( Rencana untok membunoh Yesus) ¹ Ari Rayo Roti hopi Beragi nyo desobut ari Paskah sodah parok. ² Imam- imam kepalo ngan ahli- ahli Taurat mendeloki caro untok membunoh Yesus, ulehnyo rombongon iye takot terhadop urang lobot. ³ Kemudion, masoklah belis kedelom Yudas, nyo desobut Iskariot. Enye adolah salah sikuk jak kedua belas mored. ⁴ Mangko, bejelonlah Yudas lalu berundeng dengan imam-imam kepalo ngan pengawal Bait Allah tentang upamone enye pacok menyerahko Yesus kepado rombongon iye. ⁵ Ngan, beroyot iye agom ngan sepakat untok memborinye doet. ⁶ Mangko, Yudas setuju ngan mulai mendeloki kesempaton untok menyerahko Yesus kepado rombongon iye saat hopi ado urang lobot. ⁷ Kemudion, tibalah ari rayo roti hopi Beragi, iyelah saat untok mempersembahko anak domba paskah. ⁸ Pado waktu iye, Uesus menyuruh Petrus ngan Yohanes, ujo-Nye, " Bejelonlah ngan persiapkolah makonon paskah untok kte makon." ⁹ Ujo rombongon iye kepado Yesus, " Demonekah Kowe endok empoknyo kami mempersiapkonye?" ¹⁰ Simbot Yesus kepado rombongon iye, " Tekalo kowe sodah masok ke kota, kowe akan betomu dengan seurang jenton nyo ngundah kendi; hiluilah enye kerumah nyo akan demasokinye, ¹¹ ngan kehatokolah kepado tuan rumah iye, ' Guru bertaanyo kepadome: Demonekah ruang tamu deman Ake pacok makon Paskah besamo mored- mored-Ke?' ¹² Mangko, enye akan menunjuko kepadome sebuah ruangon godong delantoi pocok,, nyo perabotonnye sodah siap. Persiapkolah makonon untok kite desane." ¹³ Lalu, Petrus besamo Yohanes bejelon ngan mendepoti segelonye upanyo dekehato Yesus ngan rombongon iye pon mempersiapko makonon Paskah. ¹⁴ Tekalo sudah tiba waktunye, Yesus ngan padong rasol dodok makon desekelileng meja. ¹⁵ Kemudion, Yesus bekehato kepado rombongon iye, " Ake sajo endok makon hidangon Paskah nie besamo mike, sebolum Ake menderita. ¹⁶ Sabab Ake bekehato kepadome, Ake hopi akan memakonnye lagi sampoi hal nie degonopi delom Kerajaon Allah." ¹⁷ Lalu, Yesus mengambek cangker berisi anggor ngan mengucap syukur, kemudion bekehato, " Ambeklah cangker nie ngan bagekolah deantaro mike. ¹⁸ Sabab, Ake bekehato kepadome behwa mulai kinie Ake hopi akan minom anggor sampoi Kerajaon Allah jongok. " ¹⁹ kemudion, Yesus mengambek roti ngan mengucap syukur, Enye memacah-macahko roti iye ngan memborikonye kepado rombongon iye sambel bekehato, "Roti nie adolah badan-Ke nyo deboriko kepadome lakukolah nie sebagoi peringoton akan Ake." ²⁰ Demikionlah jugo, setelah makon, Yesus mengambek cangker anggor ngan bekehato, " Cangker nyo detuangko bageme nie adolah perjenjion beheru delom deroh-Ke ²¹ Hambok sebeleknye, keleklah yangon uraang nyo akan menyerako Ake ado bersamo dengan Ake demaja nie. ²² Sabab, Anak Mendesio akan bejelon dengan caro upa nyo sodah detetapko, hambok celakolah urang nyo menyerahko Enye!" ²³ Mored- mored-Nye betanyo sikuk saamo loen tentang siape deantaro rombongon iye nyo akan melakukonye. ²⁴ Pertengkaron jugo tejedi deantaro rasol tentang siapekah de antaro rombongon iye nyo deanggap paleng godong. ²⁵ Hambok sebeleknye, Yesus bekehato kepado rombongon iye, " Rajo- rajo bengso nyo hopi