(Petrus ngan Kornelius) ¹ Suatu saat, de Kaisarea, ado seurang benamo Kornelius, seurang perwira deri ape nyo desebot pasukan Italia, ² urang saleh, nyo takut akan Allah, begitu jugo ngan segelo urang nyo ado de rumahnye, ngan memboriko lobot sedekah kepodo urang-urang ngan selalu bedoa kepodo Allah. ³ Suatu potong, sekitar jam kesembilan hari iye, nye ngoleh ngan jelas delom sebuah pengolehan, seurang malaikat Allah detong ngan boek kepodonye, " Kornelius!" ⁴ Mengka, nye menatap malaikat iye ngan ketakutan ngan boek, " Ape nie, Tuan?" Ngan malaikat iye boek kepodonye, " doa-doame ngan sedekah-sedekahme lah noek sebagai suatu peringoton de hadopon Allah. ⁵ Kinie, suruhlah urang-urang ke Yope ngan panggellah seseurang benamo Simon, nyo jugo desebot Petrus, ⁶ nye tinggal besamo ngan seurang penyamak kulet benamo Simon, nye rumahnye berado de topi lout." ⁷ Tekalo malaikat nyo boek kepodonye lah pergi, Kornelius memanggel dua urang pelayannye ngan seurang prajurit nyo saleh deri antaro urang-urang nyo selalu melayani keperluon pribadinye, ⁸ ngan sesodah menjelasko segelo sesuatu kepodo mike, nye menyuruh mike ke Yope ⁹ Depaginye, ketika mike sedang pejelononnye ngan mendekati kota iye, Petrus noek ke pucuk hatop rumah, sekitar jam keenom untok bedoa. ¹⁰ Lalu, nye meraso lapor ngan nak makon, hambuk ketika urang-urang sedang menyiapko makon, Petrus mendepot sebuah pengolehan, ¹¹ ngan nye ngoleh langet tebuka ngan suatu upa koen nyo en lebor turun ngan teruntai deri keemapt sudutnye sampoi ke tanoh. ¹² De delomnye, ado segelo jenis benatong bekaki empat, ngan benatong-benatong melata de bumi ngan burung-burung de udara. ¹³ Kemudion, detonglah suaro boek kepodonye, " Jegolah, Petrus, sembolehlah ngan makonlah!" ¹⁴ cuma hambuk, Petrus boek, " Hopim Tuhan. Sabab, ake hopi makon ape pun nyo haram apo najis." ¹⁵ Ngan, suaro iye boek lagi kepodonye untok kedua kalinye, " Ape nyo lah Allah tahirko, jengon sekali-kali kou sobot haram," ¹⁶ Hal nie tejedi tiga kali, ngan tiba-tiba segelo iye terangkot ke langet. ¹⁷ Saat iye, sementaro Petrus maseh en bingung memekerko ape arti pengolehon nyo lah dekolehnye iyem tampaklah urang-urang nyo deutus uleh Kornelius dang ndelok tau de mone rumah Simon, sembel togok de depan pintu gerbang, ¹⁸ ngan sambel memanggel, mike betanyo apekah Simon, nyo desobot Petrus, menunmpang de sane. ¹⁹ Sementaro Petrus dang merenungko pengolehon iye, Roh boek kepadonye, " ado tiga urang jenton nyo sedang ndelokme. ²⁰ Jego ngan turunlah bejelonlah besamo mike tanpa ragu ulehnye Ake lah mengutus mike." ²¹ Lalu Petrus turun kepado urang-urang iye ngan boek, "Koleh, akelah urang nyo kou delok. Ape alason kedetongonme?" ²² Mike boek, " Kornelius, seurang perwira, orang bonor ngan takut akan Allah, nyo tekenal beik de antaro segelo bengso Yahudi, lah deingotko uleh malaikat kudus untok menyuruhme detong ke rumahnye ngan untuk mendongorko pemboekonme." ²³ Petrus mengundang mike masok ngan membori mike tumpangan de sie. pepagi harinye, nye jego ngan pegi besamo mike, ngan beberape dolor seiman deri Yope ngantinye. ²⁴ Podo hari berikotnye, mike memasuki Kaisarea. Kornelius sodah menanti-nantiko mike ngan sodah ngompolko sanak dolor sereta kanti-kanti dekatnye. ²⁵ Mengka Petrus masok, Kornelius menomuinye, lalu belotot de kaki Petrus ngan menyembahnye. ²⁶ Hambok, Petrus membentu