( Kemunafikon Pemempen Yahudi) ¹ Sementaro iye, tekalo ado ribuon urang bekompol ngan rombongon iye saleng menijak, Yesus mulai boek kepado mored yelobeh dehulu," Behati- hatilah tehadop urang- urang Farisi, iyelah kemunafikon. ² Sabab, segelo nyo tetotop nak debuka ngan segelo nyo tekerawo nak denyatoko. ³ Ulehnyo iye, ape nyo kowe kehatoko dedelom kolom nak tedongor dedelom tarang ngan nyo kowe beseko de delom kamar nak deberitako depocok hatop - hatop rumah. ⁴ Ake mengehatoko kepadome, hai kekelungon- Ke, Jengonlah takot kepado rombongon nyo pacok membunoh badan, hambok sesodah iye hopi pacok bebuat lobeh jouh lagi. ⁵ Hambok, Ake nak mengingotkome tentang siape nyo haros kowe takoti; takotlah kepadoNye nyo setelah membunoh jugo bekuaso menohuko kowe kedelom nerako. Ao, Enyelah nyo haros kowe takoti. ⁶ Bukonkah 5 ikuk borong pipet dejual hanyo serega 2 kepeng bae? Hambok, hopi seikukpon jak borong - brurng iye nyo delupako dehadopon Allah. ⁷ Bahkon, Jemelah rambot dekapalomepon tehitong. Jengonl takot, kowe jouh lobeh berega jak lobotnyo borong pipet." ⁸ Ake bekehato kepadome, setiap urang nyo mengakui Ake dehadopon urang loen, jugo akon deakui uleh Anak mendesio dehadopon meleikat- melaikat Allah. ⁹ Hambok sebeleknye, setiap urang nyo menyangkal Ake dedepan urang loen jugo akaon desangkal dehadopon meleikat-meleikat Allah. ¹⁰ Ngan, siapepon nyo mengehatoko sesuatu nyo melawon Anak mendesio paccok deamponi, hambok siapepon nyo mehimak Roh Kodos hopi pacok deamponi. ¹¹ Tekalo rombongon ngundah kowe ke sinagoge ngan kehadipon padong pemempen ngan penguaso , jengon kuater tentang upamone membela awok e apo ape nyo haros kowe kehatoko. ¹² sabab, saat iye jugo Roh Kodos nak mengajorime tentang ape nyo haros kowe kehatoko." ¹³ Seurang jak entaro urang lobot iye bekehato kepado Yesus, : Guru, suruhlah dolor- dolorke untok bebage wareson dengan ke." ¹⁴ Hambok sebeleknye, Yesus bekehato kepadonye," Dolor, siape nyo mengaangkot Ake menjedi hakem apo pengentaro atasme?" ¹⁵ Kemudion, Yesus bekehato kepado rrombongon iye, " Bejego- jegolah ngan waspadalah atas segelo bentuk keserakahon uleh hidop seseurang hopi tegentong pado lobotnye reto nyo enye punyoi." ¹⁶ Lalu, Yesus menceritoko sebuah perumpamaon kepado rombongon iye," Ado tanoh urang sajo sogeh tuanye nyo mehaselko sajo lobot hasel tuoion. ¹⁷ Jedi, urang iy bepeker delom hatinye,' Ape nyo haros kulakuko ulehnyo ake hopi mempunyoi deman rengkiang untok menyimpan hasel tuoionke?' ¹⁸ Ngan, enye bekehato,' Nielah nyo nak kulakuko. Ake nak membongkar rengkiang- rengkiangke ngan membuat nyo lobeh godong. Desane, ake nak menyimpan segelo gendum ngan barang- barangke. ¹⁹ Lalu, ake bekehato kepado jiwoke,' Hai jiwokw, kowe memunyoi lobot barang nyo tesimpan untok betahon- tahon, berentilah makon, minom, ngan besenang- senanglah!' ²⁰ Hambok, Allah bekehato kepado urang iye, ' Hai, urang bodoh! malom