¹ Paulus, hamba Yesus Kristus, nyo de pantou menjedi Rasol ngan dekhususko bage Injil Allah. ² nyo lah Allah jenjiko sebolumnye melalui nabi-nabinyo delom kitab suci. ³ tentang Anak-Nye, nyo menurut deging laher jak keturunon Daud. ⁴ ngan nyo denyatoko sebagai Anak Allah nyo bekuaso melalui kebangketon jak antaro urang mati menurot Roh Kekuduson, nyoiye Kristus Yesus Tuhan kito. ⁵ Melalui nye, kami menerimo anugera ngan jabaton kerasolon untuk membewo ketaaton iman de antaro segelo bengso bukon Yahudi demi namo-Nye, ⁶ termasok kowe nyo panggel untuk menjedi melek Kristus Yesus. ⁷ Kepado kowe segelonye nyo ado de Roma, nyo de kasehi Allah, ngan nyo de pantau untuk menjedi urang-urang kodus: Anugera ngan damai sejahtera bage me jak Allah, Bepa kite, ngan Tuhan Yesus Kristus! ⁸ Pertamo-tamo, ake besyukur kepado Allah ke melalui Kristus Yesus atas kowe segelo uleh iman me lah denyatoko ke seluruh dunia. ⁹ Sabab, Allah, nyo kulayani ngan rohke delom Injil Anak-Nye menjedi saksike behwo ake hopi hentinyo mengingot mike segelo; ¹⁰ de delom doake, ake selalu memohon empoknye sekironye kinie, uleh kehendok Allah, akhernye ake behasel njongok kowe. ¹¹ Ake sajo en amat betomu nganme empoknye ake pacok memboriko suatu karunia rohani untuk menguat ko kowe, ¹² iyelah empoknyo kite pacok de toguhko besamo-samo uleh iman maseng-maseng, beik imanme maupon imanke. ¹³ Dulor-dulor, ake nak tahu ko behwa ake lah bekali-kali berencano untuk jongok me, hambok maseh tehalang sampoi kinie, empoknye ake jugo menuoi hasel panen jak entaro kowe sebagoimone jak entaro bengso-bengso bukon Yahudi loennye. ¹⁴ Ake beutang kepado urang Yunani ngan kepado urang barbar, kepado nyo behikmat maopon kepado nyo bodoh. ¹⁵ Uleh iyelah, ake sajo nak memberitako Injil kepado kowe nyo ado de Roma. ¹⁶ Ake hopi malu akan Injil, sabab Injil adolah kuaso Allah untuk keselamaton setiap urang nyo pecayo; petamo-tamo untuk urang Yahudi, kemudion jugo untuk urang Yunani. ¹⁷ Sabab de delomnye, kebonoron Allah denyatoko jak iman kepado iman, upanyo ado tetoles: "Urang bonor akan hidop uleh iman." ¹⁸ Sabab, murka Allah denyatoko jak serega tehadop segelo kefasikon ngan kejahaton mendesio nyo menekan kebonoron dengan kejahaton mike. ¹⁹ Uleh sabab iye, apenyo pacok deketahui tentang Allah sodah jelas bagi mike uleh Allah lah menonjokonye kepado mike. ²⁰ Memang, sejak denia deciptako, sifat-sifat Allah nyo hopi pacok dekole, iyelah kuaso-Nye kekal ngan sifat keilahion-Nye, lah tekole jelas untuk depahami melalui hal-hal deciptako-Nye sehinggo mike hopi pacok mengelak. ²¹ Hambok sebeleknye, sekalipon mike mengenal Allah, mike hopi menghormati-Nye sebagoi Allah apo besyukur kepado-Nye; sebeleknye, pekeron mike menjedi hopi beguna ngan hati mike nyo bodoh menjedi kolom. ²² Mike menganggap diri bijaksana, cuma menjedi bodoh, ²³ ngan menukor kemuliaon Allah nyo hopi benoda dengan gambaron-gambaron mendesio nyo fana, borung-borung, benatong bekaki empat, apo benatong-benatong merayap. ²⁴ Uleh iye, Allah menyerahko mike kepado keinginan hati mike nyo mengendoko kecemaron sehinggo mike saleng mencemari badan mike de entaro mike dewek. ²⁵ Sabab, mike menukor kebonoron Allah dengan penipuon, ngan sojud sereta menyembah makhluk ciptaon, bukon Sang Pencipta nyo tepuji selamo-lamonye. Amin! ²⁶ Uleh iye, Allah menyerahko mike kepado nafsu-nafsu nyo hino, sabab betetina mike menukor hubungon nyo wajar dengan hubungon nyo hopi wajar. ²⁷ Upa iyelah jugo nyo jejenton, mike mencampokko hubungon nyo wajar dengan betina, cuma menyalo-nyalo delom nafsu terhadop dengan nyo loin; jenton dengan jenton melakuko perbuaton-perbuaton nyo memaluko; ngan de delom badannye maseng-maseng, mike menerimo hukumon atas doso-doso mike. ²⁸ Ngan, uleh mike hopi endok on mengakui Allah delom pengetahuon mike, mangko Allah menyerahko mike kepado pekeron-pekeron nyo hopi senonoh sehinggo mike melakuko hal-hal nyo seharosnye hopi mike lakuko. ²⁹ Mike deponohi dengan segelo macom tong hopi bonor, kejahaton, keserakahon, ngan kebencion; ponoh dengan iri hati, pembunohon, petengkaron, penipuon, ngan kedengkion; mike iyelah jejahatko urang, ³⁰ pefitnah, pembenci Allah, kasar, sombong, godong mulut, pembuat kejahaton, hopi taat kepado urang rayo, ³¹ bodoh, hopi setia, hopi beperasaon, ngan kejam. ³² Ngan, sekalipon mike mengetahui peraturon Allah bekehato behwa urang nyo melakuko hal-hal semacam iye pantas mati, mike bukon hanyo tetap melakukonnye, hambok jugo mendokung urang-urang nyo melakuko hal-hal iye.