¹ Kebonoron deri Yesus Kristus, nyo de boriko Allah kenempat-Nye untok de tunjukko kenempat hambo-hambo-Nye tentang hal-hal nyo enggakkonyo harus terjedi. Yesus Kristus memboriko kebonoron nie melalui malaikat-Nye untok de sampoiko kenempat Yohanes, hambo-Nye. ² Yohanes lah menjedi saksi firman Allah ngan jugo Yesus Kristus, pucuk segelo sesuatu nyo lah de kolehnyo. ³ De berkatilah urang nyo membeco dengan suaro karas firman nubuatan nie ngan de berkatilah jugo mike nyo mendongornye ngan melakuko ape nyo tetules de delomnye, ulenyo waktunye sodah parok. ⁴ Deri Yohanes, kenempat ketujuh jemaat nyo ado de Asia. ⁵ Ngan deri Kristus Yesus, saksi nyo setia, nyo pertamo kali bangket deri antaro urang te'elek ngan penguaso pucuk rajo-rajo de behumi. Bage Enye, nyo mengasehi kite ngan melapasko kite deri doso-doso kite dengan deroh-Nye, ⁶ Ngan lah menjediko kite menjedi sikuk kerajakon, imam-imam bage Allah ngan Bepa-Nye, bage Enyelah kemuliaon ngan kekuasaon sampoi selamo-lamonye!Amin. ⁷ Kolehlah, Yesus njongok dengan awan-awan, ngan setiap mato bakal mengoleh Enye, bahkan mike nyo sodah menusuk-Nye; ngan segelo bengeso de behumi bakal meratop ulenyo Enye. Ao, nie bakal terjedi! Amin. ⁸ " Ake adolah Alfa ngan Omega, firman Tuhan Allah, Nyo Ado, Nyo sodah Ado, ngan Nyo bakal Njongok, Nyo Mahakuaso." ⁹ Ake, Yohanes, dulur ngan sesamome nyo ambek bageon delom kesusahon, delom kerajakon, ngan delom ketekunon de delom Yesus, berado de pulau nyo de sobut Patmos ulenyo firman Allah ngan kesaksion Yesus. ¹⁰ Ake de kuasai Roh podo Ari Tuhan, ngan ake mendongor suaru bias deri belakongke upa bunyi trompet, ¹¹ Nyo buik," Tuliskolah segelo nyo kowe koleh ke delom sebuah buku ngan kiremko iye kenempat tujuh jemaat : Efesus, Smirna, Pergamus, Tiatira, Sardis, Filadelfia, ngan Laodikia." ¹² Mengka, ake menenggak untok mengoleh suaro nyo buik kenempatke. Tekalo ake menenggak, ake mengoleh tujuh kaki dian emas, ¹³ ngan de tangah-tangah kaki dian iye, ake mengoleh seseurang upa Anak Mendesio memakoi jubah sampoi ke kaki ngan sebuah selempang emas de dada-Nye. ¹⁴ Kepalo ngan rambut-Nye puteh upa bulu domba, seputeh salju; ngan mato-Nye upa nyalo api. ¹⁵ Kaki-Nye mengilap upa tembago nyo membara delom perapion ngan suaro-Nye upa gemuruh aek bah. ¹⁶ De tangon kanon-Nye, Enye memogong tujuh bintang ngan deri mulut-Nye keluor sebuah pedang tajom bemato dua, ngan wajah-Nye becahayo upa matoari nyo terik. ¹⁷ Tekalo ake mengoleh Enye, ake titek de kaki-Nye upa urang te'elek. Cuma, Enye memotekko tangon kanon-Nye ke pucukke ngan buik, "Jengon takut, Akelah Nyo Awal ngan Nyo Aher ¹⁸ Ngan Nyo Hidop. Ake lah te'elek, hambuk kolehlah Ake hidop sampoi selamo-lamonye, ngan Ake memogong kunci maut ngan kunci Hades. ¹⁹ Ulenyo iye, tuleskolah hal-hal nyo lah kowe koleh, ngan hal-hal nyo terjedi kinie ngan hal-hal nyo bakal terjedi sesodahnye. ²⁰ Nielah resio tentang tujuh bintang nyo kowe koleh de tangon kanon-Ke ngan tujuh kaki dian emas iye. Tujuh bintang iye adolah padong malaikat deri tujuh jemaat; ngan tujuh kaki dian iye adolah tujuh jemaat."