Yesus ngahibur murid-murid E ¹ " adalah atei nu gelisah;harap lah nihi Allah,haraplah lei nihi Kuki. ² Ta lewu Amah Kuki naan ajoh uneng muneng;amun bakoi sameh hio,Kuki pasti haot ngantuh e nihi kayo gene Kuki tulak mat nyadia isa uneng gi kayo. ³ Balalu,amun Kuki tulak balalu nyadia isa uneng gi kayo,Kuki sagar hawi waleng palus nunda kayo napot Kuki mat ta awe Kuki muneng,kayo lei muneng. ⁴ Balalu,kayo karasa lalan gi uneng Kuki tulak." ⁵ Balalu,Tomas ngeau nihi Aye,"Tuhan,kami bakoi karasa gi awe Kayo tulak,kalawe kami karasa lalan hio?" ⁶ Yesus ngeau nihi aye,"Kuki lah lalan,balalu sa wuah,balalu pamelum.bakoi naan erang kulun lei hawi napot Ambah,amun bakoi nangkah Kuki. ⁷ Amun kayo haot kataru Kuki,kayo lei haot kataru Ambah Ku;mulai wayah iti,kayo haot kataru palus ngini Aye." ⁸ Filipus ngeau nihi Aye,"Tuhan,tutilah Ambah gi kami,balalu hio haot sukup gi kami." ⁹ Yesus nuing Aye,"Filipus,haot kalawah iti Kuki hayak nihi kayo,balalu kayo masih mete kataru Kuki?hie ulun sa haot nginni Kuki,aye haot nginni Ambah,kalawe kayo tau ngeau,`tutui lah Ambah hio gi kami?` ¹⁰ Inonkah kayo bakoi harap bahwa Kuki ta huang Ambah balalu Ambah ta huang Kuki? paneran-paneran sa na eau Kuki gi kayo,Kuki bakoi ngeau tekei tenga Kuki kakareb,tapi Ambah sa muneng ta huang Kukilah sa ngagawi gawian E. ¹¹ Harap lah nihi Kuki,bahwa Kuki ta huang Ambah balalu Ambah ta huang Kuki;atawa paling bakoi,harap bo gene gawian-gawian hio kakareb. ¹² Nihi sabujur e,Kuki ngeau gi kayo,setiap ulun sa harap nihi Kuki,gawian-gawian sa na ulah Ku,aye lei sagar ngulah e;balalu gawian-gawian sa labih hante tekei kaluhan hio gene Kuki tulak nutah Ambah. ¹³ Inon lei sa nalako kayo huang aran Ku,hio sagar na ulah Kuki mat Ambah na muliakan ta huang Anak. ¹⁴ Amun kayo ngalako inon lei nihi Kuki huang aran Ku,Kuki sagar ngagawi e."Janji gene Roh Kudus ¹⁵ " Amun kayo sayang Kuki,kayo sagar nuu kaluhan perintah Ku. ¹⁶ Kuki sagar ngalako nihi Ambah,balalu Aye sagar ngami gi kayo pangawat sa lain,mat Aye pahayak kaon salawah e, ¹⁷ aye hio Roh sa wuah,sa bakoi kiuh na tarime dunia,gene dunia bakoi kakinni Aye atawa kataru Aye;tapi kayo kataru Aye gene Aye muneng hayak kayo nihi sagar naan huang kayo. ¹⁸ Kuki bakoi sagar nanan kayo sameh anule pahatu;Kuki sagar hawi napot kayo. ¹⁹ Bakoi lawah lagi,dunia bakoi sagar kakinni Kuki lagi,tapi kayo sagar kakini Kuki;gene Kuki welum,kayo lei sagar welum. ²⁰ Ta andrau hio,kayo sagar karasa bahwa Kuki ta huang Ambah Ku,balalu kayo ta huang Kuki,balalu Kuki ta huang kayo. ²¹ Hie lei sa negei perintah Ku balalu ngagawi e,aye sayang Kuki;balalu ulun sa sayang Kuki sagar na ahi ulah Ambah Ku,balalu Kukisagar sayang aye palus sagar nyantarang tenga Ku nihi aye." ²² Yudas sa bakoi Iskariot,ngeau nihi Aye,"Tuhan,kalawe kayo sagar nyantarang tenga Nu gi kami balalu bakoi gi dunia?" ²³ Yesus nuing balalu ngeau nihi aye,"amun erang kulun sayang Kuki,aye sagar nuu Firman Ku;balalu Ambah Ku ka ahi aye,balalu kami sagar hawi napot aye palus muneng pahayak aye. ²⁴ Tapi,ulun sa bakoi sayang Kuki,bakoi nuu Firman Ku.balalu,Firman sa na rengei kayo bakoi tekei Kuki,tapi tekei Ambah sa mangutus Kuki. ²⁵ Kaluhan hal iti haot na wara Ku gi kayo salawah Kuki masih hayak kayo. ²⁶ Tapi,pangawat hio,aye hio Roh Kudus,sa sagar na utus Ambah huang aran Ku,Aye sagar ngajar kaluhan hal gi kayo,balalu sagar nampa ingat kayo nihi kaluhan hal sa haot na wara Ku gi kayo. ²⁷ Damai sejahtra na tanan Ku hayak kayo;damai sejahtra Ku na ami Ku gi kayo,bakoi sameh nihi sa naami dunia sa naami Kuki gi kayo.Ada ngaret atei nu gelisah atawa lei takut. ²⁸ Kayo haot ngarengei bahwa Kuki ngeau gi kayo,`Kuki sagar tulak,balalu Kuki sagar hawi lagi napot kayo.`amun kayo sayang Kuki,kayo sagar sanang gene Kuki tulak napot Ambah,gene Ambah labih hante tekei Kuki. ²⁹ Kuki haot mawara wayah ina samete hal hio jari mat katika hal hio jari,kayo harap. ³⁰ Kuki bakoi sagar bapander labih ajoh lagi nihi kayo gene penguasa dunia iti rahat hawi.aye bakoi bakuasa dutik lei nihi Kuki. ³¹ Tapi mat dunia karasa bahwa Kuki sayang Ambah,Kuki ngulah pas sameh sa Ambah perintah gi Kuki. Buan bo,ayu takam tulak tekei iti."