( Penjelason Pendahuluon ) ¹ Sodah ado lobot urang berusaha menyoson sebuah cataton tentang peristiwo- peristiwo nyo lah tejedi de tangah- tangah kite. ² Upah hal nye cataton lah de sampoi kepado kite uleh urang- urang sejak semula lah menjedi saksi mato ngan pemberito firman. ³ Uleh nyo ake lah mempelajori segelonye en pepasot jak awal, beiklah ake menolis ko nye secaro beroruton bage me, hai Teofilus nyo mulio, ⁴ Empok nyo kowe pacok mengetahui kebonoron tentang hal- hal nyo lah de ajor ko kepado me. ⁵ Pado maso pemerentahon Herodes, Rajo Yudea, ado seurang imam benamo Zakharia nyo beasal jak kelompok imam Abia. Bini nye beasal jak keturunon Harun, ngan namo nye iyelah Elisabet. ⁶ Zakharia ngan Elisabet adolah urang- urang nyo bonor de mato Allah. beroyot iye hidop pi becela sesuoi ngan segelo hokom ngan perentah Tuhan. ⁷ Akon tetapi, beroyot iye pi buleh anak uleh nyo Elisabet e mandul ngan kedua nye lah sajo tuha. ⁸ Tekalo tiba gileron rombongon nye ontok betugas, Zakharia mendepot tugas ontok menjadi imam de hadopon Allah. ⁹ menorot kebiasoon imam, Zakharia tepileh berdasarko undion ontok masok ke Bait Allah ngan nunu ukupon. ¹⁰ pado saat ukupon de persembahko, segeleo umat berdoa de luor. ¹¹ Tibo- tibo, meleikat Tuhan menampak ko diri kepado Zakharia ngan togok de sebelah kanon altar ukupon. ¹² Ketiko mengelek meleikat iye, Zakharia menjadi gemitek ngan en ketakoton. ¹³ Akon tetapi, meleikat iye bekehato kepado nye, " Jengon takot, Zakharia sabab doa permohonon me sodah de dongor. Bini me, Elisabet todo melaher ko seurang anak jenton bage me ngan kowe todo namaoi Yohanes. ¹⁴ Kowe todo bersukacito ngan begemira, ngan lobot urang jugo todo mehilu bersukacito atos kelaheron nye. ¹⁵ Enye todo menjedi gede de hadopon Tuhan ngan pi akon minom anggor apo minom minomon karas loin nye. Bahkon, sejak jak delom kandungon induk nye enye akon de ponohi uleh Roh Kodos. ¹⁶ Enye todo membuat lobot urang Israel bebalek kepado Tuhan, Allah nye. ¹⁷ Enye todo bejelon mendohului Tuhan dengan roh ngan kuaso Elia, ontok membuat hati bepak- bepak bebalek kepado anak- anak nye. Enye jugo todo membuat urang- urang nyo pi taat ontok bebalek kepado hikmat urang- urang bonor. Dengan demikion, enye mempersiap ko umat nyo lah de sedioko bage Tuhan. ¹⁸ Zakharia bekehato kepado meleikat iye, " Upamone ake todo mengetahui tentang hal niye? sabab, aku niye sodah tuha ngan binike jugo sodah bayan tuha." ¹⁹ Meleikat iye menyimbot, " Ake adolah Gabriel meleikat nyo togok de hadopon Allah. Ake de otos ontok betetela dengan me ngan menyampoi ko kabar beik niye kepado me. ²⁰ Hambok, kinie dongor lah! kowe todo menjedi bisu ngan pi pacok boek sampoi pado ari ketiko hal- hal niye tejedi uleh nyo kowe pi pecayo pado pemboek on ke, nyo todo de genapi pado waktu nye. ²¹ Sementero iye, umat menunggu Zakharia. beroyot iye bertanyo- tanyo mengka Zakharia berado terlalu lamo de delom Bait Allah. ²² tekela keluor, Zakharia pi pacok boek kepado beroyot iye. Beroyot iye pun tahu behwa Zakharia lah mendepot ko pengeleon de delom Bait Allah sabab enye terus meneros membuat syarat kepado beroyot iye, hambok jopi pacok boek. ²³ Setelah jangko waktu tugas keimamonnye