¹ Iyelah pembuikkon-pembuikkon Yesus, mengka Enye menengadah ke langet ngan buik, " Bepak, saatnye sodah sampoi, muliakanlah Anak-Me enggakkonyo Anak-Me jugo depot memuliako Kowe. ² Samo upa Kowe lah memboriko Enye kuaso pucuk segelo mendesio, enggakkonyo kenempat segelo nyo Kowe boriko kenempat-Nye, enye depot memboriko hidup kekal. ³ Nielah hidop kekal iye, yaitu behwo mike mengenal Kowe, sikuk-sikuknye Allah nyo bonor, ngan mengenal Kristus Yesus nyo lah Kowe utos. ⁴ Ake lah memuliako Kowe de behumi dengan menyelesaiko gaweon nyo Kowe boriko kenempat-Ke untok de gaweko. ⁵ Ngan kinie, ao Bepak, muliakolah Ake serompok-Me dengan kemuliaon nyo Ke milikih serompok-Me sebolum denia ado. ⁶ Ake lah menyatako namo-Me kenempat urang-urang nyo Kowe boriko kenempat-Ke deri denia nie. Mike iye milik-Me ngan Kowe lah boriko mike kenempat-Ke, ngan mike jugo lah menaati firman-Me. ⁷ Kinie, mike tahuko behwo segelo nyo Kowe boriko kenempat-Ke berasol deri-Me. ⁸ Sabab, Ake lah memboriko kenempat mike firman nyo Kowe boriko kenempat-Ke, ngan mike lah menerimonye sereta bonor-bonor tahuko behwo Ake berasol deri Kowe, ngan mike pecayo behwo Kowelah nyo mengutos Ake. ⁹ Ake bedoa untok mike, Ake hopi bedoa untok denia, hambuk untok mike nyo lah Kowe boriko kenempat-Ke; Sabab, mike adolah milik-Me. ¹⁰ Segelo nyo Ke milikih adolah milik-Me, ngan segelo nyo Kowe milikih adolah milik-Ke; ngan Ake lah de muliako de delom segelo iye. ¹¹ Ake hopi lahe de denia nie, hambuk mike lage ado de denia nie, ngan Ake njongok kenempat-Me. Bepak nyo kudus, jegolah mike de delom namo-Me, namo nyo lah Kowe boriko kenempat-Ke, singgo mike menjedi sikuk samo upa kite. ¹² Selamo Ake serompok mike, Ake sodah menjedo mike delom namo-Me nyo lah Kowe boriko kenempat-Ke. Ake lah menjego mike ngan hopi ado seurang pun deri mike nyo sayau hambuk si anak kebinasaon, enggakkonyo kitab suci de genapi. ¹³ Cuma kinie, Ake bakal njongok kenempat-Me; ngan segelo nie Ake kehatoko de denia nie enggakkonyo mike depot memilikih sukacita-Ke nyo de ponuhko de delom diri mike. ¹⁴ Ake lah memboriko firman-Me kenempat mike, ngan denia luat ngan mike ulehnyo mike hopi berasol deri denia, samo upa Ake hopi berasol deri denia. ¹⁵ Ake hopi memintak-Me untok mengambek mike deri denia, hambuk untok melindungi mike deri nyo jahat. ¹⁶ Mike hopi berasol deri denia, samo upa Ake hopi berasol deri denia. ¹⁷ Sucikolah mike delom kebonoron; firman-Me adolah kebonoron. ¹⁸ Upa Kowe lah mengutos Ake ke delom denia, upaiyelah Ake mengutos mike ke delom denia. ¹⁹ Demi mike, Ake menyuciko badan-Ke enggakkonyo mike jugo de suciko delom kebonoron. ²⁰ Ake hopi anyo bedoa untok mike, hambuk jugo untok urang-urang nyo pecayo kenempat-Ke melalui pemberitaon mike, ²¹ Enggakkonyo mike segelo menjedi sikuk, samo upa Kowe, ao Bepak, de delom Ake ngan Ake de delom Kowe; enggakkonyo mike jugo menjedo sikuk de delom kite singgo denia pecayo behwo Kowelah nyo lah mengutos Ake. ²² Kemuliaon nyo lah Kowe boriko kenempat-Ke, lah Ake boriko kenempat mike enggakkonyo mike menjedi sikuk, samo upa Kowe ngan Ake adolah sikuk. ²³ Ake de delom mike ngan Kowe ado de delom Ake, enggakkonyo mike menjedi sikuk seutuhnye. Dengan upaiyo, denia bakal tahuko behwo Kowelah nyo mengutos Ake, ngan behwo Kowe mengasehi mike, samo upa Kowe mengasehi Ake. ²⁴ Ao Bepak, Ake amat enggakkonyo mike, nyo lah Kou boriko kenempat-Ke, jugo ado serompok-Ke de mone pun Ake bedoa, enggakkonyo mike ngoleh kemuliaon-Ke, nyo lah Kowe boriko kenempat-Ke, ulehnyo Kowe mengasehi Ake sebolum permulaon denia. ²⁵ Ao Bepak nyo adel, hambuk denia hopi mengenal Kowe, hambuk Ake mengenal Kowe; ngan mike tahuko behwo Kowelah nyo mengotos Ake. ²⁶ Ake lah memboritahuko namo-Ke kenempat mike ngan bakal torus memboritahukonye enggakkonyo kaseh nyo dengannye Kowe mengasehi-Ke ado de delom mike, ngan Ake ado de delom mike."