¹ Ulenyo iye, uleh kemurahon Allah, ake dorong kowe, dolor-dolor, empok kowe mempersembahko badanme sebagai persembahon nyo hidop, nyo kudus ngan nyo berkenan ngan Allah; iyelah ibadahme nyo sejati. ² Jengonlah menjedi samo ngan dnia nie, hambok berubahlah uleh pemberuon akal budime, sehingga kowe depot membedako ape nyo menjedi kehendak Allah; ape nyo beik, nyo berkenan kepado Allah, ngan nyo sempurna. ³ Sabab, melalui anugerah nyo lah deboriko kepadoke, ake boek kepado setiap urang de antaro kowe empok jengon memekerko hal-hal nyo lobeh tinggi deripado nyo haros nye pekerko, hambok empok bepeker jerneh sesuoi okoron iman nyo lah Allah boriko kepado maseng-maseng. ⁴ Sabab, upa sebuah badan, kite memeleki lobot anggota, hambok maseng-maseng hopi memeleki tugas nyo samo. ⁵ Upa iyelah kite, walaupon lobot, hmabok adolah sikok badan dlom Kristus. Ngan, maseng-maseng kite adolah anggota bage nyo loen. ⁶ Kite memeleki anugerah nyo beda-beda menorot kaseh karunia nyo deboriko kepado kite. Munye ontok benubuat, beiklah kite melakukonye sesuoi ngan bageon iman kite. ⁷ Munye ontok melayani, atau munye ontok mengajor, beiklah nye mengajor. ⁸ Atau munye ontok menghibor, beiklah nye membori penghiboron, munye ontok membori, beiklah nye membori ngan murah hati, munye ontok memempen, beiklah nye memempen ngan sungguh hati, munye ngan menonjokko belas kaseh, beiklah melakukonye ngan suka cita. ⁹ Hendaklah kaseh hopi pura-pura. Bencilah nyo jahat, ngan bepeganglah pado ape nyo beik. ¹⁰ Hendaklah kowe saleng mengasehi ngan kaseh bedoloron ngan saleng mendehului delom membori hormat, ¹¹ jengonlah kerajenonme kendor, hendaknye kowe menyala-nyala delom roh ngan layanilah Tuhan. ¹² Besukacitalah delom pengharapon, tabahlah delom kesesakon, ngan betekonlah delom doa! ¹³ Mehilulah ngambek bageon delom mencokopi kebotohon urang-urang kudus, beusahalah delom menunjukko keramahon. ¹⁴ Berkatilah mike nyo menganiayo kowe, berkatilah ngan jengon mengotok! ¹⁵ Besukacitalah ngan mike nyo besukacita, ngan meratoplah ngan mike nyo meratop. ¹⁶ Pekerkolah hal nyo samo satu samo loen. Jengon memekerko hal-hal nyo tinggi, meloenko hal-hal nyo tinggi, meloenko arahkolah kepado urang-urang nyo deanggap rendah. Jengonlah menganggap dirime bijaksane! ¹⁷ Jengonlah membelos kepado seurang pon kejahaton ngan kejahaton. Lakumkolah nyo beik de hadapon segelo urang. ¹⁸ Munye mongken, sekiranye hal iye tergentong padome, hidoplah delom perdamaion ngan segelo urang. ¹⁹ Dolor-dolorke nyo kekaseh, jengonlah kowe dewek menontot pembeloson, hambok borilah tempat kepado murka Allah. Sabab ado tetules, "Pembeloson adolah hak-Ke, Akelah nyo nak membelosnye, "Firman Tuhan. ²⁰ "Cuma hambok, munye mosohme lapor, borilah nye makon, ngan munye mosohme haos, borilah nye minom. Ngan melakuko nie, kowe nak nompok bara api pocok kepalonye." ²¹ Jengon kowe kaloh yterhadop kejahaton, hambok kalohkolah kejahaton ngan kebeikon.