nyo togok sambel boek, "Togoklah! Ake anyo seurang mendesio jugo." ²⁷ Sementaro Petrus boek ngan Kornelius, Petrus masok ke delom ngan mendepoti ado lobot urang bekompol besamo. ²⁸ Lalu, Petrus boek kepodo mike. " Kowe tau bahwa adolah kekejian bagi urang Yahudi untuk behubungan apo mengunjongi urang bukan Yahudi, hambok Allah lah menunjukko kepodoke bahwa ake hopi seharusnye menyobut siapepun haram apo najis. ²⁹ Iyelah sababnye, ake hopi keberaton ketika kowe menyuruhke njongok. Ulehnyo iye, ake betanyo ontok alason ape kou memanggelke?" ³⁰ Ngan, Kornelius boek, "Empat hari nyo lalu sampoi jam nie, podo jam kesembilan, ake sedang bedoa de rumahke, ngan kolehlah, ado seurang togol de hadaponke memakoi pakoion nyo bekilau. ³¹ Lalu, boek, "Kornelius, doame sodah dedongor ngan sedekahme lah deingot de hadapon Allah. ³² Uleh sabab iye, suruhlah ke Yope ngan mintalah Simon nyo desobut Petrus ontok detong. Nye sedang menumpang de rumah Simon, seurang penyamak kulet, de tepi lout.' ³³ Ulehnyo iye, ake segera menyuruh urang kepodome, ngan kowe sodah bebaik hati nak njongok. Kinie, kite segelo ado de sie, de hadapon Allaj, ontok mendongor segelo sesuatu nyo sodah deperintahko kepodome uleh Tuhan." ³⁴ Lalu, Perus membuka molotnye ngan boek, " Kinie, ake bonor-bonor mengerti bahwa Allah hopi menunjukko keberpihakan. ³⁵ Hambok, de setiap bengso, urang nyo takut akan Nye ngan melakuko ape nyo bonor, bekenan kepadoNye. ³⁶ Firman nyo Allah sampoiko kepodo bengso Israel memberitako kabar beik damai sejahtera melalui Yesus Kristus, Nyelah Tuhan atas segelonye. ³⁷ Kowe dewek tau peristiwa nyo lah tejedi de segelo Yudea, mulai deri Galilea, sesodah baptison nyo Yohanes beritako, ³⁸ kowe tau Yesus, urang Nazaret, upamone Allah mengurapi-Nye ngan Roh Kudus ngan dengan kuaso. Nye bejelon bekeleleng melakuko kebeikan ngan menyembuhko segelo urang nyo detindas uleh roh jahat karena Allah menyertai Nye. ³⁹ Kami adolah saksi-saksi deri segelo hal nyo lah Yesus lakuko, beik de daerah urang Yahudi maupun de Yerusalem. Mike lah membunoh Yesus ngan mengenton-Nye de pocok salib. ⁴⁰ Hambok, Allah membangketko-Nye podo hari nyo ketiga ngan memperkenanko Nye ontok menampakko diri, ⁴¹ bukon kepado segelo urang, hambuk kepado kami, saksi-saksi nyo lah pileh uleh Allah sebolumnye, nyo makon ngan minum besamo-Nye sesodah Nye bangket deri antaro urang mati. ⁴² Ngan, Nye memerintahko kepodo urang-urang ngan besaksi dengan sungguh-sungguh bahwa Nyelah nyo detetapko uleh Allah sebagai hakim atas nyo hidop ngan nyo mati. ⁴³ Bage Nyelah, segelo nabi besaksi bahwa setiap urang nyo pecayo de delom-Nye akan menerimo pengampunon doso melalui namo-Nye." ⁴⁴ Sementaro Petrus maseh memboeko kato-kato iye, Roh Kudus toron ke pocok segelo nyo mendongorko Firman iye. ⁴⁵ Ngan, urang-urang pecayo nyo besunat, nyo detong besamo Petrus, takjub ulehnyo karunia Roh Kudus lah decurahko, jugo kepado bengso-bengso loen. ⁴⁶ Sabab, mike mendongor urang-urang iye boek delom bebagai bahaso ngan memuliako Allah. Lalu, Petrus boek, ⁴⁷ "Bukonkah hopi ado seurang pun nyo depot menghalangi aek ontok debaptisko kepodo urang-urang nyo sodah menerimo Roh Kudus samo upa kite nie?" ⁴⁸ Mengka, Petrus memerintahko mike ontok debaptis de delom namo Kristus Yesus. Kemudion urang-urang iye meminta empoknyo Petrus tinggal besamo mike selamo beberape hari.