Paulus ngan Silas de Kota Tesalonika) ¹ Suatu saat, tekalo Paulus ngan Silas lah melewati Amfipolis ngan Apolonia, mike sampoi de Tesalonika, de mone ado sebuah sinagoge urang Yahudi. ² Lalu, sesuoi kebiasaon Paulus, nye masok ke antaro mike. ngan selamo tiga hari Sabat boek dengan mike deri Kitab Suci, ³ sambel menjelasko ngan membuktiko bahwa Kristus haros menderita ngan bangket deri antaro urang mati, dengan boek, " Yesus nie, nyo sedang ke boritako kepadome adolah Kristus." ⁴ Lalu, sebageon deri mike deyakenko ngan begabung dengan Paulus ngan Silas, besamo dengan sejumlah godong urang Yunani nyo takot akan Allah ngan hopi sedikit betina-betina tehormat. ⁵ Hambok, urang-urang Yahudi menjedi iri hati ngan mengajok beberape urang jahat nyo bekeloyoron de tempat umum, mike mengumpulko lobot urang ngan membuat kekacauon de kota, lalu menyerang rumah Yason sambel ndelok Paulus sereta Silas ontok ngunda mike keluor kepado urang lobot. ⁶ Tekalo mike hopi menomuko Paulus ngan Silas, mike meheret Yason ngan beberape dolor seiman ke hadapon para pejabat kota, dengan beseru, " Urang-urang nie, nyo lah mengacauko denia, lah njongok jugo ke sie. ⁷ Ngan, Yason menyambot mike, ngan mike segelo betindak melawon hokom Kaisar dengan mboekko bahwa ado raja loen, nyoiye Yesus." ⁸ Urang lobot ngan para pejabat kota menjedi resah tekalo mendongor hal iye. ⁹ Ngan, setelah mike menerimo jaminon deri Yason ngan nyo loennyo, urag-urang iye membebaskonye. ¹⁰ Dolor-dolor seiman segera menyoroh Paulus ngan Silas, malom iye jugo, ke Berea, ngan tekalo mike sampoi, mike berjelon ke sinagoge urang Yahudi. ¹¹ Urang-urang Yahudi de sane lobeh beik hatinye deripado urang-urang nyo de Tesalonika ulenyo mike menerimo firman dengan ponoh semangot, sambel menyelidiki Kitab Suci setiap hari ontok mengetahui munye hal-hal iye memang bonor. ¹² Uleh ulenyo iye, lobot deri mike menjedi pecayo, temasok betina ngan jenton Yunani terhormat nyo jumlahnye hopi sedeket. ¹³ Cuma hambok, tekalo urang-urang Yahudi de Tesalonika mengetahui bahwa firman Allah jugo diberitako uleh Paulus de Berea, mike pon jugo njongok ke Berea ontok menggoyahko ngan meresahko lobot urang. ¹⁴ Lalu, dengan segera, dolor-dolor seiman menyoroh Paulus bejelon sampoi ke pantai, hambok Silas ngan Timotius tetap tinggal de sie. ¹⁵ Urang-urang Yahudi nyo nganti Paulus mengundanye sampoi ke Atena, ngan setelah menerimo sebuah poson deri Paulus ontok Silas ngan Timotius empok njongok kepadonye secepatnye, mike pun berangkot. ¹⁶ Sementaro Paulus menunggu mike de Atena, rohnye meraso desusahko de delm dirinye ulenyo nye ngoleh kota itu ponoh dengan patung-patung berhala. ¹⁷ Uleh ulenyo iye, nye betukar pekeran de sinagoge dengan urang-urang deri bengso loen nyo takot akan Allah, sereta de tempat umum, setiap hari, dengan urang-urang nyo kebetolon ado de sie. ¹⁸ Beberape ahli peker deri kelompok Epikuros ngan Stoa jugo boek-boek dengannye. Ngan, beberape boek, " Ape nyo nak deboekko si pembual nie?" Nyo loen boek, " Sepertinye, iye nie adolah seurang pemberita dewa-dewa aseng," ulenyo iye memberitako Yesus ngan kebangketon. ¹⁹ Lalu, mike mengajoknye ngan mengundanye ke Areopagus, sambel boek, " Ibo boleh kami mengetahui ajarn beru apo nyo kowe beritako nie? ²⁰ Sabab, kowe sedang ngunda beberape hal nyo mengheranko de telinga kami. Kami nak mengetahui ape maksod hal-hal nie." ²¹ (saat iye, segelo urang Atena ngan urang-urang aseng nyo tinggal de sane terbiaso menghabesko waktu mike ngan hopi melakuko ape pon seloen mboeko apo mendongorko sesuatu nyo beru.) ²² Mengka, Paulus togok de tangah-tangah Areopagus ngan boek, " Hai urang-urang Atena, ake mengamati bahwa delom segelo hal kowe sangat religius. ²³ Sabab, tekalo ake sedang berkeleleng ngan memperhatiko benda-benda nyo kowe sembah, ake jugo menjumpoi sebuah altar dengan toleson nie, 'KEPADO ALLAH NYO HOPI DEKENAL.' Ulenyo iye, ape nyo kowe sembah tanpo mengenalnye, iyelah nyo ake beritako kepadome. ²⁴ Allah nyo menciptako denia ngan segelo sesuau nyo ado de delomnye, ulenyo Nye adolah Tuhan pocok langet ngan bumi, hopi tinggal de delom kuil-kuil nyo debuat dengan tangon mendesio, ²⁵ hopi jugo Nye delayani uleh tangon-tangon mendesio, seakan-seakan Nye membutuhko sesuatu ulenyo Nye dewek nyo membori kepado siape sajo kehidupon, dengan napas, ngan segelo sesuatunye. ²⁶ Ngan, Iye menciptako, deri sikok urang, segelo bengso umat mendesio ontok tinggal de segelo muka bumi nie, setelah menetapko mosem-mosem ngan batas-batas tempat hidop mike, ²⁷ empoknyo mike ndeloki Allah, ngan munye memang depot menyentuh-Nye ngan menomuko-Nye meskipon Nye hopi jouh deri kite maseng-maseng ²⁸ Sabab, de delom Nye, kite hidop, begerak, ngan ado. 'Ulenyo kite nie jugo adolah ketoronon-Nye.' ²⁹ Jedi, ulenyo kite adolah ketoronon Allah, kite seharosnye hopi bepeker bahwa keadaon Ilahi iye upa emas, apo perak, apo betu, sebuah wujud nyo deciptako deri keterampelon ngan pemekeron mendesio. ³⁰ Uleh ulenyo iye, setelah mengabaiko maso-maso kebodohon, kinie Allah memberitahuko segelo urang de mane-mane empok betobat, ³¹ ulenyo Nye sodah menentuko suatu hari tekalo Nye nak menghakomi denia delom keadelon melalui sikok Urang nyo lah detentuko-Nye, setelah Nye memboriko bukti kepado segelo urang dengan membangketko Urang iye deri antaro urang mati ³² Ngan, tekalo mike mendongor tentang kebangketon deri antaro urang mati, beberapo urang mulai lelegeon hambok nyo loen boek, "Kami nak mendongorko lagi tentang hal nie." ³³ Mengka, Paulus bejelon deri tangah-tangah mike. ³⁴ Cuma hambok, beberape urang begabong dengannye ngan menjedi pecayo, de antaranye jugo ado Dionisius, anggota Areopagus, ngan seurang betina benamo Damaris, sereta beberape urang loen nyo besamo mike.