( Berita Kebangketon Yesus ) ¹ Ngan, tekalo hari sabat belalu, Maria Magdalena, Maria induk Yakobus, sreta Salome, lah memboli rempah-rempah singgo mike depot bejelon ngan meminyaki Yesus. ² Pagi-pagi bonor, podo hari pertama minggu iye, tekalo matoari terbit, mike njongok ke kuburon. ³ Mike buik sikuk samo loin," siape nyo bakal menggulengko betu deri pintu masuk kuburon iye?" ⁴ Cuma, lah ngelaloh ke pucuk mike ngoleh betu nyo sajo godong iye sodah de gulengko. ⁵ Ngan, lah masuk ke delom kuburon, mike ngoleh seurang pemuda nyo memakoi jubah puteh sedang duduk de sebelah kanon, ngan mike tegelau. ⁶ Mengka, enye buik kenempat mike," Jengon tegelau, kowe mendelok Yesus urang Nazaret nyo lah de salibko. Enye lah bangket. Enye hopi ado de sie. Kolehko tempat mike memberengko-Nye. ⁷ Cuma hambuk, bejelonlah, kehatoko kenempat murid-murid-Nye ngan kenempat Petrus bewo Enye sedang mendehului kowe ke Galilea. De sane, kowe bakal betomu Enye, upa nyo lah Enye buikko kenempatme." ⁸ Mengka, mike keluor ngan melariko diri deri kuburon iye ulenyo mike gemitek ngan takjub, ngan mike hopi ngehatoko ape-ape kenempat siape pun ulenyo mike ketakuton. [ Ngan, segelo sesuatu nyo lah de perentahko enggakkonyo mike kehatoko kenempat Petrus ngan kanti-kantinye, mike sampoiko dengan singkat. Lah iye, Yesus deweklah nyo mengutus mike deri Timur sampoi ke Barat, untok menyatako berita nyo kudus ngan nyo hopi depot binaso tentang keselamaton kekal. Amin.] ⁹ Tekalo Yesus bangket pagi-pagi podo hari pertamo delom minggu iye, Enye pertamo-tamo muncul kenempat Maria Magdalena nyo derinye Yesus lah mengusir tujuh roh jahat. ¹⁰ Mngka, enye bejelon ngan memberitahuko kenempat mike nyo lah serompok dengan Yesus, sementaro mike sedang besodingon ngan meratop. ¹¹ Ngan, tekalo mike mendongor bewo Yesus hidop ngan lah de koleh ulehnye, mike hopi pecayo. ¹² Lah kejedion iye, Yesus jugo muncul delom bentuk loin kenempat dua urang deri mike nyo sedang bejelon menuju ke desa. ¹³ Mengka, mike belek ngan memboritahuko kenempat nyo loinnye, hambuk nyo loinnye iye jugo hopi mempecayoi mike. ¹⁴ Lah iye, Nye muncul dewek kenempat kesebelas murid-Nye tekalo mike sedang duduk makon ngan Nye menegur mike ulenyo kehopipecayaon ngan kekarason hati mike. Sabab, mike hopi pecayo kenempat urang-urang nyo lah mengoleh-Nye sesodah Enye bangket. ¹⁵ Ngan, Enye buik kenempat mike," Bejelonlah ke seluruh denia ngan beritakolah Injil kenempat segelo ciptaan. ¹⁶ Siape nyo sodah pecayo ngan sodah de baptes bakal deselamatko, hambuk siape hopi pecayo bakal de hukom. ¹⁷ Ngan, tando-tando nie bakal mehilui mike nyo pecayo: Delom Namo-Ke mike bakal mengusir roh-roh jahat; mike bakal buik delom bahasa-bahasa beheru; ¹⁸ Mike bakal memogong ulor dengan tangon mike; ngan munye mike minom racun nyo mematiko, hal iye hopi bakal mencelakako mike; mike bakal memotekko tangon mike pucuk urang-urang saket, ngan urang-urang iye bakal sembuh." ¹⁹ Mengka, lah Tuhan Yesus ngehatokonye kenempat mike, Enye noek ke serga ngan duduk de sebelah kanon Allah. ²⁰ Mengka, mike bejelon ngan bekotbah de mone-mone, sementaro Tuhan bekerjo serompok mike ngan menoguhko firman-Nye melalui tando-tando nyo menyertai-Nye.