¹ Ulenyo kami tahu bahwa munye kemah, deman kediomon kite de bumi nie derobohkoh, kite mempunyoi sebuah bengunon deri Allah, sebuah rumah nyo hopi debuat ngan tangon, nyo kekal de surga. ² Selamo kite ado dedelom kemah nie, kite mengeloh ulehnyo kite ndelok untok menganakoh deman kediomon surgawi kite. ³ Sabab, tekalo kite menganakonye, kite hopi lagi dedepoti telanjong. ⁴ Selamo kite berado delom kemah nie, kite mengoleh ngan tebobon, ulehnyo kite hopi endok betelanjong meloenko bepakoion empoknyo nyo fanah iye detolon uleh hidop. ⁵ Kinie, ye nyo mempersiapko kite untok tujuon nie adolah Allah, nyo memboriko kepodo kite sebagai jaminon. ⁶ Ulenyo iye, kami selalu tabah ngan menyadari bahwa ketika kami ado de rumah delom badan nie, kami berado deluor Tuhan. ⁷ Sabab, kami hidop uleh iman, bukon uleh pengolehon. ⁸ Hambok, kami tabah ngan lobeh endok tinggal de luor badan nie mengka tinggal besamo Tuhan. ⁹ Uleh upanio enye, kami beusaha empoknyo kami bekenan kepodon-Nye, entah kami tinggal de rumah nie apo berado deluor. ¹⁰ Sabab, kite segelo haros de hadopkoh de depan keresi pengadelon Kristus empoknyo setiap urang depot menerimo belek hal-hal nyo delakukoh delom badan nye, sesuoi ngan ape nyo sodah delakukonye, entah iye beik apo pon jahat. ¹¹ Ulenyo kami tahu artinye takot akan Tuhan, mengka kami menyakenko urang loen. Hambok, kami sodah nyato bage Allah ngan ake beharop nyato pula bage hati nuranime. ¹² Kami hopi beusaha lagi memuji-muji diri kami kepodome, Hambok kami memborikome kesempaton untok bangga terhadop kami. Ngan demikian, kowe nak mempunyoi jawabon untok rombongon nyo bangga atas hal-hal laheria ngan bukon atas ape nyo ado delom hati. ¹³ Munye kami hopi menjedi diri kami hal iye adolah untok Allah. Muye kami menjedi diri kami, iye untok kepentengonme. ¹⁴ Ulenyo kaseh Kristus menguasoi kami ketika kami menyimpolko bahwa munye sikok urang mati untok segelo, mengka rombongon segelonye teelek. ¹⁵ Ngan, enye teelek untok segelo empoknyo rombongon nyo hidop hopi lagi hidop untok diri rombongon dewek, meloenko untok Enye, nyo lah mati ngan debangketko demi rombongon. ¹⁶ Ulenyo iye, sejak kinie kami hopi mengenali seurang pun menorot keadaaon laherianye. Meskipon kami perenah mengenal Kristus secaro laheria, Hambok kinie kami hopi lagi menilai-Nye upa iye. ¹⁷ Jedi, siape nyo ado de delom Kristus, iye adolah ciptaon beheru. Hal-hal nyo lamo sodah belalu, kolelah, hal-hal nyo beru lah njongo. ¹⁸ Segelo hal nie adolah deri Allah, nyo memperdamaiko kite ngan diri-Nye melalui Kristus ngan membori kite pelayanon pendamaion iye, ¹⁹ nyoiye delom Kristus Allah mendamaiko denia ngan diri-Nye dewek, ngan hopi memperhitongko pelanggaron-pelanggaron rombongon, ngan sodah mempercayoi berita pendamaion kepodo kite. ²⁰ Jedi, kami adolah duta-duta Kristus. Allah menonjoko panggelon-Nye melalui kami. Kami buek kepodome demi Kristus, borilah dirime deperdamaiko ngan Allah. ²¹ Enye nyo hopi mengenal doso lah debuat-Nye menjedi doso ulenyo kite empokonyo kite debonorko Allah dedelom Enye.