Panguta mat gi labih tekei dime ribu ulun ¹ Udi hio,Yesus nyabarang danau Galilea,aye hio danau Tiberias. ² Ajoh ulun nutah Aye gene here nginni tanda-tanda ajaib sa na ulah E nadap ulun-ulun maringin. ³ Udi hio,Yesus mambai gi entu bukit balalu maharung ta aro hayak murid-murid E. ⁴ Wayah hio,perayaan Paskah ulun Yahudi haot riet. ⁵ nelang nginni gi kaliling E balalu nginni ulun ajoh hawi napot Aye,Yesus ngeau nihi Filipus," ta awe lah takam kiuh midi roti mat ulun-ulun hio kiuh kuman?" ⁶ Yesus ngeau hal hio mat nguji Filifus gene sabujur e Aye kakareb karasa inon sa sagar na ulah E. ⁷ Filipus nuing,"Roti sa uman 200 dinar bakoi sagar sukup mat gi here,biar lei erang kulun ekat halu erang katetek halus bo." ⁸ Isa tekei murid E,aye hio Andreas,pulaksanai Simon Petrus,ngeau nihi Yesus, ⁹ "Ta iti naan erang kulun nakia sa ampun dime roti jelai nihi 2 kikui kenah,tapi inon arti e hio mat gi ulun sa ajoh iti?" ¹⁰ Yesus ngeau,"huyu bo kaluhan ulun mat maharung."tangar hio ajoh rikut,jari ulun-ulun hio maharung kira-kira dime ribu laki jumlah e. ¹¹ Udi hio,Yesus ngalap roti-roti hio balalu udi ngucap syukur,Aye membagi roti-roti hio gi here sa maharung;sameh hio lei na ulah E nadap kenah-kenah hio sa ajoh kana aheng here. ¹² Katika kaluhan ulun haot kuman hampe wising,Yesus ngeau nihi murid-murid E,"na kumpul bo tetekan-tetekan sa batisai mat bakoi naan sa na umpe." ¹³ Gene hio,here murid ngumpul e balalu ngisi 12 panuk nihi tetekan-tetekan tekei dime roti jelai sa na tanan here udi kuman. ¹⁴ Katika ulun-ulun hio ngini tanda ajaib sa ulah Yesus,here ngeau,"Aye iti pasti Nabi sa najanjikan sagar hawi gi dunia." ¹⁵ Gene karasa bahwa ulun ajoh hio barencana hawi balalu mamaksa Aye jari Raja here,Yesus mahulu lagi gi bukit kakareb."Yesus takia ta entu ranu ¹⁶ Katika andrau mulai kamalem,here murid minau napot danau ¹⁷ balalu udi mamai gi jukung,here mulai nyabarang danau napot Kapernaum.Andrau mulai kamalem,tapi Yesus mete lei hawi nalu here. ¹⁸ Danau mulai ba galombang gene angin sa mehet tuu . ¹⁹ Udi hio,katika here haot mawehei jukung sa lawit 25 atawa 30 stadia,here nginni Yesus takia ta entu danau balalu takia nyanrite jukung hampe here takut tuu. ²⁰ Tapi,Yesus ngeau nihi here,"iti Kuki,ada takut!" ²¹ udi hio,here kakan nampamai Aye gi huang jukung balalu tiba-tiba jukung hio haot hampe gi uneng sa na tuju here. "Ulun ajoh ngalupui Yesus ²² Mat gi katuni andrau e,ulun ajoh sa masih mindri tangar sabarang danau nginni bahwa naan jukung lain ta hio,kecuali isa jukung bo sa murid-murid haot suluk gi huang e.Tapi,Yesus bakoi umma suluk gi huang jukung hio hayak nihi murid E sa haot tulak kakareb. ²³ Hawilah jukung-jukung lain tekei Tiberias gi rieet uneng ulun-ulun hio kuman roti,udi Tuhan Yesus mengucap syukur. ²⁴ Katika ulun ajoh ngini bahwa Yesus nihi here murid E bakoi naan lagi ta hio,here