¹ ementara i marapi-api roha ni si Saulus giot mangancam dohot mambunu murid-murid ni Tuhan. Harani i mangadop ma ia tu imam Besar, ² Jana mangido surat kuaso sian i, giot diboan ia tu majelis-majelis Yahudi na adong di Damsyik, anso, anggo dapot ia halaklahi sanga dadaboru na mangihutkon dalan ni Tuhan, ditangkup ia ma halahi jana di boan tu Yerusalem. ³ Di pardalananna tu Damsyik , hatiha donok ia tu kota i, tiba-tiba cahaya mamancar sian langit mangalilingi Ia. ⁴ Madabu ma Ia tu tano jana di bege ia ma sada suara na mandok tusia: “Saulus, Saulus, biasi langa di aniaya ho Au?” ⁵ Dialusi si Saulus: “Ise langa Ho, Tuhan?” Ning-Ia: “Au mada Yesus na di aniayami. ⁶ Tapi ngot ma ho jana kehe ma ho tu bagasan kota, disi dokkonon ma tu ho, aha na ingkon baenonmu.” ⁷ Jadi longang ma dongan-dongannia sapardalanan, harana halahi memang mambege suara i, tapi inda adong diligi halahi sada halak pe. ⁸ Ngot ma si Saulus jana jongjong, dungi dibuka ia ma matania, tapi inda bisa ia mangaligi sanga aha; angkon di togu halahi ma ia masuk tu Damsyik. ⁹ Tolu ari lolotna ia inda bisa mangaligi jana tolu ari lolotna ia inda mangan dohot minum. ¹⁰ Di Damsyik adong ma murid ni Tuhan na margoar si Ananias. Hata ni Tuhan tu sia dibagasan sada parnidaan: “Ananias!” Dialusi ia: “ on ma au Tuhan!” ¹¹ Didok Tuhan: “Keta, kehema tu dalan na margoar dalan lidang, jana jalaki ma di bagas ni si Yudas sada halak sian Tarsus na margoar si Saulus. Lagi mandoa do ia sannari, ¹² Jana di bagasan sada parnidaan ia mangaligi, bahaso na margoar si Ananias masuk tu bagasan jana mangampehon tanganna tu sia, anso bisa ia mangaligi muse.” ¹³ Di alusi si Ananias: “Tuhan, sian bahat halak madung hubege satongtang tu halak on, bahat nai hajahatan na di baennia maradopkon angka halak-Mu na ias di Yerusalem. ¹⁴ Jana ia ro tuson dohot kuaso na penuh sian imam-imam kapala giot manangkup sude na mamio goarMu.” ¹⁵ Tapi didok Tuhan ma tu sia: “ kehe ma ho, harana halak on ima alat pilian di Au, giot mambaritahon goar-Ku tu angka bangso na asing dohot raja-raja jana halak Israel. ¹⁶ Au sandiri patuduhon tu sia, songon dia bahatna parkancitan na ingkon di tanggung ia harani Goar-Ku.” ¹⁷ Dungi kehe ma si Ananias tu si, jana masuk tubagas i. di ampehon ia ma tangan nia tu si Saulus, ning ia ma: “Saulus, saudarongku, Tuhan Yesus na dung patidahon diri tu hamu di dalan na dilewati mu, madung manyuru au tu ho, anso bisa ho mangaligi muse jana digohi Roh Kudus.” ¹⁸ Di saat i juo songon na madabu ma selaput sian mata nia, sahingga bisa ia mangaligi muse. Ngot ma ia, dung i di baptis. ¹⁹ jana dung mangan ia, mulak ma gogo nia. Saulus tinggal piga-piga ari rap dohot murid-murid di Damsyik. ²⁰ Hatiha i juo di baritahon ia ma Yesus di bagas-bagas paribadatan, jana mandokkon bahaso Yesus ima anak Allah. ²¹ Sude mandok: “inda he langa ia on do na di Yerusalem na giot mambinasahon sanga ise na mamio goar ni Yesus on? Jana inda he langa ro ia tuson dohot maksud giot manangkup dohot mamboan halahi tu adopan ni imam-imam kapala?” ²² Tapi mur godang ma pengaruh ni si Paulus jana ia mambaen inda mangarti halak Yahudi na di Damsyik, harana ia mambuktihon, bahaso Yesus ima