¹ Menyadik-menyadik ti ku kaseh, tuk meh surat ti kedua ti aku tulis ngusung ikau. Awak kedua surat tuk, aku berusaha ngeyakin ke pemikir kau ti asli ngau cara ngingatke kau, ² nguleh ke ikau ingat jakuk-jakuk ti niak udah di padahke uleh nabi-nabi kudus. ³ Subak-subak, ketauk meh pas ari ti hemaduk lubah, bala pengejek datai nitih ke awa nafsu sidak ti bedusa. ⁴ Sidak akan bejakuk, "Ni janji penatai ya? Karna uduk ri inik muyang kitai nyau, semua'e agik tetap bejalai baka pas subak idup ya." ⁵ Karna sidak sengaja ngelupake kenyataan bahwa uleh firman ya, langit udah bisik uduk ri subak niak, ngau bumi di pulah ari aik. ⁶ Ngau aik nyak ugak, menua ti bisik waktu nyak di ancurke ngau aik bah. ⁷ Amat piak, uleh firman ti sebaka, langit ngau bumi ti bisik ntuk disimpan nguleh ke dipanduk ngau api pas ari pengakiman ngau pengancuran urang-urang budu. ⁸ Menyadik-menyadik ti ku kaseh, anang kelupa ke jakuk ti sutik tuk: Bagi Tuhan, sehari baka seribu taun ngau seribu taun baka sari. ⁹ Tuhan ndai kalak beugai-ugai nepati janji ya baka ti di anggap beberapa urang baka ketelambatan. Sebalik'e, Ia sabar ngusung kau karna Ia ndai kak surang pun nyau, tapi nguleh ke semua urang tauk datai betubat. ¹⁰ Ari penatai Tuhan akan datai baka urang ti ncuri, ngau langit akan nyau ngau auh ti kaya. Keba utai ti awak langit akan di makai api ti amat angat, ngau menua ngau isik'e ugak akan tepanduk abih. ¹¹ Tik semua utai di ancurke, ngau cara tuk, katibaka kah ikau karah idup? Bukai kah ikau karah idup bersih ngau nyembah ngusung Allah, ¹² sambil ngantik-ngantik ngau neraske ari penatai Allah? Pas ari Yuhan, langit ancur uleh api, semua utai awak langit ngelileh karna angat'e. ¹³ Amat piak, sesuai ngau janji Allah, kitai ngantik langit ngau bumi ti baru, awak urang-urang ti baik bedugau. ¹⁴ Menyadik-menyadik ti kukaseh, karna kitai ngantik utai tuk, maka beusaha meh ngau amat-amat nguleh ke Allah nemuke ikau ndai bedusa, ndai bisik noda, ngau damai ngusung Allah. ¹⁵ Anggap meh kesabaran Tuhan baka kesempatan untuk kitai nerimak keselamatan. Baka ti Paulus, menyadik ti kitai kaseh, tuliske ngusung kau ngau hikmat ti diberikke uleh Allah ngusung ya. ¹⁶ Ia ugak nyakuk ke utai-utai tuk alam semua surat ya ti laen. Mimang bisik utai ti mbar di ngerti sampai di kalih ke uleh utang-urang ti maguk ngau lemah iman ya. Sidak ugak mulah nyak awak bagian ti lain ari Kitab Suci, ti ngakibatke binasa awak dirik sidak kedirik. ¹⁷ Menyadik-menyadik ti ku kaseh, karna ikau udah ketauk ke tentang utai tuk, ati-ati meh nguleh ke ikau anang debaik sesat uleh penyalah ari urang-urang ti ndai ngelala ukum. Anangmeh ikau labuh ari iman kau ti teguh. ¹⁸ Amat piak, betumbuh meh alam anugerah ngau pengenalan akan Tuhan ngau Juru Selamat kitai, Yesus Kristus. Bagi Iyameh kemuliaan, ntuk datai ke lubah!Amin.