¹ Demi kedetongon-Nye ngan demi kerajaon-Nye, ngan songguh-songguh, ake beposon kepodome de hadopon Allah ngan Yesus Keristus nyo nak menghakemi urang nyo hidop ngan nyo mati: ² "Beritakolah firman, siap sedialah beik apo hopi beik waktunye; tegorlah, nasehatilah, ngan doronglah mike ngan ponoh kesabaron ngan pengajoran. ³ Sabab, nak tiba saatnye munye urang-urang hopi endok lagi menerimo ajoron sehat. Sebeleknye, untok memuasko telinga, mike akan mengompolko guru-guru bage diri mike dewek nyo sesuoi ngan keendokon mike. ⁴ Mike akan memalengko pendongoron mike deri kebonoron ngan bebelek kepodo dongeng-dongeng. ⁵ Sedangko kowe, waspadalah delom segelo hal, betahanlah delom kesukaran, gawekolah tugas pemberita Injil, ngan selesaikolah pelayanonme. ⁶ Sabab, ake lah decurahko bage cawa persembahon, ngan saat kelarionke lah tiba. ⁷ Ake lah belago delom pelagohonke nyo beik; ake lah mengakheri pertandengon; ake lah memeliharo iman. ⁸ Kinie, mahkota kebonoron lah desediako bageke. Podo hari iye, Tuhan, Hakem nyo adel, akan menghadiakonye kepodoke, ngan bukon anyo kepodoke, meloenko jugo kepodo segelo urang nyo ndelok kedetongon-Nye. ⁹ Beusahalah untok cepat njongo kepodoke ¹⁰ ulehnyo Demas meninggalko ake, sabab ye mencintai denia nie ngan lari ke Tesalonika. Kresekes lah lari ke Galatia ngan Titus ke Dalmatia. ¹¹ Anyo Lukas nyo besamoke. Jompotilah Markus ngan undalah enye besamome ulehnyo ye sajo beguna bagek untok pelayanon. ¹² Ake lah mengotos Tikhikus ke Efesus. ¹³ Munye kowe jongo, undalah jubah nyo ku tinggalko kepodo Karpus de Troas ngan jugo buku-bukuke, terutamo segelo perkamen iye. ¹⁴ Aleksander, si tukang bosi iye lah sajo merugiko ake. Tuhan akan membelos sesuoi ngan perbuatonye. ¹⁵ Kowe behati-hatilah jugo terhadop nye ulehnyo nye sajo menantang ajoron kite. ¹⁶ Podo pembelaonke nyo pertamo, hopi ado sikok pon nyo mendokong ake ulehnyo segelo lah meninggalko ake. Semoga hal nie hopi debalasko atas mike. ¹⁷ Hambok, Tuhan togok de sampengke ngan menguatko ake empoknyo kabar iye depot deberitakoh seponohnye melalui ake, ngan segelo urang bukon Yahudi depot mendengornye ngan upanio, ake delepasko deri molot singa. ¹⁸ Tuhan nak menyelamatko ake deri segelo perbuaton jahat ngan akan mengundake ke kerajaon surgawi-Nye ngan selamat. Bage Enyelah kemuliaon sampoi selamo-lamonye. Amin. ¹⁹ Sampaiko salamke kepodo Priskila ngan Akwila, ngan kepodo seisi rumah Onesiforus. ²⁰ Erastus tetap tinggal de Korintus, ngan Trofimus ake tinggalko delom keadaon domom de Miletus. ²¹ Beusahalah njongo ke mai sebelom mosem dingen. Ebulus, Pudes, Linus, Klaudia, ngan segelo dolor seiman mengirem salam untokme. ²² Tuhan menyertai rohme. Anugerah menyertai kowe.