¹ Mengka, malaikat kelima behembus trompetnye, ngan ake mengoleh sebuah bintang titek deri langet ke pucuk behumi, ngan kenempatnye de boriko kunci lubang jurang maut. ² Enye membuka lubang jurang maut, mengka noeklah asop deri lubang iye, upa asop deri tungku nyo godong, ngan matoari ngan angkasa menjedi kolom ulenyo asop lubang iye. ³ Mengka, deri delom asop iye keluorlah belalong-belalong ke pucuk behumi, ngan mike de bori kuaso upa kuaso kalajengking de behumi. ⁴ Ngan, kenempat mike de posonko enggakkonyo hopi merosak rumput-rumput behumi, tumbuh-tumbuhon, ataupun betong-betong, meloinko anyo mike nyo hopi memilikih segel Allah podo dahi mike. ⁵ Mike hopi de izinko untok membunoh mike, hambuk enggakkonyo menyikso mike selamo 5 bulan; ngan siksaon iye samo upa siksaon kalajengking tekalo enye menyongot mendesio. ⁶ Tekalo maso iye, mendesio bakal mendalak kemation, hambuk mike hopi menomukonye. Mike amat te'elek, hambuk kemation menghindari mike. ⁷ Wujod belalong-belalong iye upa kuda-kuda nyo de siapko untok perang; ngan de pucuk kepalo mike ado sesuatu upa mahkota emas, wajah mike upa wajah mendesio. ⁸ Rambut mike upa rambut betina ngan gigi mike upa gigi singa, ⁹ Ngan dada mike upa perebot besi, ngan bunyi sayap mike upa bunyi kereta-kereta dengan lobot kuda nyo bepacu ke medan perang. ¹⁰ Ngan, ekor mike upa kalajengking ngan ado songotnye, ngan de delom ekor mike lah ado kuaso untok menyakiti mendesio selamo 5 bulan. ¹¹ Rajo nyo memerentah mike adolah malaikat jurang maut, nyo delom beheso Ibrani namonye adolah " Abadon", sedangko delom beheso Yunani namonye adolah " Apolion ". ¹² Bencano nyo pertamo sodah lewat, hambuk lage ado 2 penderitaon loin nyo bakal njongok. ¹³ Mengka, malaikat nyo keenam behembus trompetnye, ngan ake mendongor suaro deri keempat tanduk altar emas nyo ado de hadopon Allah, ¹⁴ Buik kenempat malaikat keenam nyo memogong trompet iye," Lapaskolah keempat malaikat nyo de kobot de kali Efrat nyo godong iye." ¹⁵ Mengka, keempat malaikat iye, nyo lah de persiapko untok jam ngan hari, bulan ngan tahun iye, de lapasko enggakkonyo membunoh 1/3 umat mendesio. ¹⁶ Jumlah tentaro bekuda mike adolah 200 juta lobotnye; ake mendongor jumlah mike. ¹⁷ Ngan, upaiyelah ake mengoleh delom pengolehon kuda-kuda iye ngan mike nyo duduk de pucuknye; padong penunggangnye memakoi perebot besi bewarno abang marok, biru kolom, ngan kuneng upa belerang; ngan kepalo singa ngan deri mulut mike keluor api, asop, ngan belerang. ¹⁸ Dengan ketigayelah 1/3 mendesio de bunoh; dengan api, asop, ngan belerang nyo keluor deri mulut mike. ¹⁹ Sabab, kekuaton kuda-kuda iye terdepot podo mulut ngan ekor mike. Sabab, ekor mike upa ulor ngan memilikih kepalo, ngan dengan iyelah mike menyikso. ²⁰ Cuma, mendesio nyo selamat, nyo hopi tebunoh uleh bencana iye, tetap hopi betobat deri perbuaton-perbuaton tangon mike, behwo mike hopi buleh menyembah roh-roh jahat ngan berhala-berhala deri emas, perak, tembaga, betu, atau kayu; nyo hopi depot mengoleh, mendongor, ataupun bejelon, ²¹ ` Ngan mike hopi betobat deri pembunuhon, sihir, percabulan, ngan pemaleng.