( Yesus Menyombuhko Seurang Pelayan Perwira) ¹ Setelah Yesus menyodahi segelo pekehatoon-Nye dedepan urang lobot, Enye masok ke Kapernaum. ² Desane, ado seurang perwira Romawi nyo memileki anak buah nyo deregainye. Anak buah iye sedang saket karas ngan hamper teelek. ³ Tekela perwira iye mendongor tentang Yesus, enye mengotos beberape tetuha Yahudi menomui Yesus ngan meninta Enye jongok untok menyombuhko pelayannyo iye." ⁴ Sat urang- urang iye jongok kepado Yesus, rombongon iye songgoh- songgoh memohon kepado-Nye. Ujo rombongon iye, Urang nie layak mendepot pertolungon -Me, ⁵ Sabab enye mengasehi bengso kite ngan enyelah nyo membengun sinagoge bage kite." ⁶ Bejelonlah Yesus besamo rombongon iye. Tekela Enye sodah parok ke rumah perwira iye, perwira iye mengotos beberape kantinye untok bekehato kepado Yesus, " Tuan, jengon Kowe menyusahko diri untok ke sabab ake hopi layak menerimo-Me de rumahke. ⁷ Iyelah sababnye, ake dewek meraso hhopi layak untok jongok kepado_me. Hambok sebeleknye, ucapkolah sepato kehato bae, mako pelayanke peseti nak sombuh. ⁸ Sabab, ake jugo seurang bewohonnyo membewoi prajuret- prajuret. Munye ku kehatoko kepado seurang prajure, ' bejelonlah!,'enyepun bejelon. Munye kukehatoko kepado prajuretnyo loen, ' jongoklah!', enyepun jongok. Ngan, munye kukehatoko kepado anak buahke,' lakukolah nie!', anak buahke nak melakukonye." ⁹ Tekela Yesus menongor hal iye, Enye meraso heranakan perwira Romawi iye. Sambel bepaleng kepado urang lobot nyo mehilui-Nye, Enye bekehato, " Ake bekehato kepadome, bahkon deentaro urang Israel pun Ake bolum perenah menomuko iman segodong nie." ¹⁰ Saat rombongon nyo de utos kepado Yesus belek ke rumah perwira iye, enye mendopotko anak buahnye sodah sombuh. ¹¹ Pepagi arinye, Yesus bejelon ke sebuah kota benamo Nain besamo mured-Nye ngan rombongon urang lobot nyo mehilui-Nye. ¹² Tekkela Enye memaroki pintu gerebang kota, ado buntang seurang jenton nyo de pikol keluor. urang nyo teelek iye adolah anak tunggal jak indoknye nyo sodah jendo. Ngan, ado lobot urang jak kota iye nyo besamo-samo betina iye. ¹³ Tekela Tuhan ngelek betina iye, Tuhan bebelaskasehon kepadonye ngan bekehato," Jengon meratop." ¹⁴ Kemudion, Enye memaroki ngan menyontuh tandu buntang iye. urang- urang nyo memanggol tandu iyepun berenti. Lalu, Yesus bekehato," Hai urang muda, Ake bekehato kepadome, jegolah!" ¹⁵ Kemudion, urang nyo tadie teelek iye dodok ngan mulai boek. Ngan Yesus membelekkonye kepado indoknye. ¹⁶ Segelo urang nyo ngelek hal iye deponohi raso takot lalu mulai memuji Allah ngan bekehato," Seurang nabi godong lah moncol de tangah-tangah kite!" ngan " Allah lah memeliharo Umat-Nye." ¹⁷ Ngan, berita tentang Enye menyebar kesegelo Yudea ngan kesegelo daman loen desekitarnye. ¹⁸ Moured-mored Yohanes gerako kepado Yohanes tentang segelo hal iye. ¹⁹ Lalu, Yohanes memantou dua urang morednye ngan mengotosnye kepado Tuhan untok betanyo," Kowekah nyo nak jongok iye?Apo, haroskah kami menungguko nyo leon?" ²⁰ Tekela rombongon jongok kepado Yesus, rombongon iye bekehato," Yohanes Pembaptis menyuruhko kamie untok jongok kepado-Me ngan betanyo,'Kowekah nyo nak jongok iye? Apo, haroskah kamie menungguko nyo loen?"" ²¹ Pado saat iye, Yesus sedang menyombuh ko lobot urang jak bebagoi penyaket, wabah, ngan roh- roh jahat. Enye jugo mengaruniako pengelekon kepado lobot urang buta. ²² Jewob Yesus kepado dua urang iye, " bejelon ngan ceritokolah kepado Yohanes tentang ape nyo lah kowe kelek ngan dongor: urang buta paco ngelek, urang lompoh pacok bejelon, urang saket kusta detaherko, urang pokok pacok mendongor, urang mati debangketko, ngan kepado urang mesken deberitako kabar beik. ²³ Ulehnyo iye, besenang hatilah enye nyo hopi tesandung uleh-Ke." ²⁴ Stelah otoson- otoson Yohanes bejelon, Yesus boek kepado urang lobot tentang Yohanes, " Untok ngelek apekah kowe bejelon kepadang belantaro? ngelek boloh nyo detiop angen? ²⁵ hambok, apenyo