¹ Pede lo-lo oya, ketike sejumlah kul jema berkamul nye gere empu hana-hana ken i 'man, Isa menalu murid-murid-E nye bercerak ken pakea, ² "Aku berbelaskasihen ken jema delle oya entap siloni pakea ngek berurum-urum-Ku semokot tulu lo, nye gere empu hana-hana ken i'man . ³ Nye, ike Aku mengkeni pakea ulak ku umah pakea was keedeen lape, pakea male pengsan was perjelenen pakea sesideh ari pakea engeh ari gaib.'' ⁴ Nye, murid-murid-E menjeweb We,"Arihi sejema nguk mengkorongen pakea urum ruti i ton senyap unang ini?" ⁵ Lalu, Isa beruger ken pakea,"Sideh ruti di kam empu?" pakea menjeweb, ''Pitu ruti." ⁶ Nye, Isa mengkeni jema delle oya kunul i tanoh, nye We meneten pitu ruti oya, nye menugeren syukur, nye We memecah-mecahen'e, nye menosahen'e ken murid-muri-E tuk menghidangen ken jema delle. Pakea peh menghidangen'e ken jema delle. ⁷ Nye, Murid-murid peh empu tikik iken ucak. Ngemari menugeren syukur atas'e, Isa mengkeni murid-murid-E tuk membaginen peh iken-iken oya ken delle jema. ⁸ Jema delle oya man sawah korong, nye pakea mengkamulen keraten pan'en si tersisa oya putu keranyang kip. ⁹ Ara kire-kire opat ribu jema si man. Ngemari oya, Isa mengkeni pakea beluh. ¹⁰ Nye Isa Peh mayo perahu berurum murid-murid-E nye sawah i daerah Dalmanuta. ¹¹ Nye, jema-jema Farisi engeh nye mulei berdebat urum Isa, dang meniro Isa menunjuk'en tene ari surge , tuk mencubei-E. ¹² Ngemari Isa menghela kesah naru was Roh-E , We bercerak, "Haniti generasi ini menerah tene? Aku mencerak'en si sebenar'e ken'mu, gere ara sara peh tene si male i'osahen ken generasi ini." ¹³ Kemudien, Isa menaringen pakea, mayo mien ku was perahu, nye beluh ku seberang. 4 Murid-murid lupe memah ruti, nye renye empu sengkeret ruti i was perahu. ¹⁵ Nye, Isa berpesan ken pakea,"Siep sedieleh! Berhati-hatileh terhedep ragi jema-jema Farisi nye ragi Herodes." ¹⁶ Lalu Pakea mulei berdiskusi sara urum si laen soal pakea si gere gere empu ruti. ¹⁷ Nye, Ngemari membetihi hel ini, Isa bercerak ken pakea,"Hanati kam mencerak'en tentang kam si gere empu ruti? Hana kam ngilen membetihi ato mengerti? Hana ate'mu i'kerasen? ¹⁸ Hanakeh kam empu mata , tetape gere menengon? Nye, empu kemiring, tetepe gere memenge? Gere inget'keh kam, ¹⁹ Ketike Aku memecah-mecahen lime ruti tuk lime ribu jema, sideh delle keranyang si berisi kip urum keratan-keratan pan'en si kam kamulen?" Pakea menjeweb,"Roa belas keranyang." ²⁰ "Nye, ketike pitu ruti tuk opat ribu jema oya, sideh keranyang si kip urum keratan-keratan pan'en si kam kamulen?" pakea menjeweb, "Pitu keranyang." ²¹ Lalu, We bercerak ken pakea,"hanakeh kam ilen gilen mengerti?" ²² Kemudien , Isa nye murid-murid-E tibe i Betsaida. Nye , sesideh jema memah sejema bota nye memohon ken Isa kati menamat'e. ²³ Isa peh menamat pumu jema bota oya nye memah'e ke deret desa. Lalu, Isa menulihi mata jema bota oya nye meletak'en pumu-E atas we. We beruger ken'e, "Hanakeh kam menengon sesuatu?" ²⁴ Lalu, jema oya memandang ku atasa nye bercerak,"Aku menengon jema-jema tetape pakea terengon unang pohon-pohon si tengah remalan." ²⁵ Ngemari oya , Isa meletak'en pumu-E i atas mata jema oya mien, lalu jema oya menuke mata'e, penengonen'e jeger, nye we peh depet menengon mehne urum jelas. ²⁶ Lalu, Isa mengkeni'e ulak ku umah'e urum bercerak,"Enti mayo ku was desa." ²⁷ Ngemari oya, Isa beluh, berurum murid-murid-E, ku desa-desa i Kaisarea Filipi. Nye, i lah perjelenen, Isa berunger ken pere murid urum bercerak ken pakea,"Cerak jema-jema, sahen Aku ini?" ²⁸ Pakea menjeweb , "Yohanes Pembaptis, , si laen mencerak'en Elia, nye si laen'e salah sara ari nabi-nabi." ²⁹ Kemudien, Isa berunger ken pakea, "Namun, menurutmu, sahen Aku ini?" Petrus menjeweb-E, "Engko araleh Kristus." ³⁰ Nye, Isa memperingat'en pakea tuk gere memberitahuen ken sahen peh tentang diri-E . ³¹ Kemudien, Isa mulei mengejer murid-murid-E behwe Anak Manusie turah menderite delle hel nye i'tulak oleh tue-tue yahudi, imem-imem ulu, nye ahli-ahli Tauret, nye i'unuh , nye ngemari tulu lo uwet mien. ³² Nye, Isa mencerak'en hel ini secere teruke. Entap oya, Petrus menarik isa ku samping nye mulei menegur-E. ³³ Namun, dang menoleh nye menengon murid-murid-E, Isa menegur Petrus nye bercerak,"Beluhleh ari-Ku, He Iblis!Sebeb kam gere memikiren perkere-perkere Allah, tetape perkere-perkere manusie." ³⁴ Ngemari oya, Isa menalu jema delle, nye murid-murid-E, nye bercerak ken pakea ,"Ike sejema male menunung Aku, we turah menyangkal diri'e keniri, nye menemen salib'e, lalu menunung Aku. ³⁵ Sebeb, sahen peh si mera menyelemeten nyewe'e male kemosopen'e. Nye tetape, sahen peh si kemosopen nyewe'e demi Aku nye Injil male menyelemeten'e. ³⁶ Sebeb, hana untunge jema mendepeten mehne dunie, tetape kemosopen nyewe'e ? ³⁷ Hana si depet jema osahen tuk menebus nyewe'e? ³⁸ Sebeb, sahen peh si kemel entap Aku nye firmen-Ku i generasi si gere setie nye berdosa ini, nye Anak Manusie peh male kemel menunung jema oya ketike We engeh was kemulien Apak-Eberurum urum malekat-malekat si kudus."