¹ Sabab, ake hopi endok kou hopi mengetahuinye, dolor-dolor, behwo para nenek puyang kite, segeloye ado de bewoh awan ngan segelonye melewati lout. ² Mika segelo debaptis delom Musa, de delom awan ngan de delom lout. ³ Mika segelo makon makonon rohani nyo samo, ⁴ ngan segelonye minom minumon rohani nyo samo. Sabab, mika minom deri Betu rohani nyo milu besamo mika, ngan Betu iye adolah Kristus. ⁵ Meskipon demikion, Allah hopi bekenan ngan sebageon godong deri mika. Ulenyo iye, mika detewasko de padang belantara. ⁶ Kinie, hal-hal nie de jediko contoh bage kite empoknyo kite hopi menjedi urang nyo bekehendok jahat sebagoimone mika mengendokkonye. ⁷ Jengon menjedi penyembah berhelo upa beberape deri mika, upa nyo tetoles, " Bengeso iye duduk untok makon ngan minom, lalu jego untok begurou." ⁸ Jengon kite melakuko perzinahon upa nyo delakuko beberape deri mika sehinggo 23 ribu urang teelek delom sehari. ⁹ Kite jugo hopi buleh mencuboi Tuhan, upamone beberape deri mika jugo mencuboi ngan debinasako uleh ulor-ulor. ¹⁰ Jengon jugo besungut-sungut upamone mika jugo besungut-sungut ngan debinasoko uleh melekat maot. ¹¹ Hal-hal nie terjedi atas mika sebagoi contoh ngan detulisko sebagoi peringaton bage kite, nyo kepodo siape akher zaman lah njongok. ¹² Ulenyo iye, biarlah urang nyo menyangko munye dirinye toguh togok waspado empoknyo nye hopi titek! ¹³ Hopi ado pencobaon nyo perenah menimpame kecuali pencobaon nyo biaso bage mendesio. Ngan, Allah adolah setia, Enye hopi nak membiarko kou decuboi melobihi kemampuonme. Hamboknyo, besamo ngan pencubaon iye, Enye jugo nak menyediako jelon keluor empoknyo kou depot menanggungnye. ¹⁴ Ulenyo iye, dolor-dolorke nyo kekaseh, jouhkoleh dirime deri penyembahon behelo. ¹⁵ Ake boek upa ngan urang-urang nyo bijaksana, pertimbangkolah ape nyo kuboekko. ¹⁶ Bukonkah cawan berkat nyo kite syukuri iye adolah persekutuon delom deroh Kristus? Ngan, bukonkah roti nyo kite pecahko iye adolah persekutuon delom badan Kristus? ¹⁷ ulenyo ado sikok roti, mengka kito nyo neman nie adolah sikok badan;ulenyo kite segelo menjedi bageon deri sikok roti iye. ¹⁸ Perhatikolah urang-urang israel, bukonkah mika nyo makon persembahon ngambek bageon delom altar? ¹⁹ Jedi, apekah maksudke? Apekah makanon nyo depersembahko kepodo berhelo adolah sesuatu? Atau, apekah berhelo adolah sesuatu? ²⁰ Hopi. Ake memboeko kepodome bahwa hal-hal nyo bengso-bengso loen korbanko, mike mengorbankonye untok roh-roh jahat, bukon untok Allah. Ngan, ake hpi endok kowe besekutu ngan roh-roh jahat. ²¹ kowe hopi boleh minom cawan Tuhanngan jugo cawan roh-roh jahat. Kowe hopi pocok menjedi bageon deri jamuon Tuhan ngan jamuon roh-roh jahat. ²² Apo, apokah kite membangketko kecemburuon Tuhan? Apokah kito lobeh kuat deri pado enyo? Hidop untok Memuliako Allah ²³ "Segelo sesuatu deperbulehko," cuma hopi segelonye beguna. " Segelo sesuatu deperbulehko," cuma hopi segelonnye membengun. ²⁴ Jengon ado sikok pon nyo ndelok kebeikon untok diri dewek, meloenko kebeikon urang loen. ²⁵ Makonlah apo bae nyo dejual de pasar degeng tanpo memeriksonye, demi hati nurani. ²⁶ Ulenyo, bumi ngan segelo isinye adolah melek tuhan. ²⁷ Munye seseurang nyo bolom pecayo mengundangme ngan kowe untok lari, makonlah apo bae nyo depotekko de hadoponme tanpo memeriksonye, deri hati nurani. ²⁸ Hambok, munye ado urang boek kepodome, " Makonon nie lah depersembahko kepodo berhala," jengon kou makon, demi urang nyo membori tahumu iye ngan demi hati nurani. ²⁹ Maksodke, bukon demi hati nuranime dewek, cuma hati nurani urang loen. Mengka kebebasonke detentuko uleh hati nurani urang loen? ³⁰ Munye ake mengambek bageonke ngan ucapon syukur, mengka ake desalohko uleh makonon nyo pocoknye ake mengucapko syukor? ³¹ Jedi, entah kou makon apo minom, atau apo bae nyo kou lakukoh, lakukolah segelonyo iye untok kemuliaon Allah. ³² Jengon membuat urang tepantok, beik urang Yahudi, urang Yunani, maupon Jemaaat Allah, ³³ upa ake jugo delom segelo hal menyenangko segelo urang, tanpa mendelok keuntongonku dewek, cuma keuntongon untok urang lobot empoknyo rombongon depot deselamatko.