¹ Surat dari Paulus, nang oleh karana kamaoan Jubata dinyaru' jaji murit Kristus Yesus, uga' dari Sostenes, kamaru' diri', ² ka pakomo'an urak'ng-urak'ng nang picaya ka Jubata nang ada ka Korintus, kabat'ne koa nang udah dingudusat'n ka daap'm Yesus Kristus, ba nang dah dinyaru' jaji urak'ng-urak'ng nang kudus, ba ka samua urak'ng ka saganap abut ba tampat, nang sau nyampado dama Jubata diri', Yesus Kristus, Jubata kabat'ne ba Jubata diri'. ³ Kasih barakat dari Jubata, Apa' diri', uga dari Jubata Yesus Kristus nyaratai' kita' samua'e. ⁴ Aku sau ina' hane baranti ngucapat'n sukur tarima' kaseh ka Jubata nang udah Ia mareat'n ka kita' ka daap'm Yesus Kristus. ⁵ Ka daap'm Ia kuihantlah kita' dah jaji ma'mor ka daap'm sagala macam kata ba sagala macam ilamu pangatahuat'n, ⁶ sasuai ba ahe nang udah dinyaksiat'n parihal Kristus, nang udah dinaguhat'n ka antara kita'. ⁷ Ayakuihanlah kita' ina' bakakurangan ka daap'm karunia pamare' Jubata, samintara kita' ngantiat'n kaatangan Jubata diri', Yesus Kristus. ⁸ Ia kuihan nang udah naguhat'n kita' ana sampe sagalae aka', sampe kita sa'utuhe tarigas baraseh waktu ari Jubata, Yesus Kristus koa atak'ng. ⁹ Jubata nang udah nyaru' kita' ka daap'm pakomoan ba anak-E Yesus Kristus, Jubata diri', Ia koa satia. ¹⁰ Aku nasehati kita' samua page kamaru', demi dama Jubata diri' Yesus Kristus, supaya kita sete' kata, sete' pandapat, ame ada papacahat'n ka antara kita', sabalike supaya kita' samua'e basatu ba sete' pikiran pandapat. ¹¹ Sabape, samua page kamaru', aku udah dimare' nauan di urak'ng-urak'ng dari page kamaru' Kloe parihal kita', aku nangar ka antara kita' sau batengkes ihane. ¹² Nang aku maksutat'n koa, ka antara kita' koa ada nang bakata jare: Aku nyian dari golongan Paulus, ada nang bakata, aku dari golongan Apolos. Ada nang bakata, aku dari golongan Kefas. Atau aku nyian dari golongan Kristus. ¹³ Ada me Kristus koa tabagi-bagi? Ada me Paulus koa dinyalipat'n karana kita'? Ada me kita dimaptis ka daap'm dama Paulus? ¹⁴ Aku sau barucap sukur ihane, kade' ina' seko' urak'ng pun ka antara kita' nang aku baptis, salain Krispus ba Gayus, ¹⁵ sampe ina' ada agi' urak'ng matakat'n bahwa kita' samua dimaptis ka daap'm damaku. ¹⁶ Ayakoa uga page kamaru' Stefanus, aku nang maptisnya. Salain kabat'ne aku ina nauan, antahlah ada agi' urak'ng nang aku baptis. ¹⁸ Pambaritaat'n parihal salib nyian memang sidi barita alok bagi urak'ng nang memang dah matia' ihane, tapi bagi diri' nang udah dinyalamatat'n pambaretaan nyian kakuatan dari Jubata. ¹⁹ Ada nang dah nulis doho are' aya nyian: Aku mao' matiat'n kapintarat'n urak'ng-urak'ng nang marasa diri'e pintar, ba kasalehat'n urak'ng-urak'ng tarigas mao Kubuak'ng". ²⁰ Kamae ampuse urak'ng-urak'ng nang cancik'ng tarigas? Kamae ampuse ahli Kitab? Kamae ampuse urak'ng nang sau babantah ihane? Buke'nya Jubata udah minjawat sagala kapintarat'n ka dunia nyia jaji kabagaat'n? ²¹ Karana dunia nyian, ka daap'm hikmat Jubata, ina' nganal Jubata karana hikmate, angke kuihanlah Jubata mao' nyalamatat'n kabat'ne nang picaya' oleh kabagaat'n pambaritaan Kabar Baik. ²² Urak'ng-urak'ng Yahudi sau maoan tanda mujijat, urak'ng-urak'ng Yunani bagago' kapintarat'n, ²³ tapi kami maritaat'n Kristus nang udah dinyalipat'n: onto' urak'ng-urak'ng Yahudi jaji batu nang bisa minjawat dangan jantu' tasongkop, onto' urak'ng-urak'ng nang buke' Yahudi jaji kabagaat'n. ²⁴ onto' kabat'ne nang dinyaru', baik nya koa urak'ng Yahudi, mao'pun nang buke' Yahudi, Kristus koa kakuatat'n Jubata ba hikmat Jubata. ²⁵ Samua'e nang dinganggap kabagaat'n dari Jubata labih aya' hikmate dari talino, nang lamah dari Jubata, labih kuat dari talino. ²⁶ Ingatat'n maan nyian boh page kamaru', ayamae pun kaadaan kita' waktu kita' dinyaru', manurut pamandangan talino ina' manyak urak'ng nang cancik'ng tarigas, ina' manyak urak'ng nang bapangaruh, ina' manyak urak'ng nang tapandang. ²⁷ Tapi ahe nang baga bagi dunia nyian, dimilih Jubata onto' minjawat supe' urak'ng-urak'ng nang koat. ²⁸ ahe nang ina' tapandang, ahe nang kodo saranta' antas, dimilih Jubata, ahe nang ina barati agi' ka dunia nyian, dimilih Jubata onto' ngancurat'n ahe nang dianggap barati, ²⁹ supaya ame ada seko' urak'ng pun nang nagaat'n diri'e ka adapat'n Jubata. ³⁰ Karana Jubatalah kita' ada ka daap'm Kristus Yesus, nang oleh Jubata udah jaji hikmat bagi diri'. Jubatalah nang manarat'n ba ngudusat'n ba nabus diri' dari kasalahat'n. ³¹ Aya nang suah dinulis dee are': "Sae nang mao' nagaat'n diri'e, tagaat'nlah koa ka daap'm Jubata.