PASAL 9
Ulun sa pehe tekei lahir na samare
1
Katika Yesus rahat takia,aye nginni ulun sa pehe tekei lahir e.
2
Murid-murid Yesus nane nihi Aye,"Guru,hie kah sa badosa,ulun iti atawa ulun matueh e hampe nalahir pehe?"
3
Yesus nuing,"bakoi aye atawa ulun matueh e berdosa,tapi mat gawian-gawian Allah na santarang huang aye.
4
Takam harus ngagawi gawian-gawian Aye sa mangutus Kuki salawah andrau masih ka andrau;malem sagar hawi waktu bakoi naan erang kulun lei kiuh bagawi.
5
salawah Kuki masih ta dunia,Kuki lah tarang dunia,"
6
Udi ngeau sameh hio,Yesus nura gi tane balalu ngaur iwei e nihi tane,balalu ngusuk e ta mate ulun hio,
7
balalu ngeau nihi aye,"hulu,wui bo tenga nu ta kolam Siloam."Siloam artinya "na utus."Balalu,ulun hio tulak,mui tenga e,balalu aye waleng nihi katena.
8
Here tetangga nihi here sa samete e kakinni aye hio pehe ngeau,"bakoi lah ulun iti sa biasa e maharung nelang ngalako?"
9
Mehe tenga ngeau,"oi,aye hio pengemis hio."sa lain ngeau,"bakoi,aye ekat mirip nihi pengemis hio."tapi ulun sa huni e pehe hio ngeau,"kuki lah pengemis hio."
10
Balalu,ulun-ulun hio nane nihi aye,"kalawe hampe mate nu tau katena?"
11
Ulun hio nuing,"ulun sa bangaran Yesus hio ngaur tane nihi muhut e gi mate ku.udi hio,Aye ngeau gi kuki,`tulak gi Siloam palus wui bo tenga nu,balalu kuki kiuh nginni."
12
here ngeau nihi aye,"ta awe kah ulun hio?"aye nuing,"kuki bakoi karasa."
13
Udi hio,here nunda ulun sa hini e pehe hio napot ulun-ulun Farisi.
14
naan lei andrau katika Yesus ngaur tane balalu nguka mate ulun hio aye lah andrau Sabat.
15
Maka,ulun-ulun Farisi hindra lagi nane nihi ulun hio kalawe aye kiuh nginni.aye ngeau nihi here,"Aye ngaur tane balalu muhut e gi mate ku,balalu kuki mui tenga palus kuki kiuh nginni."
16
Gene hio,papire ulun Farisi hio ngeau,"ulun hio bakoi baasal tekei Allah gene Aye bakoi nuu andrau Sabat."sa lain ngeau,"tapi,kalaawe tau ulun sa badosa kiuh ngulah tanda ajaib sameh iti?"Balalu timul lah kalakat tangar helang here.
17
Jari,here waleng nane nihi ulun pehe hio,"inon pendapat nu hal Aye gena Aye haot nguka mate nu?"ulun hio ngajawab,"Aye erang kulun Nabi."
18
Ulun-ulun Yahudi hio tatap bakoi harap nihi aye,bahwa ulun hio huni e mula pehe tapi wayah ina kiuh nginni,hampe here nerau ulun matueh tekei ulun sa wayah ina kiuh nginni hio,
19
Balalu nane tekei here,"inonkah iti anak nu,kala awe aye wayah iti kiuh kakanni?"
20
Ulun matueh e nuing here balalu ngeau,"kami karasa bahwa anak kami mula bujur pehe tekei lahir e,
21
Tapi kala awe wayah ina aye kiuh nginni,kami bakoi karasa;atwa hie sa haot nguka mate e,kami bakoi karasa.tane bo nihi aye,aye haot dewasa;aye sagar bapander gi tenga e kakareb."
22
Ulun matueh e ngeau sameh hio gene takut nihi ulun-ulun Yahudi.gene,ulun-ulun Yahudi hio haot mapakat,bahwa tiap ulun sa mangaku Yesus aye hio Kristus,sagar na kucilkan tekei Sinagoge.
23
Hio lah gene e ulun matueh e ngeau,"aye haot dewasa,tane bo nihi aye."
24
Jari,gi karueh kali e ulun-ulun Yahudi nerau ulun sa huni e pehe hio,balalu ngeau nihi aye,"ami bo kemuliaan gi Allah,kami karasa bahwa ulun iti berdosa."
25
Aye nuing,"inonkah ulun hio berdosa atawa bakoi,kuki bakoi karasa;isa hal sa rasa ku,samete e kuki pehe wayah iti kuki kakinni."
26
Here ngeau nihi aye,"inon sa na ulah enihi kayo?kala awe aye nguka mate nu?
27
Aye nuing here,"kuki haot ngeau nihi kayo,tapi kayo bakoi kakan ngarengei e lagi?inon kah kayo kakan jari murid E lei?"
28
Maka,here menghina aye balalu ngeau,"kayo lah murid ulun hio,tapi kami murid-murid Musa.
29
Kami karasa bahwa Allah haot bapander nihi Musa,tapi gene ulun hio,kami bakoi karasa tekei awe Aye baasal!"
30
Ulun hio nuing balalu ngeau nihi here,"bujur aneh bahwa kayo bakoi karasa tekei awe Aye baasal,padahal Aye haot nguka mate ku.
31
Takam karasa bahwa Allah bakoi ngarengei ulun berdosa,tapi hie lei sa takut nihi Allah balalu ngagawai aheng E,Allah ngarengei Aye.
32
Tekei sadi hampe wayah ina,mete piji na rengei bahwa erang kulun nguka mate ulun sa pehe tekei lahir.
33
Amun ulun hio bakoi baasal tekei Allah,Aye bakoi kiuh ngulah inon-inon."
34
ulun-ulun Yahudi hio nuing balalu ngeau nihi aye,"kayo lahir penu nihi dosa,balalu kayo kakan manggurui kami?"balalu here nulak ulun hio.
35
Yesus karengei bahwa ulun-ulun Yahudi haot ngusir ulun pehe hio;katika Yesus panalu nihi aye,Yesus ngeau,"inon kah kayo harap nihi Anak Murunsia?"
36
Ulun hio nuing,"hie kah Aye hio,Tuhan,mat kuki harap nihi Aye?"
37
Yesus ngeau nihi Aye,"kayo haot kakinni Aye.Aye hio sa rahat bapander nihi kayo."
38
Ulun hio nuing,"Tuhan,kuki harap!"udi hio,aye sujud ta hadapan E.
39
Yesus ngeau,"mat gi penghakiman Kuki hawi gi dunia iti mat here sa bakoi kiuh nginni,kiuh nginni balalu here sa nginni,jari pehe."
40
papire ulun Farisi sa naan riet E ngarengei hal hio,balalu ngeau nihi Aye,"inonkah kami pehe lei?"
41
Yesus ngeau nihi here,"amun kayo pehe,kayo bakoi berdosa;tapi gene kayo ngeau,`kami kakinni,`dosa nu tatap naan."