(Gades nyo lali ngan nyo bijaksana ) ¹ "Mengka, Kerajaon Serga nak deumpamako dengan sepuluh gedis nyo mengunda lampu-lampunye ngan bejelon nak betomu mempelai nyo jenton. ² Lima deantaro mike adolah lali, ngan lima nyo loinnye adolah bijaksana. ³ Tekalo nyo lali iye mengunda lampu-lampunye, mike hopi mengunda minyak serompok enye. ⁴ Cuma, nyo bijaksana menunda minyak delom gurai kecik serompok dengan lampu-lampu mike. ⁵ Kinie, tekalo mempelai jenton iye menunda kedetongonnye, mike segelo ngantuk ngan tiduk. ⁶ Cuma, tekalo tangah malom ado teriak on,' mempelai jenton njongok ! keluorlah nak nyambutnye !' ⁷ Mengka, segelo gedis iye jego ngan merapiko lampu-lampu mike. ⁸ Ngan, nyo lali buik kenempat nyo bijaksana, ' Borilah kenempat kamie kekecekon minyakme ule lampu-lampu kamie lanak padom.' ⁹ Cuma hambuk, ' hopi, hopi bakal cukup nak kamie ngan nak kowe. Lobih beik, pogilah kenempat nyo menjuol minyak ngan bolilah nak kou dewek.' ¹⁰ Sementaro mike pogi nak memboli, mempelai jenton iye njongok, ngan mike nyo siap, masuk serompok dengan enye ke perjamuon kawin, ngan pintu de tutup. ¹¹ Sesodah iye, njongok pula gedis-gedis nyo loinnye ngan buik,'tuan,tuan! bukakolah untuk kamie.' ¹² Cuma hambuk, enye nyimbot,' sesungguhnye, ake buik ngan kowe, ake hopi kenal ngan kowe.' ¹³ Ulenyo iye, bejego-jegolah ulenyo kowe hopi tahuko hari atau waktunye." ¹⁴ " Sabab, Kerajaon Serga samo upa seurang nyo nak bejelon keluor negeri, nyo mamantou hambo-hambonye ngan menyerahko miliknye kenempat mike. ¹⁵ Kenempat nyo sorang, enye memboriko 5 talenta. Kenempat nyo loinnye, 2 talenta, ngan kenempat nyo loinnye lagi 1 talenta. Beberong endokon sesuoi kemampuonnye. Mengka, enye pogi. ¹⁶ Urang nyo menerimo 5 talenta iye detong lari, ngan menjelonko talenta iye, ngan enye menghaselko 5 talenta lagi. ¹⁷ Upa iyelah jugo urang nyo menerimo 2 talenta, enye menghaselko 2 talenta lagi. ¹⁸ Cuma hambuk, urang nyo menerimo 1 talenta iye lari, ngali lubang de tanoh, ngan ngerawoko duit tuannye. ¹⁹ La sodah iye, tuan deri hambo-hambo iye njongok ngan mengadoko perhitungon dengan mike. ²⁰ Urang nyo lah menerimo 5 talenta iye menghadop ngan mengunda 5 talenta lagi, ujonye, ' Tuan, kowe menyerahko 5 talenta ngan ake. Kolehlah, ake la menghaselko 5 talenta lagi.' ²¹ Tuannye buik kenempat enye,' Sajo beik, hambo nyo beik ngan setia. Kowe setia dengan hal-hal kecek, ake nak mengangkot kowe pucuk lobot hal, masuklah kedelom sukacita tuanme.' ²² Ngan, urang nyo menerimo 2 talenta menghadop ngan buik,'Tuan, kowe menyerahko 2 talenta ngan ake. Koleh, ake la menghaselko dua talenta lagi,' ²³ Tuannye nyimboti,'sajo beik, hambo nyo beik ngan setia. Kowe setia dengan hal-hal kecek, ake nak mengangkot kowe pucuk lobot hal, masukklah ke delom sukacita tuanme.' ²⁴ Mengka, urang nyo menerimo 1 talenta jugo menghadop ngan buik,'Tuan, ake tahuko kowe urang nyo kejam, menuo detempat nyo kou hopi menabur, ngan mengumpulko de tempat nyo kou hopi menyebarko beneh. ²⁵ Ulenyo iye, ake takut, ngan lari ngan ngerawoko talentame de delom