kowe kelek? urang bebeju belagak? keleklah, urang nyo memakoi beju beik ngan hidop delom kemewahon adonye de istana- istana rajo. ²⁶ Jedi, ape nyo kowe kelek? Seurang bani? Ao, Ake bekehato kepadome, bahkon lobeh jak seurang nabi. ²⁷ Enyelah urangnye, nyo tentangnye ado tetoles: ' Dongorlah ! Ake menyuruh otuson-Ke mendohului Kowe. Enyelah nyo nak mempersiapko jelon de hadopon-Me.'Maleakhi 3: 1 ²⁸ Ake bekehato kepadome, de antaro segelo urang nyo perenah delaherko uleh betina, hopi ado seurangpun nyo lobeh godong jak Yohanes, Hambok sebeleknye, nyo paleng kecik delom kerajaon Allah, lobeh godong jak enye." ²⁹ Tekela urang lobot ngan pengompol pajak mendongor hal nie, rombongon mengakui keadilon Allah uleh rombongon lah de baptes dengan bapteson Yohanes. ³⁰ Hambok sebeleknye, urang- urang Farisi ngan ahli-ahli Taurat menulak rencana Allah tehadop dirinye uleh rombongon iye bolum debaptes uleh Yohanes. ³¹ " Dengan apekah Ake mengumpamako urang- urang nyo hidop pado generasi nie? upa apekah mike iye? ³² Mike adolah upa budak- budak nyo dodok dodok de pasar, nyo bepokeon seurang ngan nyo loen,' kamie meniup soleng untokme, hambok kowe hopi menari. Kami menyanyiko lagu sedeh, hambok kowe hopi meratop.' ³³ Sabab, tekalo Yohanes Pembaptis jongok ngan hopi makon roti apo minom anggor, kowe bekehato,' Enye kerasokan belis.' ³⁴ Hambok sebeleknye, tekalo Anak Mendesio jongok makon ngan minom, kowe bekehato,' Kolehlah! Enye seurang nyo rakos ngan peminom! Enye jugo kanti para pengompol pajak ngan urang- urang bedoso!' ³⁵ Hambok sebeleknye, hikmat debonorko uleh anak-anaknye." ³⁶ Tekalo iye, ado s urang seseurang jak golongon Farisi nyo mengundang Yesus untok makon besamo-Nye. Yesus bejelon kerumah urang Farisi iye ngan dodok makon. ³⁷ De kota iye, ado seurang betina bedoso. Tekalo enye mengetahui behwa Yesus e sedang makon de rumah urang Farisi iye, enye pun memboli sebuah gudu pualam nyo beisi minyak wangi. ³⁸ Lalu, enye togok de belakong Yesus, parok kaki-Nye, sambel meratop ngan mulai membesoh kaki Yesus dengan aek matonye ngan mengusopnye dengan rambotnye. Setelah iye, enye menciom kaki Yesus ngan mengurapinye dengan minyak wangi. ³⁹ Tekalo urang Farisi nyo mengundang Yesus ngelek hal nie, enye bekehato delom hati," Munye urang nie seurang nabi, Enye tentu siape ngan betina macom ape nyo menyontuh-Nye iye sabab betina nie adolah seurang pendoso." ⁴⁰ Yesus menanggapi ngan bekehato, " Simon, ado nyo nak kehatoko kepadome." Simbot Simon, " Kehetaokolah, Guru" ⁴¹ Yesus bekehato," Ado dua urang nyo behutang kepado sesurang pelapas doet, nyo seurang behutang 500 dinar ngan nyo loennye behutang 50 dinar. ⁴² Tekalo keduanye hopi sanggop membayar, si pelapas doet iye menghaposko hutang urang bedua iye. Kinie, siapekah de entaro kedua urang iye nyo nak lobeh mengasehi si pelapas doet iye?" ⁴³ Simbot Simon, " Menorotke, urang nyo paleng lobot debebasko hutangnye." Yesus bekehato kepadonye, " Kowe menilainye dengan bonor." ⁴⁴ Sambel bepaleng kepado betina iye, Yesus bekehato kepado Simon," Apekah kowe ngelek betina nie? Tekalo Ake jongok ke rumahme, kowe memboriko aek untok membesoh kaki-Ke, hambok enye membesoh kaki-Ke dengan aek matonye ngan mengsopnye dengan rambotnye. ⁴⁵ Kowe hopi membori-Ke ciumon, hambok enye hopi berenti menciom kaki-Ke sejak Ake masuk. ⁴⁶ Kowe hopi mengurapi kepalo-Ke dengan minyak, hambok enye meminyaki kaki-Ke dengan minyak wangi. ⁴⁷ Ulenyo iye, Ku kehatoko kepadome, dosonye nyo lbot iye sodah de amponi sabab enye menunjoko kaseh nyo godong. Hambok sebeleknye, urang nyo sediket deamponi, sediket pula mengasehi." ⁴⁸ Lalu Yesus bekehato kepado betina iye, " Dosome sodah deamponi." ⁴⁹ Urang -urang lobot nyo dodok makon besamo Yesus mulai betanyo- tanyo delom hati rombongon iye," Siapekah Urang nie sehinggo Enye pacok mengamponi doso?" ⁵⁰ Yesus bekehato kepado betina iye," Imanme lah menyelamatkome, bejelonlah dengan damai."