(Karunia-karunia jak Roh Kudus) ¹ Kinie karunia-karunia rohani, Dolor-dolor, ake hopi endok kowe hopi mengetahuinye. ² Kowe tahuko bahwa tekalo kowe lagi menjedi urang-urang nyo bolom mengenal Allah, kowe desosotko kepodo berhelo bisu, sebagaimone kowe depempen. ³ Ulenyo iye, ake melabehko kepodome bahwa hopi sikok pon, nyo boek, uleh roh Allah, nyo boek, "Yesus terkotok," ngan hopi ado sikok pon nyo depot boek, "Yesus adolah Tuhan," seloen uleh roh kudus. ⁴ Ado bebage karunia rohani, cuma Rohnye samo. ⁵ Ngan, ado bebage pelayanon, cuma Tuhanye samo. ⁶ Ado bebage gaweon, cuma Allah nyo samo nyo gaweko segelo sesuatunye delom segelo urang. ⁷ Kepodo tiap-tiap urang dekaruniako penyataon Roh untok kebeikon besamo. ⁸ Kepodo nyo sikok deboriko Kato-kato hikmat melalui Roh ngan kepodo nyo loen kato-kato pengetahuon uleh Roh nyo samo. ⁹ Kepodo nyo loen deboriko iman uleh Roh nyo samo, kepodo nyo loen karunia-karunia penyembohon uleh Roh nyo sikok iye. ¹⁰ Kepodo nyo loen deboriko gaweon-gaweon mukzizat, ngan nyo loen nubuaton.Kepodo nyo loen deboriko kemampuon untok membedako roh-roh, kepodo nyo loen bebagai macam beheso lidah, ngan nyo loen mengartiko beheso-beheso lidah iye. ¹¹ Segelonyo nie degaweko uleh Roh nyo sikok ngan nyo samo, nyo membage kepodo maseng-maseng urang, upah nyo Nye kehendoki. ¹² Samo upa badan adolah sikok, cuma mempunyoi neman anggota, ngan segelo anggota badan, walaupon neman, adolah sikok badan, upaiyoy pula Kristus. ¹³ Sabab, uleh sikok Roh, kite segeloh lah debabtes ke delom sikok badan, beik urang Yahudi maupon orang Yunani, beik budak maupon urang merdeka, ngan kite segelo debori minom deri sikok Roh. ¹⁴ Ulenyo badan hopi togok deri sikok anggota, cuma neman anggota. ¹⁵ Munye kaki boek, "ulehnyo bukon tangon, jedi ake bukon bageon deri badan," hopi berarti nye bukon bageon badan. ¹⁶ Ngan, munye telinga boek, "Ulenyo ake bukon mato, ake bukon anggota badan," hopi berarti nye bukon bageon badan. ¹⁷ Munye segelo badan adolah mato, demonelah pendongoron? Munye segelonye adolah telinga, demonelah penciomon? ¹⁸ Hambok, kinie Allah lah menempatko anggota-anggota iye, setiap urang deri mike, de delom badan, sebagaimone nyo Ye kehendoki. ¹⁹ Munye segelonye adolah sikok anggota, demonelah badan? ²⁰ Jedi, memang ado neman anggota, cuma anyo sikok badan. ²¹ Sabab iye, mato hopi pacok boek kepodo tangon, "Ake hopi membotohkome!" Apo lagi, kepalo kepodo kaki, "Ake hopi membotohkome!" ²² Sebeleknye, anggota-anggota badan nyo tampaknye lobeh lamah sebonornye nyo paleng debotohko. ²³ Ngan, anggota-anggota badan kito peker kurang tehormat, justru borikolah penghormaton lobeh. Ngan, anggota-anggota badan, nyo kito anggap kurang layak tampel, haros debuat untok lobeh layak tampel, ²⁴ Ulenyo bageon-bageon nyo sodah layak tampel hopi memerelukonye. Hambok, Allah lah mengator badan iye ngan memboriko penghormaton lobeh godong kepodo anggota-anggota nyo kekurangon, ²⁵ empoknyo hopi ado pepecahon delom badan, meloenko empoknyo anggota-anggota iye depot memperhatiko sikok ngan nyo loen. ²⁶ Munye sikok anggota menderita, segelo anggota menderita besamonye. Munye sikok anggota demuliako, segelo anggota besukacita besamonye. ²⁷ Kinie kowe adolah badan Kristus ngan kowe maseng-maseng adolah anggota-anggotanye. ²⁸ Allah lah menetapko delom jemaat, pertamo adolah para rasul, kedua adolah para nabi, ketiga adolah para guru, kemudion mukzizat, karunia-karunia penyembahon, pertolungon, kepemempenon, ngan berbagai-bagai beheso. ²⁹ Apokah segelonye rasul? Apokah segelonye nabi? Apokah segelonye guru? Apokah segelonye adolah pembuat mukjizat? ³⁰ Apokah segelonye memeleki karunia penyembohon? Apokah segelonye boek ngan beheso-beheso? Apokah segelonye mengartiko? ³¹ Hambok, endokolah ngan songgoh-songgoh karunia-karunia nyo sajo godong. Ngan, ake nak menonjoko kepodome jelon nyo jouh lobeh beik.