mamai gi jukung-jukung hio balalu tulak gi Kapernaum mat nupui Yesus.Yesus aye hio roti welum ²⁵ Waktu ulun ajoh hio kahalu Yesus ta sabarang danau,here nane nihi Aye,"Rabi,wayah awe Kayo hampe gi ina?" ²⁶ Yesus nuing here balalu ngeau,"sabujur e,Kuki mawara nihi kayo,kayo nupui Kuki bakoi gene kayo haot nginni tanda-tanda ajaib,gene kayo haot nguta roti hampe wising. ²⁷ ada bagawi gene nupui nakuta sa sagar galis,tapi mat gi nakuta sa kiuh batahan hampe welum sa kekal,sa sagar naami Anak murunsia gi kayo gene Anak murunsia hio,Ammah,aye hio Allah,haot ngami pengesahan E." ²⁸ Balalu,ulun ajoh hio nane nihi Yesus,"inon sa harus na ulah kami mat kami ngulah gawian sa na aheng Allah?" ²⁹ Yesus nuing balalu ngeau gi here,"iti lah gawian sa na aheng Allah:harap bo nihi Aye sa haot na utus Allah." ³⁰ Here nane nihi Aye,"amun sameh hio,tanda ajaib inon kah sa sagar na ulah Kayo mat kami nginni balalu harap nihi Kayo?gawian inon sa naulah Kayo? ³¹ Itak uyut kami nguta manna tangar haket,sameh sa tatulis,`Aye ngami here roti tekei Surga mat nakuta." <sup>32</sup> Yesus ngeau nihi here,"Sabujur e,Kuki mawara gi kayo,bakoi Musa sa ngami roti tekei Surga,tapi Ammah Ku lah sa ngami roti sa sejati tekei Surga. <sup>33</sup> Gene, roti tekei Allah aye hio Aye sa minau tekei Surga balalu ngami welum gi dunia." <sup>34</sup> Here ngeau nihi Aye,"Tuhan,ami bo gi kami roti hio tarus." <sup>35</sup> Eau Yesus nihi here,"Kuki lah roti welum;ulun sa hawi gi Kuki bakoi sagar kaluan lagi,balalu ulun sa harap gi Kuki bakoi sagar kalalah lagi. <sup>36</sup> Tapi,Kuki haot ngeau nihi kayo bahwa biar lei kayo haot kakinni Kuki,kayo bakoi harap. <sup>37</sup> kaluhan sa naami Ammah gi Kuki sagar hawi gi Kuki,balalu sa hawi gi Kuki bakoi sagar Kuki nulak e. <sup>38</sup> Gene,Kuki minau tekei Surga bakoi matngagawi aheng Ku kakareb,tapi aheng Aye sa mangutus Kuki. <sup>39</sup> Balalu,iti lah aheng Aye sa mangutus Kuki: mat kaluhan sa haot na ami E gi Kuki hio bakoi naan sa jawoh,tapi na tambuan Ku tangar akhir zaman. <sup>40</sup> Gene,iti lah aheng Ammah Ku,bahwa satiap ulun sa nginni Anak balalu harap nihi Aye sagar kahalu welum kekal,balalu Kuki sagar nambuan aye tangar akhir zaman." <sup>41</sup> Gene hio,papire ulun Yahudi mulai baramuham nihi Aye gene Aye ngeau,"Kuki lah roti sa minau tekei Surga hio." <sup>42</sup> here ngeau,"bakoi lah Aye iti Yesus,anak Yusuf,sa ammah nihi ine e na kataru takam?kalawe tau Aye kiuh ngeau,`Kuki haot minau tekei Surga?" ⁴³ Yesus nuing here balalu ngeau,"ada baramuham tangar helang kaon kakareb. ⁴⁴ bakoi erang kulun kiuh hawi napot Kuki,kecuali Ammah sa mangutus Kuki nyujut e,balalu Kuki sagar nambuan e tangar akhir zaman. ⁴⁵ naan ta tulis tangar kitab here Nabi:`Balalu,here kaluhan sagar na ajar ulah Allah.