¹ Mengka, ake memperhatiko tekalo Anak Domba membuka sikuk deri tujuh segel iye, ngan ake mendongor sikuk deri empat mahkluk iye buik dengan suaro nyo upa guntur, " Maro!" ² Mengka, ake mengoleh seekor kuda puteh ngan enye nyo duduk de pucuknye memogong sebuah panah; ngan sebuah mahkota de boriko kenempatnye, ngan enye maju untok mengalahko ngan memenangko. ³ Ngan, tekalo Anak Domba iye membuka segel nyo kedua, ake mendongor makhluk nyo kedua buik," Maro!" ⁴ Mengka, majulah sekor kuda loin bewarna abong upa nyalo api, ngan enye nyo duduk de pucuknye de bori kuaso untok mengambek kedamaion deri behumi singgo mendesio bakal saleng membunoh, ngan sebuah pedang nyo godong de boriko kenempatnye. ⁵ Ngan, tekalo Anak Domba iye membuka segel nyo ketiga, ake mendongor makhluk nyo ketiga buik, " Maro!" mengka, ake mengoleh seekor kuda hitom ngan enye nyo duduk de pucuknye memogong sebuah dacing de tangonnye. ⁶ Mengka, ake mendongor upa ado suaro deri tangah-tangah keempat makhluk iye buik," sikuk cupak gandum 1 dinar, ngan 3 cupak jelai untok 1 dinar, hambuk jengon merusakko minyak ngan anggurnye!" ⁷ Ngan, tekalo Anak Domba iye membuka segel nyo keempat, ake mendongor suaro makhluk nyo keempat buik," Maro!" ⁸ Mengka, ake mengoleh seekor kuda bewarna hijau pucat ngan enye nyo duduk de pucuk benamo maut ngan Hades mehiluinye. Ngan, kuaso de boriko kenempat mike pucuk 1/4 behumi, untok membunoh dengan pedang, kelaporon, penyaket, ngan binatang-binatang buas de behumi. ⁹ Tekalo Anak Domba membuka segel nyo kelima, ake mengoleh de bewoh altar* jiwo-jiwo mike nyo lah de bunoh ulenyo firman Allah ngan ulenyo kesaksion nyo lah mike pertahanko. ¹⁰ Mike mekek dengan suaro karas," Berape lamo lage ao, Tuhan nyo kudus ngan bonor, Kowe bakal menahan diri deri menghakemi ngan membelosko deroh kamie kenempat mike nyo diom de behumi?" ¹¹ Ngan, kenempat maseng-maseng jiwo iye de boriko sebuah jubah puteh ngan mik de boritahuko behwo mike arus beristirahat setegal lage, singgo jumlah kanti-kanti pelayon ngan dulur-dulur mike nyo bakal de bunoh upa mike menjedi genap. ¹² Ngan, ake mengoleh tekalo Anak Domba iye membuka segel nyo keenam, terjedilah gempo behumi nyo dahsyat; matoari menjedi hitom upa koin karung nyo terbuat deri rambut ngan segelo bulan menjedi upa deroh. ¹³ Ngan, bintang-bintang de langet betitekan ke behumi upa betong ara menggugurko buah-buahnye nyo matah saat de guncangko ule angen nyo sajo kuat. ¹⁴ Ngan, tebelahlah langet bagaikan kitab nyo de gulung, ngan setiap gunong ngan pulau de pindahko deri tempatnye. ¹⁵ Mengka, rajo-rajo de behumi ngan padong pembesar, ngan perwira-perwira, ngan urang-urang sugeh ngan bekuaso, ngan segelo budak, ngan urang bebas bekerawo de gua-gua ngan de antaro betu-betu de pegunungon. ¹⁶ Mike buik kenempat gunong-gunong ngan betu-betu karang iye," Runtuhlah menimpo kamie deri hadopon Enye nyo duduk de pucuk takhta, ngan deri murka Anak Domba ! ¹⁷ Sabab, hari godong bage murka mike lah sampoi ngan siapekah nyo depot betahan?"