¹ Pado waktu yok, datakng kepado Yesus duo tigo ikuk urakng maik kesoh tontakng urakng-urakng Galilea, yang daroh ah dicampur Pilatus dengan daroh korban yang sidok pesomoh. ² Yesus nyohut sidok, "Songkok ikint urakng-urakng Galilea tuk lobih bakoh doso ah dari pado semuo urakng Galilea yang laint, kareno sidok ngalamp naseb beok? ³ Bon! kato-Aku kepado ikint. Tapi kalau ikint abon betobat, semuo ikint akant binaso secaro beok. ⁴ Atau songkok ikint lapant bolas ikuk mensio yang mati ditingakng menaro dampikng Siloam, lobih bakok kesaloh ah dari pado kesaloh semuo urakng yang ado di Yerusalem? ⁵ Bon! kato-Aku kepado ikint. Tapi kalau ikint abon betobat, semuo ikint akant binaso secaro beok." ⁶ Lalu Yesus ngesoh perumpamo tuk, "Surakng ado puhunt aro di kobunt angor io, dant io datakng untuk ngogok buoh ah, tapi bonsik napat ah. ⁷ Lalu io bejantoh kepado pengurus kobunt angor yok, doh tigo tahunt aku datakng untuk ngogok buoh puhunt aro tuk tapi aku bon kalok napat ah. Tobakng puhunt tuk! Untuk apai io idupt di tanoh tuk dengan percumo! ⁸ Cohut urakng yok, Tuhok, io idupt tahunt tuk gik, aku akant nyangkol tanoh sekelilikng ah dan morik pupuk ah, ⁹ mungkint tahunt nono io bebuoh; tik abon, ditobakng am! ¹⁰ Sutik ketiko Yesus tongoh ngajar dalamp sebuoh gerejo pado ari Sabat (Mingu). ¹¹ Diok ado sikuk betinok yang udoh lapant bolas tahunt dirasok roh sehingo io bungkok pungukng ah dant bon dapat bediri dengan bujur. ¹² Ketiko Yesus mantau betinok yok, Io nimpai ah dant bejantoh kepado io, "Hai umok, pemodih duant udoh somuh." ¹³ Lalu Io ngelotak jari-Ah ke betinok yok, seketiko yok gam bediri am betinok yok dant ngemulio Allah. ¹⁴ Tapi kepalok gerejo yok dedoh kareno Yesus nyomuh urakng pado ari Sabat, lalu io bejantoh kepado urakng banyak, "ado onam ari untuk kerojo. Kareno yok, datakng pado ari-ari yok untuk disomuh, nang pado ari Sabat." ¹⁵ Tapi Tuhant nyohut io, jokuk-Ah, "Hai urakng-urakng munafik, bon kah setiap urakng diantaro ikint ngelopas sapi atau kamikng ah pado ari Sabat dant maik ah ke orukng minum? ¹⁶ Abon kah betinok tuk, udoh lapant bolas tahunt ditomit iblis, arus dilopas dari penomit ah, kareno io adolah keturunt Abraham?" ¹⁷ Dant waktu Io bejantoh beok, semuo lawan-Ah kemolut dant banyak urakng ngayoh kareno hal mulio yang udoh dipuloh Io. ¹⁸ Mako jokuk Yesus, "Seumpamo apai hal Kerajoant Allah dant dengan apai Aku ngumpamo-Ah? ¹⁹ Io ubo gigi ensabi, yang diamik dant ditanam urakng di kobunt, gigi yok belantakng jadi puhunt dant burukng-burukng di udaro besarakng di dahant-dahant ah." ²⁰ Dant Io bejantoh gik, "Dengan apai Aku ngumpamo Kerajoant Allah? ²¹ Io seumpamo ragi yang diamik dari surakng betinok dant diadok dalamp topukng terigu tigo sukat sampai tecampur semuo." ²² Lalu Yesus bekelilikng dari koto ke koto dant dari deso ke deso samil ngajar dant ngelanyut pejolant Io ke Yerusalem. ²³ Ado surakng yang bejantoh kepado Io, "Tuhant, siket am pai urakng yang diselamat?" ²⁴ Cohut Yesus kepado urakng-urakng diok, "Berusaho am untuk masok ngelalu pintu yang sempet yok! Kareno Aku bejantoh kepado ikint, banyak urakng yang begeloh masok, tapi bon dapat. ²⁵ Kalau tuhok yang ompuk laman doh uwas dant udoh nutup pintu, sementaro ikint bediri di luar dant nerotok pintu samil bejantoh, "Tuhok, bukok ke kami pintu! dant Io nyohut sidok Aku bon panai dari monai ikint datakng. ²⁶ mako ikint bejantoh, "Kami udoh makant minum di odapt duant dant Duant ngajar modoh di jalant-jalant koto kami." ²⁷ Tapi Io akant bejantoh kepado ikint, "Aku bon panai dari monai ikint datakng, ingkas am dari perodapt-Ku, hai ikint semuo yang ngerojo kejohat! ²⁸ Diint am akant ado tongis dant kerotamp gigi, ketiko ikint mantau Abraham, Ishak dant Yakub dant semuo nabi dalamp Kerajoant Allah, tapi dirik ikint dibuakng ke luar. ²⁹ Dant urakng akant datakng dari Barat dan Timur dant dari Utara dant Selatan dant sidok akant duduk makant dalamp Kerajoant Allah. ³⁰ Dant yang amat ah, ado urakng yang penudi tapi jadi yang olu dant ado yang olu jadi urakng yang penudi." ³¹ Pado waktu yok datakng duo tigo ikuk urakng Farisi dant bejantoh kepado Yesus, "Ingkas Duant dari orukng kami tuk, kareno Herodes onak munuh Duant." ³² Cohut Yesus kepado sidok, "Ingkas dant podoh kepado si serigalo yok, 'Aku nguser setant dant nyomuh urakng, ari tuk dengan obuk, dant pado ari ketigo Aku selosai.' ³³ Tapi aritu, obuk dant lusok, Aku arus norus pejolant-Ku, kareno abon sewajarlah surakng nabi dibunuh kalau abon di Yerusalem. ³⁴ Yerusalem, Yerusalem, ikau yang munuh nabi-nabi dant nuhuk dengan batu urakng-urakng yang dikirimp kepado ikint! Rapat Aku rinu ngutukng anak-anak kint, samo ubo inuk manuk nugutukng anak-anak ah di baboh sayap ah, tapi ikint belek. ³⁵ Tuk, laman ikint akant didudi dant jadi puakng gantakng. Tapi Aku bejantoh kepado ikint, ikint bon akant mantau Aku lagik sampai ikint bejantoh, "Diberokat am Io yang datakng dalamp namo Tuhant!"