( Pelayanon Yohanes Pembaptis) ¹ Pado tahon kelima belas maso pemerentahon Kaisar Tiberius, tekela Pontius Pilatus menjedi gubernur Yudea, Herodes menjedi rajo Galilea; Filipus dolor Herodes menjedi rajo wilayah Iturea ngan Trakhonitis; ngan Lisanias menjedi rajo Abilene, ² Hanas ngan Kayafas menjabat sebagoi imam agung, jongok lah firman Allah kepado Yohanes, anak Zakharia, nyo tinggal de padang belantaro. ³ Mangko, bejelon lah Yohanes kesegelo daerah de sekitar Yordan ngan memberitako baptison pertobaton untuk pengampunon doso, ⁴ Upa nyo tetoles de delom kitab Nabi Yesaya: " Niye lah suaro urang nyo belolungon de padang belantaro, ' Siap ko lah jelon bage Tuhan, luros kolah jelon bage-Nye. ⁵ Setiop daman tembah nak de timbun, ngan setiop gunong ngan buket nak de ratoko. Jelon nyo beliku-liku nak de lurosko, ngan setiop jelon nyo hopi rato nak de mulus ko. ⁶ Ngan, segelo urang nak ngelek keselamaton jak Tuhan!""Yesaya 40: 3-5 ⁷ Lalu, Yohanes berkehato kepado urang lobot nyo jongok untok de baptis ulehnyo, " Hai, kowe keturunon Ulor beludak! siape nyo memperingot ko me untuk melariko diri jak murka nyo nak jongo ? ⁸ Uleh karena iye, hasel ko buah- buah nyo menunjok ko pertobatan me. Jengon berkehato kepado diri me dewek,' Abraham iyelah nenek moyang kami!' Ake berkehato kepado me, sesunggohnye jak betu- betu niye Allah pacok membangket ko budak- budak bage Abraham! ⁹ Bahkon, mulai kinie kapak sodah de potek ko de akor betong kayu. Setiop betong kayu nyo hopi menghasel ko buah nyo beik nak de tobong ngan de tohu ko ke delom api." ¹⁰ Urang- urang bertanyo kepado Yohanes, " Munye memunye, ape nyo haros kmai lakuko?" ¹¹ Enye menjewob, " Setiop urang mempunyoi dua beju, enye haros membagenye ngan urang nyo hopi mempunyoi. Ngan, setiop urang nyo mempunyoi makonon, haros melakuko hal nyo samo." ¹² Beberape pengompol pajak jugo jongok untuk de baptis. Beroyot iye bertanyo kepado Yohanes pembaptis, " Guru, ape nyo haros kami lakuko?" ¹³ Yohanes memberitahu ko enye," Jengon menarek pajak lobeh jak nyo lah de tetap ko bage me." ¹⁴ Beberape tentera bertanyo kepadonye, " upamone ngan kamie? Ape nyo haros kami lakuko?" Yohanes berkehato berkehato kepado nye, " Jengon meminta duit jak siape pun secaro pakso apo ngan todohon pelsu. Cokop ko lah diri me ngan gaji me." ¹⁵ Tekela iye segelo urang sedang meharop ko kedetongon Mesias, beroyot iye segelo bertanyo- tanyo delom hati tentang Yohanes, apekah enye Kristus apo bukon. ¹⁶ Yohanes menjewob enye ngan berkehato, " Ake membaptis kowe ngan aek. Hambok, seseurang nyo lobeh berkuaso jak ake nak jongok. Untuk membuka ko tali sandal-Nye pun ake hopi layak. Enye nak membaptis kowe ngan Roh Kodos ngan api. ¹⁷ Alat penampi sodah ado de tagon-Nye untuk membereseh ko lantoi pengirekon ngan untuk mengompol ko gendum nyo beik kedelom lumbung-Nye. Hambok, enye nak nunuko sekam kedelom api nyo hopi nak padom." ¹⁸ Dengan lobot nasehat nyo loen, Yohanes mengajor ko Injil kepado lobot urang. Yohanes Pembaptis de penjarako ¹⁹ Hambok, ulenyo Yohanes menogur Herodes, rajo wilyah, atas hal nyo lah delaku konye dengan Herodias, bini dolor Herodes, nagn ulehnyo segelo hal jahat nyo lah delakuko nye, ²⁰ mangko Herodes menambohko niye atas segelo nye dengan memasok ko Yohanes kedelom penjara. ²¹ Tekelah segelo urang debaptis, Yesus jugo debaptis. Ngan, tekela Enye berdoa, langet tebuka, ²² ngan Roh Kodos toron ke atas-Nye delom wujod borong dero. Lalu, ado suaro jongok jak langet ngan berkehato, " Kowe lah Anak-Ke nyo kukasehi. Kepado-Me lah Ake bekehenan" ²³ Tekela Yesus memulai pelayanon-Nye, Enye beromor kiro- kiro tiga poloh tahun. Urang- urang bependepot behwa Yesus adolah anak Yusuf. Yusuf anak Eli. ²⁴ anak Matat. Matat Lewi. Lwei anak Malkhi. Malkhi anak Yanai. Yanai anak Yusuf. ²⁵ Yusuf anak Matica. Matica anak Amos. Amos anak Nahum. Nahum anak Nagai. ²⁶ Nahum anak Maat. Maat anak Matica. Matica anak Simei. Simei anak Yosekh. Yosekh anak Yoda. ²⁷ Yoda anak Yohanan. Yohanan anak Resa. Resa anak Zerubabel. Zerubabel anak Sealtiel. Sealtiel anak Neri. ²⁸ Neri anak Malkhi. Malkhi anak Adi. Adi anak Kosam. Kosam anak Elmadam. Elmadam anak Er. ²⁹ Er anak Yesua. Yesua anak Eliezer. Eliezer anak Yorim. Yorim anak Matat. Matat anak Lewi. ³⁰ Lewi adolah anak Simeon. Simeon anak Yehuda. Yehuda anak Yusuf. Yusuf anak Yonam. Yonam anak Elyakim. ³¹ Elyakim anak Melea. Melea anak Mina. Mina anak Matata. Matata anak Natan. Natan anak Daud. ³² Daud anak Isai. Isai anak Obed. obed anak Boas. Boas anak Salmon. Salmon anak Nahason ³³ Nahason adolah anak Aminadab. Aminandab anak Admin. Admin anak Arni. Arni anak Hezron anak Peres. Peres anak Yehuda. ³⁴ Yehuda anak Yakub. Yakub anak Ishak. Ishak anak Abraham. Abraham anak Terah. Terah anak Nahor. ³⁵ Nahor anak Serug. Serug anak Rehu. Rehu anak Peleg. Peleg anak Eber. Eber anak Salmon. ³⁶ Salmon anak Kenan. Kenan anak Arpkhsad. Arpakhsad anak Sem. Sem anak Nuh. Nuh anak Lamekh. ³⁷ Lamekh anak Metusalah.Metusalah anak Henokh. Henok anak Yared. Yared anak Mahalaleel. Mahalaleel anak Kenan. ³⁸ Kenan anak Enos. Enos anak Set. Set anak Adam. Adam adolah anak Allah.