(Nubuat ngan Beheso Lidah) ¹ Kejarlah kaseh ngan endokolah ngan songgoh-songgoh karunia-karunia ngan rohani, terutamo empoknyo kowe depot benubuat. ² Sabab, siape nyo boek delom beheso lidah, hopi boek kepodo mendesio, cuma kepodo Allah; ulenyo hopi ado urang nyo mengerti, cuma ye memboeko hal-hal nyo resio delom roh. ³ Hambok, urang nyo benubuat boek kepodo mendesio untokmembengun, nasehat, ngan penghiboron. ⁴ Urang-urang nyo boek delom beheso lidah membengun dirinyo dewek, cuma urang nyo benubuat membengun jemaat. ⁵ Ake beharop kowe segelo boek delom beheso-beheso lidah, cuma telobeh lagi empoknyo kowe benubuat. Urang nyo benubuat lobeh godong deri pado urang nyo boek delom beheso lidah, kecuali munye enye jugo mengartikonye sehingga jemaat depot nerimo penogohon. ⁶ Dolor-dolorke, munye ake jongok ngan kowe ngan boek delom beheso-beheso roh, ape untongnnye bageme, kecuali munye ake boek kepodome ngan penyataaon, pengetahuon, nubuaton, apo pengajoron? ⁷ Bahkan barang-barang nyo hopi benyawo, upa soleng apo kecapi nyo mengeluorko bunyi, munye hopi mengeluorko perbedaon delom pemboekonye, upa mone urang depot mengetahui alat ape nyo edang demoenko, soleng apo kecapi? ⁸ Apo, munye terompet mengeluorko suaro nyo hopi jelas, siapolah nyo nak mempersiapko diri untok beperang? ⁹ Demikan jugo kowe. Munye ngan lidahme, kowe mengucapko kato-kato nyo hopi depot demengerti, upa mone urang tahu ape deboeko? Seolah-olah kowe boek kepodo udara. ¹⁰ Mongken ado begitu lobot jenis beheso de dunia ngan hopi sikok pon deri podonye nyo hopi bemakna. ¹¹ Hambok, munye ake hopi tahu arti beheso iye, ake nak menjedi urang aseng bage enye nyo boek, ngan urang nyo boek iye menjedi urang aseng bageke. ¹² Demikian jugo kowe, ulenyo kowe songgoh-songgoh beusaha untok karunia-karunia rohani, beusahalah empoknyo bekelimpahon untok membengun jemaat. ¹³ Ulenyo iye, hendoklah urang nyo boek delom beheso lidah bedoa empoknyo enye depot mengertikonye. ¹⁴ Sabab, munye ake bedoa delom beheso lidah, roh ke bedoa, cuma pekeronke hopi bebuah. ¹⁵ Jedi, apokah nyo haros ake lakuko? Ake nak bedoa ngan roh ke ngan ake jugo nak bedoa ngan pekeronke. Ake nak benyanyi ngan rohke ngan ake jugo nak benyanyi ngan pekeronke. ¹⁶ Munye kowe anyo mengucap syokor ngan rohme, upah mone ngan urang, nyo ado delom posisi hopi mempunyoi karunia iye, depot boek, "Amin," pocok ucapon syokorme iye ulenyo nye hopi ngereti ape nyo kou boeko? ¹⁷ Sekalipon kowe mengucap syokor ngan beik, cuma urang loen hopi debengun. ¹⁸ Ake besokor krpodo Allah bahwa ake boek delom beheso-beheso lidah lobeh deri kowe segelonnye. ¹⁹ Hambok, delom jemaat, ake lobeh beik boek lima kato ngan pekeronke empoknyo ake jugo depot ngejar urang loen, deri pado sepoloh kato delom beheso lidah. ²⁰ Dolor-dolor, jengon menjedi budak-budak dlom pekeronme. Jedilah budak abang delom kejahaton, cuma delom pemekeronme jedilah dewasa! ²¹ Upah tetoles delom Hokom Taurat, "Uleh urang-urang nyo mempunyoi beheso aseng ngan uleh molot urang-urang aseng, Ake nak boek kepodo bengeso nie, cuma mike hopi nak mendongorko Ake, firman Tuhan." ²² Jedi Beheso-beheso lidah adolah tando, bukon untok urang nyo pecayo, cuma untok urang nyo hopi pecayo, sedangko bernubuat adolah tando, bukon untok urang nyo hopi pecayo, cuma untok urang nyo pecayo. ²³ Munye segelo jemaat bekompol besamo delom suatu deman, ngan segelonye boek ngan beheso-beheso lidah, lalu ado urang-urang nyo hopi mengereti apo urang-urang hopi pecayo masok, hopilah mike nak mboeko bahwa kowe sodah gila? ²⁴ Hambok, munye segelonye bernubuat, kemudion ado urang nyo hopi pecayo apo urang nyo hopi pecayo apo urang nyo hopi tereti masok, ye nak desdarko ule segelonye ngan denilai uleh segelonye. ²⁵ Resio delom hatinye nak nyato, ye nak tesongkor, ngan menyembah Allah, mengakui bahwa sesonggohnye Allah ado de antaro kowe. ²⁶ Jedi, selanjotnye upamone, Dolor-dolor? Ketika kowe bekompol, maseng-maseng mempunyoi mazmur, pengajoron, penyataaon, beheso lidah, apo sebuah penafsiran. Biarlah segelo nie delakuko untok membengun. ²⁷ Munye ado nyo bebeheso lidah, biarlah anyo dua apo paleng lobot tiga urang, ngan maseng-maseng secaro begantion, ngan haros ado urang loen nyo mengartikonnye. ²⁸ Hambok, munye hopi ado nyo mengartiko, ye haros diom delom jemaat ngan biarlah nye boek kepodo dirinye dewek ngan kepodo Allah. ²⁹ Biarlah anyo dua apo tiga nabi nyo boek ngan nyo loen mempertimbangkonnye. ³⁰ Hambok, munye penyataon debuat untok urang loen nyo dodok de sane, urang nyo pertamo haros diom. ³¹ Sabab, kowe segelo depot bernubuat dikok demi sikok, empoknyo segelonye depot belajor ngan segelonye depot dekuatko. ³² Roh-roh para nabi tondok kepodo para nabi. ³³ Sabab, Allah bukonlah Allah deri kekacauon, meloenko damai sejahtera, samo upa delom segelo jemaat urang-urang kudus. ³⁴ Betina haros tetap diom delom jemaat ulenyo mike hopi deejenko untok boek, meloenko haros tondok seupamone Hokom taurat jugo memboekonnye. ³⁵ Munye ado sesuatu nyo endok mike pelajori, biarlah mike betanyo kepodo lakinye de rumah ulenyo adolah hal nyo memaluko bage betina untok boek delom jemaat. ³⁶ Apokah firman Allah berasal deri kowe? Apo, apokah anyo kepodome bae firman iye desampoiko? ³⁷ Munye ado nyo bepeker bahwa ye adolah seurang nabi apo urang nyo rohani, biarlah ye mengenali bahwa hal-hal nyo ake tules kepodome adolah perintah Tuhan. ³⁸ Munye ado urang nyo hopi mengenali nie ye hopi dekenali. ³⁹ Jedi, Dolor-dolorke, usahkolah ngan songgoh-songgoh untok benubuat, ngan jengon melarong urang boek delom beheso-beheso lidah. ⁴⁰ Hambok, segelonye haros delakukoh ngan sopan ngan teator.