tanoh. Koleko, kowe memiliki ape nyo menjedi milikme.' ²⁶ Hambuk, tuannye nyimboti ngan buik kenempat enye,' kowe hambo nyo jahat ngan penyogon ! kowe tahuko bahwa ake menuoi de tempat nyo ake hopi menabur ngan mengumpulko detempat nyo ake hopi menyebarko beneh. ²⁷ Ulenyo iye, seharusnya kowe menyopi duitke de bank ngan tekalo ake belek, ake nak menerimo milikke kembali dengan bunganye. ²⁸ Ambiklah 1 talenta iye derinye ngan boriko kenempat enye, nyo memiliki 10 talenta iye. ²⁹ Sabab, setiap urang nyo memiliki bakal debori lagi, ngan enye bakal bekelimpahon. Cuma hambuk, deri urang nyo hopi memiliki, bahkan apa nyo enye miliki bakal de ambik. ³⁰ Tohukko hambo nyo hopi beguna iya kedelom kekolomon nyo paleng tekabut. De nempat iye bakal ado ratopon ngan kertak gigi." ³¹ " Tekalo Anak Mendesio njongok delom kemuliaon-Nye,ngan padong malaikat serompok-Nye, mengka enye bakal duduk de tahta kemuliaon-Nye. ³² Segelo bengeso nak de kumpulko de hadopon-Nye, ngan Nye nak memisahko mike sikuk deri nyo loin, upa gembala nyo memisahko domba deri kambing-kambing. ³³ Ngan, Nye nak menempatko domba-domba de sebelah kanan-Nye, ngan kambing-kambing de sebelah kiri. ³⁴ Mengka Rajo nak buik kenempat mike nyo de sebalah kanon-Nye,' Marolah, kowe nyo deberkati uleh Bepak-Ke, warisilah Kerajaon nyo de sediako untukme deri permulaon denia. ³⁵ Ulenyo telako Ake kelaporon, kowe membori Ake makon. Ake haus ngan kowe membori Ake minom. Ake urang asing, ngan kowe mengundang Ake masuk. ³⁶ Ake betelanjong ngan kowe memakoiko Ake pakoiyon. Ake saket ngan kowe ngoleh Ake. Ake de penjaro ngan kowe njongok kenempat Ake.' ³⁷ Mengka, urang -urang bonor iye nak menjawob-Nye, ' Tuhan, kapan kamie ngoleh Kowe kelaporon ngan memboriMe makon, atau haus ngan membori-Me minom ? ³⁸ Kapan kamie ngoleh Kowe sorang asing ngan mengudang Kowe masuk, atau betelanjang ngan memakoiko pakoyon? ³⁹ Kapan kamie ngoleh Kowe saket atau de penjaro ngan kamie njongok kenempat Kowe?' ⁴⁰ Rajo iye nak menyimboti, ' Ake ngehatoko nyo sebonornye ngan kowe, upamone kou melakuko terhadop sikuk deri dulur-dulur-Ke nyo paleng kecek nie, kowe melakukonye untuk Ake.' ⁴¹ Mengka, enye nak buik jugo kenempat mike nyo de sebelah kiri-Nye, ' pogilah deri hadopon-Ke, kowe nyo tekutuk, kedelom api abadi nyo lah desiapko untuk belis ngan malaikat-malaikatnye. ⁴² Sabab, Ake lapar ngan kowe hopi membori-Ke makon, Ake raus ngan kowe hopi membori-Ke minom. ⁴³ Ake urang asing ngan kowe hopi mengundang-Ke masuk; betelanjong ngan kowe hopi memakoiko Ake pakoyon; saket ngan depenjaro, ngan kowe hopi ngoleh Ake.' ⁴⁴ Mengka, mike jugo nak nyimbot, ' Tuhan, kapan kamie ngoleh Kowe kelaporon atau raus,atau sorang asing, atau saket,atau betelanjong,atau de penjaro, ngan hopi melayoni-Me?' ⁴⁵ Mengka, enye nak menyimboti mike," Ake ngehatoko nyo sebonornye ngan kowe, upamone kowe hopi melakukonye terhadop sikuk deri mike nyo paleng kecek nia, kowe hopi melakukonye ngan Ake.' ⁴⁶ Ngan, mike nie nak bejelon kedelom penghukumon kekal, hambuk urang-urang bonor kedelom kehidupon kekal."