mengenal Tuhan berkuaso atas rakyatnye, ngan urang- urang nyo bekuaso atas rajo -rajo iye desobut' Pelindung Rakyat'. ²⁶ Hambok, kowe jengon upa iyoi. sebeleknye, nyo paleng godong deantaro kowe haros bertindak upa nyo paleng muda, nan pemempen haros upa pelayan. ²⁷ Siape nyo lobeh godong, urang nyo dodok makon atau nyo melayani? Bukonkah urang nyo dodok makon? Hambok, Ake ado de tangahme sebagoi urang nyo melayani. ²⁸ Kowe adolah urang- urang nyo tetap bersamo-Ke delom pencobaon- pencobaon-Ke. ²⁹ Ulehnyo iye, Ake memboriko kepadome sebuah kerajaon upa nyyo deboriko Bepa-Ke kepado_Ke, ³⁰ empoknyo kowempacok makon ngan minom semeja dengan-Ke delom Kerajaon -Ke. Ngan , kowe akan dodok deantaro tahta untok menghakemi keduabelas suku Israel." ³¹ " Simon dongorkolah Ake. Belis, menuntut untok menampi kowe upa gendum, ³² hambok Ake sodah bedoa untokme empoknyo kowe bertobat, kuatkolah dolor- dolorme." ³³ Hambok, Petrus bekehato kepado Yesus, " Tuhan, ake siap depenjara bahkon mati serempok-Me!" ³⁴ Simbot Yesus kepadonye," Ake bekehato kepadome, Petrus, sari nieahyom jenton hopi akan bekokok sebolum tiga kali kowe menyangkal behwa kowe mengenal Ake." ³⁵ Kemudion, Yesus betanyo kepado mored-mored, " Tekalo Ake mengotos kowe tanpa kantong doet, tas, atau sandal, apekah kowe kekuragon sesuatu?" Simbot rombongon iye, " Hopi." ³⁶ Ujo-Nye kepado rombongon iye, " Hambok kinie, siapepon nyo mempunyoi kantong doet atau tas, undahlah. Ngan, siape nyo hopi mempunyoi pedang, uyulah enye menjual jubahnye, ngan memboli pedang. ³⁷ Sabab, Akr bekehato kepadome, behwa ape nyo tetoles delom Kitab Suci nie haros degonopi de delom Ake, ' Enye akan tehitong bersamo urang- urang bedoso. ' Yesaya 53: 12 Sabab, nyo tetoles tentang Ake sedang tejedi kinie." ³⁸ Lalu rombongon iye bekehato, " Keleklah Tuhan, desie ado pedang, ". Ngan, Yesus bekehato kepado rombongon iye, " Iye cokop." ³⁹ Kemudion, Yesus keluor ngan bejelon upa ke Buket Zaitun upa nyo biaso delakuko-Nye, ngan mored-mored-Nye jugo bejelon mehilui Enye. ⁴⁰ tekalo Yesus sampoi de deman iye, Enye bekehato kepado rombongon iye, " Bedoalah empoknyo kowe jengon masok ke delom pencobaon." ⁴¹ Kemudion, Yesus bedoa dedewekon jak rombongon iye kiro- kiro sejouh sepenohuon betu, alalu belotot ngan bedoa, ⁴² " Bepa, munye Kowe endok, ambeklah cawan nie jak- Ke. Hambok sebeleknye, jengonlah kehendok-Ke nyo yejedi, meloenko kehendok-Me." ⁴³ Setelah iye, seurang meleikat jak sorga menampako diiri kepado-Nye ngan menguatko-Nye. ⁴⁴ Ngan, delom penderitaon-Nye, enye bedoa lobeh songgoh- songgoh lagi; poluh-Nye menjadi upa teteson deroh nyo menet]es ke tanoh. ⁴⁵ Tekalo Yesus selesai bedoa, Enye bejelon kepado mored- mored-Nye ngan mendepoti rombongon iye sedang tidor ulehnyo besedeh. ⁴⁶ Yesus bekehato kepado rombongon iye, " Mengka kowe tidor? Jego ngan bedoalah empoknyo kowe jengon masok ke delom pencobaon." ⁴⁷ Tekalao Yesus lagi boek, jongoklah serombongon urang, ngan enye nyo desobut Yudas, salah sikuk jak keduabelas mored iye, memempen rombongon iye. Lalu Yudas memaroki Yesus untok menciom-Nye. ⁴⁸ Hambok sebeleknye