¹ Segelo urang nyo menanggong bobon upa budak haroslah menganggap tuannye upamone urang nyo pantas mendepot segelo hormat empoknyo namo Allah ngan pengajaron kite hopi decela. ² Sedangkoh para budak nyo tuannye iyelah urang pecayo, jengonlah mengurangi raso hormat kepodo mike ulehnyo mike iyelah dolor-dolor seiman. Hambok, para budak haros melayani tuannye lobeh beik lage ulehnyo nyo menerimo berkat pelayanan iyelah urang-urang pecayo ngan nyo iye nyo kasehe. Ajarkoh ngan nasehatkoh hal-hal nie kepodo mike. ³ Munye ado urang nyo mengajarkoh ajaron loen nyo hopi sesuoi ngan perkehatoon nyo bonor deri Tuhan kite Kristus Yesus ngan hopi sesuoi ngan ajaron kesalehon, ⁴ nye iyelah pembual ngan hopi mengerti apo-apo. Nye anyo tetarek ngan perbantohon nyo hopi sehat, nyo anyo memperobokoh kato-kato nyo justruh menimbolkoh iri hati, pepecahon, fitnah, ngan kecurigaon nyo jahat, ⁵ sertah teros-meneros membikin perselisihon de antaro urang-urang nyo pekerennye elah rosak ngan nyo menulak kebonoron, nyo kiro behwa kesalehon iyelah caro untok mendepotkoh keuntungon. ⁶ Cuma hambok, kesalehon nyo desertai raso cokop nak memborikoh manfaat nyo godong. ⁷ Sabab, kite hopi membawa apo-apo ketiko masok ke dunia ngan kite jugo hopi pacok membawa apo-apo ketiko keluor deri dunia nie. ⁸ Munye soda ado makonon ngan pakoyon, kite nak meraso cokop. ⁹ Urang nyo endok menjedi kayo titek ke delom pencobaon ngan jebakon, serta berbagoi nafsu nyo bodoh ngan membehayoko nyo nak menengolomko urang-urang ke delom kehancuron ngan kebinasaon. ¹⁰ Sabab, cinta doit iyelah akar deri segelo mocom kejahaton. Urang-urang nyo memburu doit elah menyimpang deri iman ngan menyikso diri dewek ngan berbagoi dukacita. ¹¹ Cuma hambok, kowe sebagoi mendesio deri Allah, jouhkolah dirime deri segelonyo iye. Kejarlah kebonoron, kesalehon, iman, kaseh, ketabahon, ngan kelomboton. ¹² Bejuanglah delom perjuangon iman nyo beik ngan bepogonglah podo hidop kekal nyo untoknye kowe memborikoh pengakuon nyo beik de hadopon neman saksi. ¹³ De hadopon Allah nyo memborikoh hidop atas segelo sesuatu ngan de hadopon Yesus Kristus nyo memborikoh pengakuon nyo beik ketiko behadopon ngan Pontius Pilatus, ake memerentahko kowe, ¹⁴ kironye kowe menjelonkoh perentah nie ngan hopi becacot ngan hopi becela hinggo kedetongon Tuhan kite Kristus Yesus. ¹⁵ Podo saat nyo detentukoh-Nye, Nye nak mengolehkoh diri-Nye sebagoi sikok-sikoknye Penguaso, Rajo atas segelo rajo, ngan Tuan atas segelo tuan. ¹⁶ Nyelah sikok-sikonye nyo kekal, nyo tinggal delom terang nyo hopi terhamperi, nyo hopi seurang pon pernah mengelek apo pacok mengelek-Nye. Bage Nye, segelo hormat ngan kuaso nyo kekal! Amin. ¹⁷ Sementaro iye, perentahko urang-urang kayo de zaman nie agar hopi sombong apo metekekoh harapon podo kekayaon nyo hopi pasto, cuma tarohlah haropon kepodo Allah, nyo ngan melimpah menyediakoh segelo sesuatu bage kite untok denikmati. ¹⁸ Perentahkoh mike untok bebuat baek, menjedi kayo delom perbuaton-perbuaton beik, menjedi urang nyo murah hati, ngan siap bebage. ¹⁹ Ngan demikion, mike nak mengumpulkoh reto bage diri mike dewek sebagoi dasar nyo beik untok maso nyo nak detong sehinggo mike pacok bepegang podo hidop nyo sesunggohnye. ²⁰ Timotius, jagolah apo nyo elah depecayokoh kepodome. Hindarilah percakapon nyo duniawi ngan omong kosong ngan pertentangon nyo secaro salah desobut "pengetahuon", ²¹ nyo ngan mengakuinyo, iman beberapo urang menjedi menyimpang. Anugerah menyertai kowe.