(Salam deri Petrus) ¹ Deri Petrus, seurang rasol Yesus Kristus, kepodo urang-urang nyo tinggal sebagoi urang aseng, nyo tesebar de segelo wilayah Pontus, Galatia, Kapadokia, Asia ngan Bitinia; nyo depileh ² sejak tekalohe uleh Allah Bepa melalui pengudoson uleh Roh untok depot hidop delom ketaaton kepodo Kristus Yesus ngan memperuleh perecekon deroh-Nye : Kironye anugrah ngan damai sejahtera melimpah pocokme! ³ Terpujilah Allah ngan Bepa deri Tuhan kite Yesus Kristus, nyo sesuoi ngan anugrah-Nye nyo sajo godong, lah melaherko kite belek ke delom pengharopon nyo hidop melalui kebangketon Kristus Yesus deri antaro urang mati, ⁴ ngan untok mewaresi reto pesako nyo hopi pacok benaso, hopi pacok rosak, ngan hopi pacok layu; nyo tesimpan de surga untok kowe, ⁵ nyoiye kowe nyo delindongi uleh kuaso Allah melalui iman keselamaton nyo siap denyatoko podo akher zaman. ⁶ Delom nielah kowe sajo besukacita, sekalipon untok sementaro waktu, munye depereluko, kowe haros menderita berbagoi macam pencobaan ⁷ sehinggo imanme nyo lobeh berega deripodo emas nyo fana, sekalipon lah teruji uleh apo, tebukti murni ngan menghaselko pujion, kemuliaon, ngan kehormaton podo saat penyataon Yesus Kristus. ⁸ Kowe bolom perenah mengola enye, cuma kowe mengasehe-Nye, ngan meskipon kinie kowe hopi menoleh-Nye, cuma kowe pecayo kepodo-Nye. Kowe begembira ngan sukacita nyo hopi teboekoh ngan nyo deponohi kemuliaon, ⁹ ulehnyo akher deri tujuon imanme sedang tecapai, nyoiye keselamaton jiwome. ¹⁰ Tentang keselamaton nie, para nabi nyo menubuatko anugrah nyo nak menjedi melekme iye lah menyeledeki ngan mempelajorinye ngan sajo teliti. ¹¹ Mike delok tahu tentang siape ngan kapankah waktu nyo demaksud uleh Roh Kristus nyo ado delom diri mike tekalo Ye menebuatko penderitaon Kristus ngan kemuliaon nyo nak detong sesodahnye. ¹² Kepodo para nabi iye denyatoko behwa mike bukon melayani diri mike dewek, cuma melayani kowe delom hal-hal nyo kinie lah desampoiko kepodome melalui urang-urang nyo mengabarko Injil kepodome ngan Roh Kudus nyo deutus deri sorga; hal-hal iyelah nyo sajo endok desaksiko uleh para malaikat. ¹³ Ulehnyo iye, siapkolah akal budime ngan waspadalah, potekolah pengharoponme seponohnye podo anugrah nyo nak deboriko kepodome saat Kristus Yesus denyatokoh. ¹⁴ Sebagoi anak-anak nyo taat, jengonlah tondok kepodo nafsu jahatme upa tekalo kowe lagi hidop delom kebodohon me, ¹⁵ cuma kuduslah delom segelo tingkoh lakume, upa Allah nyo memantolime adolah kudus. ¹⁶ Sabab ado tetoles, "Kuduslah kowe ulehnyo ake kudus." ¹⁷ Ngan, munye kowe memantou-Nye sebagoi Bepa, nyoiye Nye nyo menghakemi setiap urang sesuoi perbuaton mike tanpa membeda-bedako, hidoplah delom raso takot selamo kowe lage tinggal sebagoi urang aseng; ¹⁸ ngan mengetahui behwa kowe sodah detobos deri caro hidop nyo sio-sio, nyo kowe warasi deri nenek puyangme, bukon ngan barang nyo fana upa emas apo perak, ¹⁹ meloenko ngan dero Kristus nyo mulia, dero Anak Domba nyo hopi becacat ngan nyo sempurna. ²⁰ Sabab, Kristus sodah depileh sebolum dunia deciptako, cuma Ye baru denyatoko podo zaman akher nie demi kowe. ²¹ Melalui Nye, kowe menjedi pecayo kepodo Allah; iyelah Allah nyo membangketko-Nye deri antaro urang mati ngan Allah nyo memboriko kemuliaon kepodo-Nye, empoknyo iman ngan pengharoponme adolah de delom Allah. ²² Ulehnyo kowe sodah mnjerenehko jiwome delom ketaaton kepodo kebonoron sehinggo memeleki kaseh pesaudaraon nyo tulus, mengka ayoklah saleng mengasehi ngan sungguh-sungguh deri hati nyo murni, ²³ sabab kowe lah delaherko buik, bukon deri beneh nyo depot mati, meloenko deri beneh nyo hopi depot mati, nyoiye melalui firman Allah nyo hidop ngan tinggal tetap. ²⁴ Kitab Suci bekehato, "Segelo nyo hidop adolah upa rumput, ngan segelo kemuliaonnye upa bunga rumput; Rumput layu ngan bunganye gugur, ²⁵ cuma, firman Tuhan tetap selamo-lamonye." Ngan, Firman iye adolah Injil nyo deberitako kepodome.