¹ Ulehnyo iye, anakke, jadilah kuat delom anugrah nyo ado delom Yesus Keristus. ² Ape pun nyo lah kowe dongor deri ake de depan lobot saksi, pecayokoh ioye kepodo urang-urang nyo setia, nyo jugo mampu mengajor urang loen. ³ Mehilulah menderita sebagai prajurit Yesus Keristus nyo beik. ⁴ Hopi ado prajurit nyo menyiboko dirinye ngan uruson hidop sehari-hari empoknyo ye depot menyenangko kemendanye. ⁵ Upaiyoy jugo seurang olahragawan nyo betandeng, ye hopi akan memperuleh mahkita kemenangon kecuali ye betandeng menorot pengatoron nyo belaku. ⁶ Seurang petani nyo begawe karas sodah selayaknye menjedi urang pertamo nyo menerimo hasel panennye. ⁷ Pekerkolah ape nyo ake boekkoh uleh Tuhan nak memborime pengertion delom segelo hal. ⁸ Ingotlah Keristus Yesus, nyolah bangket deri antaro urang mati, ketoronon Daud, upah nyo ake beritakoh delom Injilke, ⁹ nyo ulehnyo ake kinie menderita sampoi de penjara sebagai seurang keriminal, hambok firman Allah hopi tepenjarah! ¹⁰ Ulehnye iye, ake betahan delom segelo sesuatu demi urang-urang pilehon Allah empoknyo rombongan jugo mendapot keselamaton nyo ado delom Yesus Keristus ngan kemuliaonnye nyo kekal. ¹¹ Pemboeon nie bonor: "Munye kite mati besamo Enye, kite jugo nak hidop besamo Enye. ¹² Munye kite betekon, kite jugo nak memerintah besamo Enye. Muny kite menyangkal Enye, Ye jugo nak menyangkali kite. ¹³ Munye kite hopi setia, Ye tetap setia, ulehnye Ye hopi depot menyangkal diri-Nye dewek." ¹⁴ Ingotkoh mike ngan hal-hal nie. Nasehatilah mike de hadopon Tuhan empok jengon betengkar soal kehato-kehato, sabab hopi ado gunanyo ngan anyo nak menghancorkoh urang-urang nyo mendengornye. ¹⁵ Buatlah nyo terbeik untok mempersembahkoh dirime ngan layak de hadopon Allah seumpamone begawe nyo hopi perelu malu, ngan nyo lah mengajorkoh pemboeon kebonoron ngan tepat. ¹⁶ Hambok, jouhilah omong kosong nyo sia-sia uleh hal iye nak menonton kepodo kehopisucion nyo lobeh parah. ¹⁷ Pemboenon mike nak menyebar upa penyaket gangren. De antaro mike adolah Himeneus ngan Filetus, ¹⁸ nyo lah menyimpang deri kebonoron, ngan boekoh behwa kebangketon sodah terjedi. Mike merosak iman sebageon urang. ¹⁹ Hambok, dasar Allah nyo kuat tetap togok ngan materai nie: "Tuhan mengenal siape nyo menjedi melek-Nye," ngan "Setiap urang nyo mengaku namo Tuhan haros meninggalkoh kejahaton." ²⁰ De delom rumah nyo megah, bukon sajo terdepot perabot deri emas ngan perak, meloenkoh jugo deri kayu ngan tanoh liat. Separoh de gunakoh untok tujuon nyo tehormat, mengko sebageon untok tujuon nyo hina. ²¹ Ulehnyo iye, munye seurang menyucikoh diri deri hal-hal nyo hina, ye nak menjedi perabot untok tujuon nyo terhormat de khososkoh, beguna bage tuannye, ngan de persiapkoh untok setiap penggaweon nyo beik. ²² Jouhilah hawo nafsu urang muda ngan kejarlah kebonoron, iman, kaseh, ngan damai sejahterah besamo-samo ngan mike nyo memantou Tuhan ngan hati nyo murni. ²³ Jouhilah perdebaton nyo bodoh ngan hopi bepengetahuon ulehnyo kowe tahu behwa hal iye akan menjongokoh petengkaron. ²⁴ Pelayan Tuhan haroslah hopi betengkar, hambok ramah ngan segelo urang, terampel mengajor, ngan sabar, ²⁵ ngan lombot mengoreksi lawonnye. Semoga Allah menganugrahi mik pertobaton nyo menontotnye kepodo pengetahuon akan kebonoron ²⁶ empoknyo mike menjedi sabar ngan melapaskoh diri deri jebakan Iblis nyo lah menawan mike untok menjelonkoh keengenonye.