(Yesus Deangkat ke Surga ngan Jenji Detongnyo Roh Kudus) ¹ Delom buku nyo ake toles sebolumnye, Teofilus, tentang segelo nyo Yesus mulai lakuko ngan nyo ajorko, ² Sampoi podo hari tekela Nye deangkat, sesodah Nye membori perentah, melalui Roh Kudus, kepodo rasul-rasul nyo lah Nyo pileh. ³ Kepodo nye, Nyo jugo menonjokko diri-Nye dewek hidop sesodah Nye menderita, ngan neman bukti, sambel menampakko diri kepado mike selamo empat puluh hari ngan boek tentang Kerajaon Allah. ⁴ Selamo besamo-samo ngan mike, Nye memerentahko rombongon empoknyo hopi meninggalko Yerusalem, hambok menunggu jenji Bepak, enyo ujonye, "Kowe ndongor deri Ke, ⁵ Kareno Yohanes membaptes ngan air, hambok kowe akan debaptes engan Roh Kudus, hopi lamo deri kinie." Yesus terangkot ke Surga ⁶ Ulenyo iye, tekalo mike bekompol besamo, mike betanyo kepado-Nye, "Tuhan, ibo nie wektunye Kou memulihko kerajaon bage Israel?" ⁷ Nyo boek kepado enye, Bukonlah begionme ontok mengetahui tentang waktu ngan masa nyo sodah de tetapko uleh Bepak delom kuaso-Nye. ⁸ Hambok, kowe nak menerimo kuaso tekela Roh Kudus lah njongok kepodome ngan kowe nak menjedi saksi-saksi-Ke de Yerusalem, de seluruh Yudea ngan Samaria, ngan sampoi ke bageon bumi paling hojong." ⁹ Ngan, sesodah Nye nggerako hal-hal nie, sementaro mike ngoleh, Nyo terangkot ngan awan ngudo-Nye sayau deri pandangon mike. ¹⁰ Mengka, tekela mika lagi ngoleh ke langet, sementaro Nye lari, kolelah, ado duo urang jenton bepakeyon puteh togok de samping mike, ¹¹ ngan boek, " Hai urang-urang Galilea, mengkah kowe togok sambel ngoleh ke langet? Yesus nie, nyo sodah terangket deri antaro kowe ke surgo kan detong balek ngan caro nyo samo upa kowe ngoleh-Nyo lari ke surgo." ¹² Sodah iye, rombongon belek ke Yerusalem deri buket nyo desobut Zaitun, nyo ado de parok Yerusalem, jouhnye sepejelonon Sabat. ¹³ Tekela rombongon masuk, rombongon iye noek ke ruang pocok, deman rombongon ne tinggal. Petrus, ngan Yohanes, ngan Yakobus, ngan Andreas, Filipus, ngan Tomas, Bartolomeus, ngan Matius, Yakobus anak Alfeus, ngan Simon urang Zelot, ngan Yudas anak Yakobus. ¹⁴ Rombongan segelo ngan sehati betekon delom doa besamo ngan segelo betina ngan Maria, indok Yesus, serta dolor-dolor-Nye. ¹⁵ pado ari-ari iye, Petrus togok de antaro dolor-dolor seiman (urang lobot kiro-kiro seratus dua puluh jumlahnye), ngan bekehato, ¹⁶ "Dolor-dolor, Kitab Suci haros degenapi, nyo lah deboekko sebolumnye uleh Roh Kodos melalui molot Daud tentang Yudas, nyo menjedi pemempen bage urang-urang nyo menangkop Yesus. ¹⁷ Sabab, nye tehitong de antaro kite ngan memperuleh bageon delom pelayanon nie. ¹⁸ Kinie, urang nie memboli sebidang tanoh ngan upah deri kejahatonnye, ngan sesodah kepalonye titek lobeh dehulu, bageon tengah badannye pacah, ngan segelo isi porutnye tekeluor. ¹⁹ Ngan, hal nie lah deketahui uleh segelo urang nyo tinggal de Yerusalem sehinggo tanoh iye delom beheso rombongone desebut Hakal-Dama, artinye, Tanoh Dero'. ²⁰ Sabab, lah tetoles delom kitab Mazmur: 'Biarlah deman tinggalnye menjedi sepi, ngan biarlah de sano hopi ado seurang pun nyo tinggal de dalomnye,' ngan biarlah nyo loenne ngambek jabatonnye.' ²¹ Uleh nyo iye, seseurang deri rombongon nyo selalu besamo ngan kite selamo Tuhan Yesus masok ngan keluor dri antaro kite, ²² mulai deri baptison Yohanes sampoi pado hari tekaloh Nye deangkot deri antaro kite, salah sikok deri rombongon nie haros menjedi saksi tentang kebangketon-Nye besamo kite." ²³ Kemudion, rombongone mengusulko dua urang, yoitu Yusuf nyo desebut Barsabas, nyo jugo desebut Yustus, ngan Matias. ²⁴ Kemudion, enyo bedoa, "Engkau, Tuhan nyo menganal hati segelo urang. Tonjokko ngan kowe siapo de antaro kedua urang nie nyo lah Engkau pileh, ²⁵ Ontok menerimo bageon pelayanon nie ngan jabaton rosul , deri Yudas nyo lah menyimpang ontok lari ke tempatnyo dewek." ²⁶ Kemudion, segelo rosul menyampok undi de antaro nyo ngan undion titek ngan kowe Matias sehinggo nye tehitong besamo engan kesebelas rasul.