Mesias. ²³ Piga-piga ari na mangihut marpokat ma halak Yahudi mamusyawarahkon sada rencana giot mambunu si Saulus. ²⁴ Tapi maksud na jahat i di boto si Saulus. Arian borngin halak Yahudi mangawal sude pintu gerbang kota, anso bisa mambunu ia. ²⁵ Harupe songoni di sada borngin di buat murid-muridnia do ia jana di turunkon ia sian ginjang ni tembok kota dibagasan karanjang. ²⁶ Dung lalu di Yerusalem di coba si Saulus ma manggabungkon diri tu murid-murid, tapi sudena mabiar tu sia, harana halahi inda bisa porcaya, bahaso ia pe sada halak murid. ²⁷ Tapi Barnabas manarimo Ia jana mamboan ia tu rasul-rasul jana mancaritohon tu halahi, songon dia si Paulus mangaligi Tuhan di tonga dalan jana songon dia habaranion nia mangajar di Damsyik di bagasan goar ni Tuhan. ²⁸ Jana Saulus totop rap dohot halahi di Yerusalem, jana mardongan habaranion mangajar di bagasan Goar ni Tuhan. ²⁹ Mangkobari juo do ia jana marsoal jawab dohot angka halak Yahudi na marbahasa Yunani, tapi halahi marusaho mambunu ia. ³⁰ Tapi dung diboto saudaro-saudaro anggota jemaat purkaro i, di boan halahi ma ia tu Kaisarea jana sian i dibantu ia tu Tarsus. ³¹ Salama piga-piga waktu sude jemaat di Yudea, Galilea dohot Samaria di kuasoi dame . jemaat i di bangun jana mangolu dibagasan biar mangaligi Tuhan. Jumlahna mur martamba bahat marhite pertolongan dohot pangapulion ni Roh Kudus. ³² Dompak i si Petrus mardalan markaliling, mangadongkon kunjungan tu sude inganan. Dibagasan pardalanan i singgah juo tu halak na ias na di Lidia. ³³ Di si didapoti ia sada halak margoar si Eneas, na dung salapan taon payak di ginjang podoman harani lumpuh. ³⁴ Didok si Petrus ma tusia: “Eneas, ma di pamalum Yesus Kristus ho; ngotma ho dungi bereskon ma podomanmu!” santongkin i juo ngot ma halak i. ³⁵ Sude masyarakat ni Lida dohot Saron mangaligi ia, dungi marbalik ma halahi tu Tuhan. ³⁶ Di Yope adong sada murid dadaboru na margoar si Tabita-di bagasan bahasa Yunani Dorkas. Dadaboru i bahat sikatutu mambaen na denggan dohot mangalehen sidoka. ³⁷ Tapi hatiha i marun ma ia dungi maninggal. Jana dung di paridi, di payakkon ma mayatna di ruang atas. ³⁸ Lida donok do tu Yope. Dompak dibege murid, bahaso si Petrus adong di Lida, disuru halahi ma dua halak tu tusia dohot pangidoan: “Satibuna ma ro tu inganan nami.” ³⁹ Jadi marsiap-siap ma si Petrus jana marangkat rap dohot halahi. Dung lalu disi, di boan ma ia tu ruangan na di ginjang jana sude janda jongjong di donoknia, mardongan tangis dipatidahon halahi ma sude baju dohot pakean na di baen ni si Dorkas dompak mangolu dope ia. ⁴⁰ Tapi si Petrus manyuru halahi sude kaluar, dungi marsinggang jana mandoa.Dungi mangadop ma ia tu mayat i jana mandok: “Tabita, ngotma ho!”dungi di buka si Tabita ma matania jana dompak di ida ia si Petrus, ngot ma ia dungi juguk. ⁴¹ Di tiop si Petrus ma tangan nia jana di bantu ma ia jongjong. Dungi dipio ia ma halak na ias rap dohot janda-janda, dungi patuduhon tu halahi, bahaso dadaboru i mangolu. ⁴² Kajadian i tarbarita di luat Yope jana bahat halak manjadi porcaya tu Tuhan. ⁴³ Dungi tinggalma si Petrus piga-piga ari di Yope, di bagas ni sada halak na margoar si Simon, sada halak pangarajin kulit.