Yesus bekehato kepadonye, " Yudas, apekah kowe menyerahko Anak Mendesio dengan ciomon?" ⁴⁹ Tekalo mored- mored nyo togok desekelileng-nye ngelek ape nyo akan tejedi, rombongon iye bekehato, " Tuhan, haroskah kamaie menyerang dengan pedang?" ⁵⁰ Kemudion, salah sikuk jak padong mored iye menyerang pelayan imam Agung hinggo menabas telinga kanonnye. ⁵¹ Hambok sebeleknye, Yesus bekehato, " Sodah, cokop" Lalu, Yesus menjamah telinga pelayan iye ngan menyombuhkonye. ⁵² Kemudion, Yesus bekehato kepado imam-imam kepalo pengawal Bait Allah, ngan tuha- tuha nyo jongok untok menagkop-Nye, " Mengka kowe segelo jongok dengan pedang ngan pentungon sekan- akan endok menangkop perampok? ⁵³ Tekalo Ake bersamome de Bait Allah setiap ari, kowe hopi menangkop Ake. Hambok, nielah saatnye bageme ngan bage kuaso jahat," ⁵⁴ Setelah menangkop-nye, urang- urang iyepon mengireng ngan undah Yesus ke rumah imam godong. Hambok sebeleknye, Petrus mehilui rombongon iye jak jouh ⁵⁵ Ngan setelah urang- urang iye memaroko api de tangah- tangah lamon ngan dodok bersamo- samo, Petrus jugo dodok deantaro rombongon iye. ⁵⁶ Hambok, seurang pelayan betina nyo ngelek Petrus dodok de parok perapion iye memperhatiko muka Petrus llau bekehato, "Urang nie jugo bersamo dengan-Nye." ⁵⁷ Hambok sebeleknye, ujonye, "Hai betina, ake hopi mengenal Enye." ⁵⁸ Hopi lamo kemudion, seurang nyo loen negeleknye ngan bekehato, "Kowe jugo temasok salah sikuk jak rombongon iye!" Hambok Petrus bekehato, "Hopi, ake bukon salah sikuk jak rombongon iye!" ⁵⁹ Kiro- kiro sejam kemudion, seurang nyo loen lagi bekehato deengan yakin, " Peseti urang nie jugo besamo dengaan_nye,sabab enye jugo urang Galilea. " ⁶⁰ Hambok sebeleknye, Petrus bekehato, Ake hopi tahuko ape nyo kowe boeko e!" Saat iye jugo selagi Petrus lai boek, bekokok lah hayom jenton. ⁶¹ Lalu, bepalenglah Yesus ngan ngelalo Petrus. Ngan, Petrus teringot akan pekehatoon Yesus, behwa Enye belehato kepadonye, " Sebolum hayom jenton bekokok sarinie, kowe sodah menyangkal Ake selobot tigakali." ⁶² Kemudion Petrus bejelon keluor ngan meratop dengan sajo sedeh. ⁶³ Urang- urang nyo menahan Yesus mulai mehimak ngan ngepoki-Nye. ⁶⁴ Rombongon iye menotop mato-nye ngan bekehato, " Bernubuatlah! Siape yo ngepoki Kowe?" ⁶⁵ rombongon iye jugo mengehatoko lobot hal loen nyo menentaang-Nye dengan menhimak-Nye. ⁶⁶ Pepagi arinye, tuha-tuha pemempen Yahudi, imam- imam kepalo, sereta ahli-ahli Taurat bekompol ngan ngundah Yesus ke Mahkama Agama rombongon iye. ⁶⁷ Rombongon iye bekehato, " Munye Kowe adolah Mesias, kehatokolah kepado kamie." Hambok Yesus bekehato kepado rombongon iye, " Munye Ake melabehkome, kowe hopi akan percayo kepado-Ke. ⁶⁸ Ngan munye Ake betanyo kepadome, kowe hopi akan menyimbot. ⁶⁹ Hambok sebeleknye, mulai kinie Anak mendesio akan dodok de sebelah kanon Allah Nyo Mahakuaso." ⁷⁰ Rombongon iye segelo bekehato, " Munye memunye, apekah Kowe Anak lAllh?" Yesus menyimbot rombongon iye, " Kowe lah nyo mengehatoko behwa Akelah Enye." ⁷¹ Kemudion rombongon iye bekehato, " Kesaksion ape lagi nyo kite butuhko? Kite sodah mendongornye dewek jak molot-Nye!"