(Kristus Lah Memerdekako Urang Pecayo) ¹ Demi kemerdekaon, Kristus lah membebasko kite. Ulenyo iye, togoklah teguh ngan jengon lagi endok debebani ngan kuk perbudakon. ² Dongorkolah! Ake Paulus, ngehatoko kepodome behwo jika kowe nerimo sunat, Kristus hopi ado gunanyo bagime. ³ Sekali lagi, ake mengehatoko kepodo setiap urang nyo nerimo sunat behwo nye wajib menaati segelo Hukom Taurat. ⁴ Munye kowe berusaha untok debenarko ngan menjelonko Hukom Taurat, hidopme lah depisahko deri Kristus ngan kowe lah meninggalko anugerah. ⁵ Melewati Roh, ngan iman, kite menanti-nantiko pengharapon nak kebonoron. ⁶ Sabab, delom Yesus Kristus, besunat atau hipi besunat piado retinye. Hanyo iman nyo begawe melewati kaseh nyo ado retinye. ⁷ Kowe sodah belari ngan beik. Siapo nyo menghalangi kowe deri menaati kebonoron? ⁸ Ajakon iye bukon detong deri Enye nyo lah memantou kowe. ⁹ " Kekecikon ragi lah membuat segelo adonan mengembang." ¹⁰ Ake memiliki keyakinon terhadop kowe delom Tuhan behwo kowe hopi nak nerimo pemekeron nyo loin. Cuma hambok, siape pun nyo mengacauko kowe nak nanggung hukumonnye. ¹¹ Jedi dolor-dolor, munye ake maseh memberitako sunat, mengka ake maseh deaniayo? munye demikian, betu sandungon terhadop salib lah decampokko. ¹² Ake berharop mike nyo menghasut kowe iye nak mengebiri derinye dewek. ¹³ Dolor-dolor, kowe lah depantau untok menjedi merdeka. Cuma hambok, jengon pergunako kemerdekaonme iye sebagai kesempaton untok hidop delom deging, meloinko layanilah seurang terhadop nyo loin ngan kaseh. ¹⁴ Sabab, segelo Hukom Taurat lah degenapi delom sikok firman nie, " Kasehilah sesamome mendesio upa dirime dewek." ¹⁵ Munye kowe saling menggeget ngan menolon, behati-hatilah empok kowe jengon saleng membinasoko. ¹⁶ Jedi, ake ngehatoko, hidoplah delom Roh, mengka kowe hopi melakuko hal-hal nyo deendokko uleh nafsu kedegingon. ¹⁷ Keendok nafsu kedegingon belawanon ngan keendok Roh, ngan keendok Roh belawonon ngan keendok nafsu kedegingon, ulenyo keduanye saleng berlawonon, empok kowe hopi melakuko hal-hal nyo kowe endokko. ¹⁸ Cuma hambok, munye kowe depimpin uleh Roh, kowe hopi ado de bewoh Hukom Taurat. ¹⁹ Pekerjaon deri nafsu kedegingon lah jelas, nyoiye dosa seksual, kecemaron, hawa nafsu, ²⁰ penyembahon patung, kuaso gelap, kebencion, perbentohon, iri hati, bemarahon nyo pi tekendali, kepentingon diri dewek, perselisihon, perpecahon, ²¹ kecemburuon, mabuk-mabukon, pesta pora, ngan sejenisnyo. Ake peringatko kowe kinie, upa nyo sodah ake peringatko sebolumnye, siape nyo melakuko hal-hal iye hopi nak mewarisi Kerajaon Allah. ²² Cuma hambok, buah Roh adolah kaseh, sukacita, damoi sejahtera, kesabaron, keramahon, kebeikon, kesetiaon, ²³ kelemahlombuton, ngan penguasaon diri, Hopi ado hukom nyo melawon hal-hal nie. ²⁴ Mike nyo menjedi milik Yesus Kristus lah menyalibko nafsu kedegingon sereta segelo nafsu ngan keendokkonnye ²⁵ Munye kite hidop uleh Roh, beiklah kite bejelon sesuai ngan Roh. ²⁶ Jengonlah kite menjedi sombong, saleng menghasut, atau saleng iri hati.