berakher, belek lah Zakharia ke rumahnye. ²⁴ Setelah peristiwo iye, Elisabet bunteng ngan pi ngengeluor selamo lima bulan. Enye bekehato, ²⁵ " Niye lah nyo lah Tuhan laku ko kepado ke. Enye memperhatiko ke ngan mengapos aib ke jak entaro urang lobot ²⁶ Pado waktu usio kandongon Elisabet berusio enom bulan, Allah mengotos meleikat Gabriel ke sebuah kota de wilayah Galilea, nyo benamo Nazaret. ²⁷ Enye de otos ontok menomui seurang gedis nyo betunangon dengan seurang jenton bernamo Yusuf, keturunon Daud. Namo perawan ye adolah Maria, ²⁸ Lalu, meleikat iye jongok kepado Maria ngan bekehato, " Salam, hai kowe nyo de berkati! Tuhan beserta me". ²⁹ Mendongor kehato iye, Maria menjedi heran. Enye bertanyo- tanyo delom hati nye tentang reti salam iye. ³⁰ Meleikat iye bekehato kepado nye, " Jengon takot, Maria, uleh Allah lah memboriko kaseh karunia-Nye kepado me. ³¹ Dongor lah, kowe ka bunteng ngan melaher ko seurang anak jenton, ngan kowe kan namoi nye Yesus. ³² Enye kan menjedi gede ngan kan de sobot Anak Allah nyo Mahaotinggi. Tuhan kan memboriko nye tahto Daud, nenek muyang-Nye. ³³ Enye kan memerentah atos keturunon Yakub untuk selamo-lamo nye ngan kerajoon- Nye pi kan perenah berakher". ³⁴ Lalu, Maria bekeheto kepado meleikat iye, " upamone hal niye tejedi sedang ko ake bolum belaki?" ³⁵ Meleikat iye menyimbot ngan bekehato kepado nye, " Roh Kodos kan jongok atos me ngan kuaso Allah nyo Mahotinggi kan menaungi me. Iye lah sabab nye, Anak nyo kan laher iye adolah kodos ngan kan de sobut Anak Alah. ³⁶ Ngan, ketahui lah behwa Elisabet, dolor me iye, sedang bunteng jugo pado usio tuha nye. Enye nyo tekelahe de sobut mandul, kinie sodah bunteng selamo enaom bulan. ³⁷ Sabab, pi ado hal nyo mustahil bage Allah." ³⁸ Ngan, Maria bekehato, " sesunggoh nye, aku niye hambo Tuhan. Tejedi lah pado ke upanyo kowe kehato ko iye". Kemudion, meleikat iye lari meninggalko nye. ³⁹ Pado ari- ari iye, Maria bersiap- siap untuk lari ke daerah pegunongon, ke suatu kota de Yehuda. ⁴⁰ Enye masuk ke rumah Zakharia ngan memboriko salam salam kepado Elisabet. ⁴¹ Ketiko Elisabet mendongor salam Maria, anak de delom kandungon nye melompat ngan Elisabet de ponohi Roh Kodos. ⁴² Kemudion Eliisabet tepekek dengan kencang, " de berkatilah kowe de entaro segelo betina, ngan de berkatilah buah kandungon me. ⁴³ Siape kah niye sehinggo induk Tuhan ke nandongi ke? ⁴⁴ Songguh , ketiko suaro me sampoi ke telingake, anak delom kandongon ke melompat uleh bersukacito. ⁴⁵ Berbahagialah enye nyo pecayo behwa ape nyo de kehatoko Tuhan kepado nye kan de genapi." ⁴⁶ Lalu, bekehatolah Maria, " Jiwo ke memulio ko Allah, ⁴⁷ ngan Roh ke bersukacito de delom Allah, juruselamat ke. ⁴⁸ Sabab Allah lah memperhitong ko hambo- Nye nyo hino niye. Dongor lah, mulai kinie ngan seteros nye, segelo generasi kan menyobot ke bebahagia. ⁴⁹ Uleh Enye nyo MahoKuaso lah melakuko hal- hal nyo gede kepado ke, ngan kodos lah namo-Nye. ⁵⁰ Rahmat-Nye de boriko jak generasi ke generasi, kepado urang- urang nyo takot kan Enye. ⁵¹ Enye lah menonjok ko kuaso-Nye dengan tangon-Nye. Enye mencerai beraiko urang- urang nyo sombong delom pekeron hatinye. ⁵² Enye menorun ko rombongon penguaso jak tahta beroyot iye, ngan