( Hukum Allah Ngan Tradisi Mendesio ) ¹ Mengka, beberapa urang Farisi ngan ahli-ahli Torat deri Yerusalem njongok kenempat Yesus ngan buik, ² " Mengka murid-murid-Me melanggar tradisi nenek puyang ? sabab, mike hopi membesuh tangon tekalo makon roti !" ³ Ngan, Yesus buik ngan bekehato kenempat mike, " Ngan, mengka kowe jugo melanggar perentah Allah demi tradisime? ⁴ Ulenyo Allah berfirman, Hormatilah bepak ngan indukme," ngan, " siape nyo mengutukih bepak atau induknye, harus dehukum mati," ⁵ Cuma, kowe bekehato," siape bae nyo buik kenempat bepak atau induknye,' Ape pun pemborian untuk kowe sodah depersembahko Kepodo Allah," ⁶ nye hopi perlu menghormati bepak atau induknye. Dengan upa iye, kowe membatalko Firman Allah demi tradisime. ⁷ Kowe, urang-urang munafik, memang bonor nubuatan Yesaya tentang kowe : ⁸ ' Bengeso nie menghormati Ake dengan mulut mike, cuma hati mike jouh jak deri Ake. ⁹ Ngan, sia-sia mike menyembah Ake dengan mengajorko perentah-perentah mendesio." ¹⁰ Ngan, Yesus memantaou urang lobot ngan buik, " Dongor ngan pahamilah ! ¹¹ Bukon ape nyo masuk ke delom mulutnyo menajisko urang, cuma ape nyo keluor jak mulutnye, nielah nyo menajisko urang." ¹² Mengka, murid-murid Yesus njongok ngan betanyo kenempatnye, " Tahukah Kowe bahwa urang-urang Farisi tesinggung tekalo mendongor pernyatoon nie ?" ¹³ Cuma, Yesus menjawab ngan buik, " Setiap tenaman nyo hopi detandur oleh Bepak-Ke nyo de serga nak decabut sampoi ke akor-akornye. ¹⁴ Biarlah mike. Mike adolah pemapa- pemapa deri urang-urang buta. Ngan, munye urang buta memapa urang buta, keduanye akan titek kedelom lubang." ¹⁵ Petrus buik ngan Enye," Jelaskolah perumpamoon iye kenempat kamie." ¹⁶ Yesus buik, " mengka kowe masih bolum paham jugo ? ¹⁷ Ibo kowe hopi tereti bahwa segelo sesuatu nyo masuk kedelom mulut nak turun keporut ngan decampok ke delom jamban ? ¹⁸ Cuma hambuk, ape nyo keluor deri mulut timbul deri hati, ngan iyelah nyo menajisko urang. ¹⁹ Ulenyo deri hati timbul pekeron-pekeron jahat, pembunuhon, perzinahon, doso-doso seksual, ngan fitnah. ²⁰ Hal-hal nielah nyo menajisko urang, cuma makon hopi membesuh tangon hopi menajisko urang." (Yesus Menolong Betina Kanaan) ²¹ Mengka, Yesus bejelon jak sane ngan menyengker ke daerah Tirus ngan Sidon. ²² Ngan, seurang betina Kanaan nyo berasal jak daerah iye njongok ngan beseru," Kasihanilah Ake, Tuhan, Anak Daud ! Anak Betinake keserumon roh jahat sajo karo." ²³ Cuma hambuk, Yesus hopi nyimbot betina iye, sikuk kehatopun. Ngan, murid-murid-Nye njongok ngan mendesak-Nye, ujo mike," Suruhlah nye bejelon ulenyo nye terus-menerus mekek de belakong kite." ²⁴ Mengka, Enye menjawab ngan buik," Ake anyo deutus kenempat domba-domba nyo sayou jak umat Israel." ²⁵ Mengka, betina iye njongok ngan sujud de hadopon Yesus, ujonye, " Tuhan, tolunglah ake !" ²⁶ Cuma, Yesus menjawab ngan buik, " Hopi beik mengambek roti milik anak-anak ngan nohukkonye kenempat anjing-anjing." ²⁷ Betina iye menyimbot, " Bonor, Tuhan, cuma anjing-anjing iye makon remah-remah nyo titek jak meja tuannye." ²⁸ Mengkah, Yesus buik ngan enye," Hai betina, imanme godong ! terjedilah dengan kowe upanyo kou amatko." Tekalo saat iye jugo, anak betinanye desembuhko. (Yesus Menyembuhko Lobot Urang) ²⁹ Yesus bejelon jak sane, menyusuri topi denou Galilea. Ngan, sesodah menoek kepucuk buket, Enye duduk de sane. ³⁰ Mengkah, kerumunon godong urang njongok kenempat Enye, ngunda urang-urang lumpuh, cacat, buta, bisu, ngan urang lobot loinnye. Mengka, mike membarengko urang-urang iye de kaki Yesus ngan Enye menyembuhko mike, ³¹ sehinggo urang lobot iye teheran-heran tekalo mike ngoleh nyo bisu pacok buik, nyo cacat de pulihko, nyo lumpuh bejelon, ngan nyo buta ngoleh. Ngan, mike memuliako Allah Israel. (Yesus Membori Makonon Kepodo Lobih deri Empat Ribu Orang) ³² , Mengka, Yesus memantou murid-murid-Nye ngan buik," Ake bebelos kasihan terhadop urang-urang iye ulenyo mike soda bersamo-Ke selamo tiga hari ngan hopi mempunyoi makonon. Ngan, Ake hopi endok nyuruhko mike ngulang kelaporon enggak konyo mike hopi pingsan delom pejelonon." ³³ Mengka, para murid bekehato kepodo-Nye," Jak mone kite depot roti nyo lobot detempat sunyi nie mengonyongko urang sajo lobot nie." ³⁴ Yesus betanyo ngan mike," Berapo lobot roti nyo kou punyo ?" ³⁵ Mengka, Yesus memerentahko urang lobot iye duduk de tanoh. ³⁶ Mengka, Enye mengambek tujuh roti serta ikan-ikan iye. Ngan, sambel mengucap syukur, Enye memacah-macahkonye, ngan memborikonye kenempat murid-murid-Nye, ngan murid-murid-Nye memborikonye kenempat urang lobot iye. ³⁷ Mike segelo makon ngan dekonyongko. Mengka, mike mengambek totokon-totokon nyo sisa, ado tujuh keranjang ponuh. ³⁸ Mike nyo makon ado empat ribu urang jenton, hopi temasuk betina ngan budak-budak. ³⁹ Sesudah menyuruh urang lobot iye ngulang, Yesus masuk ke biduk ngan bejelon kedaerah Magadan.