¹ Dari Paulus, rasul Yesus Karistus oleh kamaoan Jubata untu' maritaatn janji parihal idup daapm Karistus Yesus, ² untu' Timotius, anakku nang ku ngasihi'k: kasih karunia, rahmat ba damai sajahtra dari Jubata ba Karistus Yesus, Tuhan diri'k, nyaratai kao. ³ Aku ngucap sukur ka Jubata, nang ku ngalayani'k ba ati nurani nang murni aya nang di mabuat ene'k moyangku. Ba sau aku ngingat kao daapm pamohonanku, baik siakng ge'k pun maam. ⁴ Ba kade'k aku takanang ka ai'k matanyu nang kao netepatn koa, aku mao'k sidi nee'k kao agi'k biar panuh kasukaanku. ⁵ Barang aku taringat ka imannyu nang tulus iklas, yakoa iman nang doho'k idup ka daapm eneknyu Lois ba ka daapm uwe'knyu Eunike ba nang aku yakin idup uga'k ka daapm diri'knyu. ⁶ Barang koalah ku ngingati'k kao untu' ngobaratn karunia Jubata nang ada ka kao di panumpangan kokotku ka atasnyu. ⁷ Barang Jubata mareatn ka diri'k buke' roh gai'k, tapi roh nang mangkitatn kakuatan, kasih ba katertipan. ⁸ Jadi amelah supe'k basaksi tentang Tuhan diri'k ba amelah supe'k karna aku, urakng nang dingukum karna Ia, tapi ikutlah menderita untu' Injil oleh kakuatan Jubata. ⁹ Ia lah nang nyalamatatn diri'k ba nang nyarui'k diri'k ba dama nang kudus, buke' badasarkan perbuatan diri'k, tapi badasarkan maksut ba kasih karunia-E, nang udah dingaruniakanka diri'k daapm Karistus Yesus sanape'k pamulaan jaman ¹⁰ ba nang ampeatn dinyatakan di kaatangan Juruselamat diri'k Yesus Karistus nang di Injil udah matahatn kuasa maut ba ngatangan idup nang ina'k bisa binasa. ¹¹ Untu' Injil nyianlah aku udah dinatapatn jaji pambarita, jaji rasul, ba jaji guru. ¹² Barang koalah aku ngarasaatn penderitaan samua nyian, tapi aku ina' supe'k; barang aku nauan ka sae aku picaya'k ba aku yakin kade' Ia bakuasa miharaatn ahe nang udah Ia micayatn ka aku sampe ka ari Tuhan. ¹³ Singiiklah sagala sasuatu nang udah kao nangar dari aku untu' jaji contoh ajaran nang sehat ba pabuatlah koa daapm iman ba kasih daapm Yesus Karistus. ¹⁴ Piharalah harta nang gagas, nang udah dimicayaatn Dihe ka diri'k, di Roh Kudus nang diapm ka daapm diri'k. ¹⁵ Kao nauan kade'k samua kabatnne nang ka daerah Asia Ene'k bapaling dari aku; termasuk Figelus ba Hermogenes. ¹⁶ Jubata kira'k e ngaruniaatn barakat-Te ka kaluarga Onesiforus nang udah baulang-ulang nyagaratn atiku. Ia ina'k supe'k namui'k aku ka daapm pinjara. ¹⁷ Sawaktu ka Roma, ia barusaha ngagui'k aku ba udah namui'k aku. ¹⁸ Kira'e Jubata nojokatn barakat-Te ka ia ka ari-E ana. Manyak sidi palayanan nang ia mabuat ka Efesus kao labih nauan koa dari pada aku.