nie jugo, jiwome nak deambek jak me. Lalu, siapekah nyo nak mempunyoi barang- barang nyo kowe simpan iye?' ²¹ Demikionlah nyo nak tejedi pado urang nyo menyimpan reto bage awoknyo dewek, hambok hopilah sogeh dehadopon Allah." ²² Yesus bekehato kepado mored- mored-Nye, "Sabab iye, Ake bekehato kepadome, jengon kuater yrntang hidopme, tentang ape nyo nak kowe makon. Apo, minom, kuater tentang badanme, tentang apenyo nak kowe pakoi. ²³ Sabab, hidop lobeh penteng jak makonon ngan badan lobeh penteng jak beju. ²⁴ Keleklah, borong- borong gagak. Enye hopi nugal apo menuoi, enye jugo hopi mempunyoi gudang apo rengkiang, hambok Allah memborinye makon. Kowe jouh lobeh berega jak borong- borong iye. ²⁵ Siapekah deentaro kowe nyo ulehnyo kuater pacok menamboh sehasta bae pado omor hidopnye? ²⁶ Miunye kowe hopi pacok melakuko hal- hal nyo sekeciknie, mengka kowe mengkaterko hal- hal nyo loen? ²⁷ Perhatikolah bunga bakong, upamone enye tomboh. Bunga- bunga iye hopi begawe nenihan apo memintal , hambok Ake mengehatoko kepadome, bahkon Salomo delom kemliaonnyepon hopi bebeju sebelagak salah sikuk jak bunga iye. ²⁸ Munye Allah mendandani rompot dehuma, nyo sari nie tomboh ngan pepagie decampoko kedelom api, hopikah enye nak mendandanime lobeh jak rompot iye? Hai, kowe nyo kurang pecayo! ²⁹ Jedi, jengonlah kowe mendelok ape nyo nak kowe makon apo nyo nak kowe minom, ngan jengonlah mencemaskonye. ³⁰ Sabab, bengso- bengso dedenia deloki iye segelo, hambok Bepame, mengetahui behwa kowe memerlukonye. ³¹ Sebeleknye, deloklah dehulu Kerajaon Allah, mangko segelonye nie jugo detambohko kepadome." Kompolkolah reto desorga ³² " Jengon takot, hai kawonon kecik, ulehnyo Bepame bekenan memboriko kepadome Kerajaon iye. ³³ Jualah segelo nyo kowe punyoi ngan borilah sedekah. Buatlah bageme kantong duet nyo hopi pacok rosak, iuelah reto de surga nyo hopi pacok sayau , nyo hopi pacok deambek maleng ataupon derosak uleh anoi. ³⁴ Sabab, de deman retome ado desanelah hatime berado." ³⁵ " Hendoklah pinggangme tetap tekobot ngan pelita- pelitame tetap marok. ³⁶ Jedilah upa urang- urang nyo menunggu tuannye belek jak sedekah perkawinon empoknyo mike pacok secepatnye membukako pintu bagenye, tekalo tuan iye belek ngan mengetok pintu. ³⁷ Deberkatilah hambo- hambo, nyo dedepoti tuannye besiap sedia, tekalo enye jongok . Ake mengehatoko kepadome, sebonornye, enye nak mengobot pinggangnye untok melayani ngan mempersilahko pelayan- pelayannye unttok dodok makon. Enye nak jongok ngan melayani mike. ³⁸ Munye tuan iye jongok dang de tangah malom apo subuh ngan mendepoti mike dang belaku demikion, deberkatilah mike! ³⁹ Hambok ketahuilah, munye tuan rumah mengetahui jam berape maleng nak jongok rumahnye, enye peseti hopi nak nguyuko rumahnye de bobol. ⁴⁰ Ulehnyo iye, kowe jugo haros selalu besiap sedia ulehnyo Anak mendesio nak jonggok pado saat nyo hopi kowe sangko- sangko." ⁴¹ Kemudion, Petrus betanyo kepado-Nye," Tuhan, apekah Kowe menceritoko perumpamaon nie hanyo kepado kami apo kepado segelo urang jugo?" ⁴² Simbit Yesus, " Siapekah kepalo pelayan nyo setia ngan bijksana nyo depacayoi tuannye untok mengawasi padong hambo nyo loen, untok membori mike makon pado waktunyo pasot? ⁴³ Deberkatilah hambo iye, nyo tekalo tuannye jongok mendepotienye sedang melakuko tugasnye. ⁴⁴ Ake bekehsto kepadome, sesonggohnye, tuan iye nak memileh nye untok mengawasi segelo kepunyoonnye. ⁴⁵ Hambok sebeleknye, munye hambo iye bekehato delom hatinye,' Tuanku hopi nak secepatnye jongok,' ngan mulai ngepoki hambo jenton ngan hambo betina loenye, kemudion makon ngan minom sampoi mabok, ⁴⁶ tekalo tuannye jongok pado waktu nyo hopidesangko- sangko ngan hopi deketahui uleh hambo iye, sang tuan nak membonoh hambo iye, ngan memotekonye besamo dengan urang- urang hopi setia. ⁴⁷ Seurang hambo nyo tahuko kehendok tuannye, hambok hopibesiap sedia apo melakuko sesuoi kehendok tuannye nak mendepot lobot kepokon. ⁴⁸ Hambok, hambo nyo hopi tahuko kehendok tuannye ngan melakuko hal- hal nyo pantas mendepotko kepokon, enye nak mendepotko kepokon nyo lobeh sediket. Setiap urang nyo debori lobot, detontot lobot. Ngan, mike nyo depecayoko lobeh lobot nak detontot lobeh lobot lagi. ⁴⁹ ( Yesus Membuat Pemisahon) Ake jongok untok menohuko api kedenia, ngan Ake beharop api iye lah marok! ⁵⁰ Hambok sebeleknye, ado baptison nyo haros Ake jeloni, ngan Ake meraso sajo tetekan sampoi hal iye degonopi. ⁵¹ Apekah kowe menyangko behwa Ake jongok untok mengundah perdamaion atas behumi? Hopi, Ake mengehatoko kepadome, meloenko perpacahon! ⁵² Mulai kinie, lima urang delom sikuk keluargo nak depisahko. Tiga urang nak melawon dua urang ngan dua urang nak melawon tiga urang. ⁵³ Mike nak depisahko, Bepak melawon anak jentonnye, ngan anak jenton melawon bepaknye. Indok nak melawon anak betinanye, ngan anak betina nak melawwon indoknye. Indok mentuha nak melawon menantu betinanye, ngan menantu betina nak melawon indok mentuhanye," ⁵⁴ Lalu, Yesus bekehato kepado urang lobot, " Tekalo kowe ngelek awan bekompol desebelah barat, kowe secepatnye bekehato," Hujan nak toron,' ngan hujane bonor- bonor toron. ⁵⁵ Tekalo kowe merasoko angen betiop jak selaton, kowe bekehatp.' Sari nie nak sajo hangot,' ngan hal iye bonor- bonor tejedi. ⁵⁶ Kowe urang munafik! kowe pacok menafserko rupo langet ngan behumi, hambok mengka kowe hopi pacok menafserko akher zaman?" ⁵⁷ " mengka kowe dewek hopi pacok memotosko ape nyo bonor? ⁵⁸ Tekalo kowe bejelon besamo mosohme untok menghadop pemerentah, usahakolah untok menyelesaiko masalahme dengannye delom pejelonon empoknyo enye hopi meheretme kepado hakem ngan hakem nak menyerahkome kepado pengawal, ngan pengawal iye nak menohukome kedelom penara. ⁵⁹ Ake bekehato kepadome, kowe nak keluor jak kiyone sebolum kowe membayar hutangme sampoi kepengnyo terakher."