meninggi ko urang nyo rendah hati. ⁵³ Enye lah mengonyong ko urang nyo kelaporon dengan kebeikon, hambok mengosir urang sogeh lari ngan tangon kosong. ⁵⁴ Allah lah membori ko pertulungon kepado Israel, hambo-Nye, uleh mengingot rahmat-Nye. ⁵⁵ Sebagoimone nyo lah Enye kehato ko kepado nenek muyang kite, kepado Abraham ngan keturonon nye untuk selamo-lamonye." ⁵⁶ Ngan, Maria tinggal bersamo Elisabet kiro- kiro tiga bulan lamonye, lalu enye belek ke rumah nye. ( Kelaheron Yohanes Pembaptis) ⁵⁷ Kinie tiba lah waktu nye bage Elisabet untuk melaherko ngan enye melaherko seurang anak jenton. ⁵⁸ Rombongon tetanggo ngan keluargonye mendongor behwa Tuhan lah menunjuko rahmat-Nye nyo godong kepado Elisabet, ngan beroyot iye turot bersukacito bersamo nye. ⁵⁹ Pado ari nyo kedelapan, beroyot iye jongok untuk menyunatko anak iye. beroyot iye hendak menamoi anak iye Zakharia, upa namo bepak nye. ⁶⁰ Akon tetapi, induk nye bekehato," Hopi, enye akon denamoi Yohanes." ⁶¹ Urang- urang iye bekehato kepado Elisabet, " Hopi ado seurangpun de entaro sanak dolorme nyo denamoi dengan namo iye." ⁶² Kemudion, beroyot iye membori syarat kepado Zakharia untuk menayoko kepado enye, namo ape nak de borikonye kepado anak nye iye. ⁶³ Zakharia meminta sebuah papon toles, ngan menoloes upa niyo: Namonye Yohanes." Ngan, segelo urang heran. ⁶⁴ Seketiko iye jugo, mulot Zakharia terbuka ngan lidahnye tebebas. Enye pun mulai pacok boek ngan memuji Allah. ⁶⁵ Segelo tetanggo nye menjadi takot ngan kejedion niye menjedi bahan pemboek on de seluruh desa perbuketon Yudea. ⁶⁶ Ngan, segelo urang nyo mendongor hal niye bertanyo- tanyo delom hati nye, " Akon menjedi apekah anak niye todo?" Sabab, tangon TUhan menyeretai nye ⁶⁷ Zakharia, bepak Yohanes, jugo de ponohi dengan Roh Kodos ngan bernubuat, ujo nye, ⁶⁸ " Terpujilah Tuhan, Allah Israel sabab Enye lah melaat ngan menobus umat-Nye ⁶⁹ Enye lah membangket ko tandok keselamaton untuk kite keturonon Daud, hambo-Nye, ⁷⁰ Upa nyo firman ko melalui mulot nabi- nabi nyo kodos sejak tekelahe ⁷¹ Empok nyo kite de selamat ko jak mosoh- mosoh kite, ngan jak tangon segelo urang nyo luat dengan kite. ⁷² Enye melakuko untuk menunjok ko rahmat kepado nenek muyang kite, ngan uleh Enye ingot akon perjenjion-Nye nyo kodos, ⁷³ Iyelah sumpah nyo lah Enye kehatoko kepado nenek muyang kite, Abraham, ⁷⁴ behwa kite akon de bebasko jak tangon musoh- musoh kite empok nyo kite pacok melayani-Nye tanpo raso takot, ⁷⁵ delom kekodoson ngan kebonoron de hadopon-Nye, seumor hidop kite. ⁷⁶ Ngan kowe, anak ke, akon desobut nabi Allah nyo Mahotinggi, sabab kowe akon berjelon mendohului Tuhan, untuk mempersiapko jelon bage-Nye. ⁷⁷ untuk memboriko pengertion tentang keselamaton kepado umat-Nye melalui pengamponon atos doso- doso mike. ⁷⁸ Uleh rahmat ngan belas kseh Allah kite, sinar matoari akon menyinari kite jak tempat tinggi ⁷⁹ Untuk menyinari beroyot nyo tinggal delom kekolomon ngan berado delom bayong- bayong mout, untuk menunton kaki kite menuju ke jelon damai sejahtera. ⁸⁰ Mangko nye, anak iye bertumbuh semaken godong, ngan semaken kuat de delom roh. Enye tinggal de padang belantaro sampoi tiba waktunye untuk menunjok ko diri kepado bengso Israel.