Kudus. ¹⁷ Iyelah sababnye, delom Yesus Kristus, ake boleh bemegah mengenai hal nyo kulakuko demi Allah. ¹⁸ Sabab, ake hopi nak berani boek mengenai sesuatu nyo loen, kecuali nyo lah delakuko Kristus melalui ake, untok membuat bengso-bengso bukon Yahudi taat uleh perkataon ngan perbuaton, ¹⁹ melalui kuaso tando-tando ajaib ngan mukjizat-mukjizat, melalui kuaso Roh sehingga deri Kota Yerusalem ngan sekelilengnye sampoi ke Ilirikum, ake sodah memberitako seponohnye Injil Kristus. ²⁰ Upaiyelah ake betekad untok memberitako Injil de tempat Kristus belum dekenal empok ake jengon membengun de pocok dasar nyo lah de poteke urang loen. ²¹ Upa ado tetules, "Mike nyo bolum pernah nerimo berita tentang Nye nak ngoleh, ngan mike nyo hopi pernah mendongor nak mengerti." ²² Nielah sababnye ake sering kali tehalang untok mengonjongi kowe. ²³ Cuma hambok kinie, ulenyo hopi ado lagi tempat de daerah nie, ngan ulenyo ake lah betahun-tahun lamonye ingin mengonjongime, ²⁴ munye tekalo ake bejelon ke Spanyol, ake beharop depot singgah ngan betemu nganme sehingga kowe depot membentuke ke sane, lah telobeh dehulu ake desukacitako besamome untok sesaat. ²⁵ Cuma hambok kinie, ake bejelon ke Kota Yerusalem untok melayani urang-urang kudus, ²⁶ sabab Makedonia ngan Akhaya dengan senang hati membori sumbangon kepado urang miskin de antaro urang-urang kudus de Yerusalem. ²⁷ Mike sangat senang melakukonye, sabab iye memang kewajebon mika. Ulenyo munye bengso-bengso bukon Yahudi lah nerimo bageon delom hal-hal rohani melek urang Yahudi, maka mike jugo haros melayani urang Yahudi delom kebotohon jasmani mika. ²⁸ Ulenye iye, tekalo ake lah nyelesaiko tugas nie ngan mematraiko hasel nie kepado mika, ake nak bejelon ke Spanyol melewati kotame. ²⁹ Ake tahuko bahwa tekalo ake mengojongime, ake nak njongok delom keponohon berkat Kristus. ³⁰ Kinie, ake minta kepadome, dolot-dolor, demi Tuhan Kite Yesus Kristus ngan demi kaseh Roh, untok begumul besamo-samo denganke delom doa kepado Allah untok dirike, ³¹ empok ake delepasko deri urang-urang nyo hopi taat de Yudea, ngan empok pelayanonke demi Yerusalem bekenan bage urang-urang kudus. ³² Ngan, empok uleh kehendak Allah ake depot njongok kepadome dengan sukacita, serta beuleh kesegaron de antaro kowe. ³³ Kiranye damai sejahtera Allah menyertai kowe sekalion. Amin.