`satiap ulun sa haot karengei balalu balajar tekei Ammah sagar hawi napot Kuki. ⁴⁶ hal hio bakoi baarti naan ulun sa haot piji nginni Ammah,kecuali Aye sa hawi tekei Allah;Aye lah sa haot nginni Ammah. ⁴⁷ Kuki mawara nihi kayo,`sabujur e,setiap ulun sa harap kiuh welum kekal.` ⁴⁸ Kuki lah roti welum. ⁴⁹ Itak uyut nu haot nguta manna ta pulau haket,tapi here matei. ⁵⁰ Iti lah roti sa minau tekei Surga,mat tiap ulun sa kuman e balalu bakoi matei. ⁵¹ Kuki lah roti welum hio sa haot minau tekei Surga.amun ulun kuman roti iti,aye sagar welum salawah e;balalu roti sa sagar naami Ku mat gi pamelum dunia hio aye lah tenga Ku." ⁵² Ulun-ulun Yahudi mulai basoal isa nihi sa lain,here ngeau,"kalawe tau ulun iti ngami tenga E mat nakuta?" ⁵³ Yesus ngeau gi here,"Kuki mawara gi kayo,sabujur e amun kayo bakoi nguta tenga Anak Murunsia balalu ngoot ira E,kayo bakoi naan welum huang tenga nu. ⁵⁴ Setiap ulun sa kuman daging Ku balalu ngoot ira Ku naan welum kekal,balalu Kuki sagar nambuan aye ta akhir zaman. ⁵⁵ Gene,daging Ku aye lah panguta sa sejati balalu ira Ku ayelah pangoot sa sejati. ⁵⁶ Hie sa kuman daging Ku balalu ngoot ira Ku muneng ta huang Kuki palus Kuki ta huang aye. ⁵⁷ Sameh Ammah sa welum mengutus Kuki,balalu Kuki welum ulah gene Ammah,sameh hio lei aye sa kuman Kuki,aye sagar welum gene Kuki. ⁵⁸ iti lah roti sa minau tekei Surga,bakoi roti sa sameh nakuta itak uyut nu balalu here matei,ulun sa nguta roti iti sagar welum salawah-lawah e." ⁵⁹ Yesus ngeau kaluhan e iti tangar Kapernaum waktu Aye ngajar ta Sinagoge."Ajoh sa uma Yesus nanan Aye ⁶⁰ Katika ajoh tekei murid-murid ngarengei hal iti,her ngeau,"ajaran iti bangat karas.hie sa sanggup narime e?" ⁶¹ Gene karasa bahwa sa uma Aye baramuham gene hal hio,Yesus ngeau nihi here,"inon kah paneran Ku iti ngulah kayo rere? ^{63 62} Amun sameh hio,kalawe amun kaon kakinni Anak Murunsia mambai waleng gi uneng asal E? Roh lah sa ngami welum,sedangkan daging bakoi baguna sama sekali.wusi paner sa na antuh Ku gi kayo aye hio Roh nihi welum. ⁶⁴ Tapi,naan papire kulun tekei kaon sa bakoi harap."Gene,tekei asal,Yesus karasa hie sa bakoi harap nihi hie sa sagar menghianati Aye. ⁶⁵ Yesus ngeau,"hio lah gene e Kuki mawara nihi kayo bahwa bakoi erang kulun lei kiuh hawi napot Kuki,kecuali hal hio na karuniakan gi aye ulah Ammah." ⁶⁶ Neneki waktu hio,ajoh sa uma Aye undur balalu tadoh nutah Aye. ⁶⁷ Gene hio,Yesus ngeau nihi ka dua belas murid E,"inon kah kayo lei kakan tulak?" ⁶⁸ Simon Petrus nuing Aye,"Tuhan,nutah hie kah kami sagar tulak?Kayo lah sa naan paneran pamelum kekal. ⁶⁹ kami haot harap balalu kataru nihi Kayo,bahwa Kayo lah sa Kudus tekei Allah." ⁷⁰ Yesus nuing here,"bakoi lah Kuki kakareb sa midi kayo,rueh belas ulun iti?biar sameh hio,isa kulun tekei kayo aye hio setan". ⁷¹ Sa na aheng aye lah Yudas,anak Simon Iskariot,gene Yudas aye lah isa tekei ka rueh belas murid hio,tapi aye sagar menghianati Yesus.