( Surat Kenempat Jemaat De Sardis ) ¹ "Ngan, kenempat malaikat jemaat de Sardis tuleskolah: Nielah pemboekon Enye nyo memilikih tujuh Roh Allah ngan tujuh bintang iye: Ake tahuko perbuaton-perboatonme. Urang ngehatoko behwo kou hidop, hambuk sesungguhnye kou te'elek. ² Waspadalah ngan perkuatlah hal-hal nyo lage ado, nyo hamper te'elek, ulenyo Ake bolum mendepoti pekerjaanme sempurna delom pengolehon Allah. ³ Ulenyo iye, ingotlah ape nyo lah kowe terimo ngan dongor, taatilah iye ngan betobatlah! munye kowe hopi waspada, Ake bakal njongok upa seurang maleng ngan kowe hopi bakal tahuko jam berape Ake bakal njongok kenempatme. ⁴ Cuma hambuk, kowe memilikih beberap urang de Sardis nyo bolum mencemarko pakoyon mike; ngan mike bakal bejelon serompok-Ke dengan memakoi pakoyon puteh ulenyo mike layak. ⁵ Urang nyo menang bakal de sarungko pakoyon puteh ngan Ake hopi bakal menghapus namonye deri kitab kehidupon. Ake bakal mengakui namonye de hadopon Bepa-Ke ngan de hadopon malaikat-malaikat-Nye. ⁶ Enye nyo memilikih telingo biarlah mendongor ape nyo de kehatoko Roh kenempat jemaat-jemaat." ⁷ "Ngan, kenempat malaikat jemaat de Filadelfia tuleskolah: Nielah pemboekon deri Nyo Kudus ngan Nyo Bonor, nyo memogong kunci Daud, nyo membuka ngan hopi seurang pun depot nyokatupko; nyo katup ngan hopi seurang pun depot nyobuka: ⁸ Ake tahuko perbuaton-perboatonme. Kolehlah, Ake lah membukako pintu bageme, nyo hopi seurang pun depot menutupnye ulenyo kekuatonme kecik, hambuk kowe lah menaati firman-Ke ngan hopi menyangkal namo-Ke. ⁹ Kolehlah, Ake bakal membuat padong sinagoge beles iye, nyo mengaku sebage urang Yahudi, hambuk sebonornyo bukon, meloinko pelato, Ake bakal membuat mike njongok ngan sujud de kakime, ngan membuat mike tahuko bewo Ake mengasehime. ¹⁰ Ulenyo kowe lah memelihara firman ketekunon-Ke, ake bakal memeliharame deri masa kesusahon nyo bakal njongok ke segelo denia, untok menguji mike nyo tinggal de behumi. ¹¹ Ake enggakkonyo njongok. Pogonglah ape nyo kowe milikih enggakkonyo hopi seurang pun bakal mengambek mahkotame. ¹² Enye nyo menang, Ake bakal menjedikonye tiang penyangga Bait Suci Allah-Ke, ngan enye hopi bakal pogi lage deri sie; ngan Ake bakal menulesko podonye namo Allah-Ke, yaitu Yerusalem beheru, nyo iye turun deri serga, deri Allah-ke, ngan namo-Ke nyo beheru. ¹³ Enye nyo memilikih telingo biarlah mendongor ape nyo de kehatoko Roh kenempat jemaat-jemaat." ¹⁴ " Ngan, kenempat malaikat jemaat de Laodikia tuleskolah : ¹⁵ Ake tahuko perbuaton-perbuatonme bewo kowe hopi dengen ataupun poang. Alangko beiknye munye kowe dengen atau poang. ¹⁶ Jedi, ulenyo kowe angot, hopi poang ataupun dengen, Ake bakal memuntahkome deri mulut-Ke. ¹⁷ Ulenyo kowe buik,' Ake sugeh, bekelimpahon, ngan hopi kekurangon ape-ape,' ngan hopi tahuko bewo sebonornye kowe sengsaro, malang, mesken, buta, ngan telanjong. ¹⁸ Ake menasehatime untok memboli deri-Ke emas, nyo de murniko dengan api enggakkonyo kowe menjedi sugeh, ngan pakoyon-pakoyon puteh enggakkonyo kowe depot memakoinye singgo raso malu ulenyo ketelanjongonme hopi bakal tekoleh, ngan mengoles salep podo matome enggakkonyo kowe depot mengoleh. ¹⁹ Mike nyo ke kasehi, ke tegur ngan ke hakar; ulenyo iye, relakolah hatim ngan betobatlah! ²⁰ Kolehlah! Ake togok de depan pintu ngan mengetuk. Munye ado urang mendongor suaro-Ke ngan membukako pintu, Ake bakal masuk kenempatnye ngan makon serompoknye, ngan enye serompok-Ke. ²¹ Enye nyo menang, Ake bakal mengizinkonye duduk serompok-Ke d tahta-Ke samo upa Ake lah menang ngan duduk serompok Bepa-Ke de tahta-Nye. ²² Enye nyo memilikih telingo biarlah mendongor ape nyo de kehatoko Roh kenempat jemaat-jemaat."