¹ Enggo kessa sidung ari sabat, Maria Magdalena, Maria ni si Jakkobus, dekket salome laus menokor minak, lako kiminaki bangke ni Jesus. ² Terang kessa ari, ari perjolo sidung kessa ari Sabbat i, laus mo kalak i mi tanemmen i mbincar kessa mata ni ari. ³ Mersidok katana be mo kalak i; ise ngo nahan menggulang batu i babah tanemmen i nai? ⁴ Itatap mo deppak i, idah mo enggo igulang batu i, ai mbelgah kian ngo. ⁵ Masuk kalak i mi bekkas tanemmen i, idah mo sakalak doli-doli, meroles si merlinang-linang kundul ketan kamuhen, gabe mbiar mo kalak i. ⁶ Idokkon mo mi kalak i, "unang kene tersengget, Jesus kalak Nazareth si enggo isilangken, enggo ngo Ia keke, Ia oda lot isen. Tengen mo bekkas na galei! ⁷ Alai laus mo kene, bagahken kene mo misiseanNa dekket si Petrus; ai enggo ngo ijoloi kene mi Galilea, isi mo idahen ndene Ia, bagi sinidokkon nai i kin! ⁸ Laus mo kalak i i tanemmen ni nai, merdengan mbiar dekket tersengget. Oda lot ipaboa-boa kalak i manang mi ise pe, ai mbiar ngo roka ni kalak i. [Ai kerina si enggo idokken i kennah bagahenken mi si Petrus dekket denganna. Jesus ngo si suruh kalak i i Timur nai soh mi Barat, lako mengkataken berita si badia dekket si oda boi kerri terenget keluahen si dekkah-dekkah na. Amen.] ⁹ I tikki Jesus keke i ari perjolo i bagasen minggu i, ipeteridahken Jesus mo diriNa mi si Maria Magdalena. Bana nai ngo ipelaus Jesus pitu tendi si jahat. ¹⁰ Gabe laus mo ia paboaken mi akka si mendengani Ia na jolo, akka namarsak dekket natangis. ¹¹ Tikki ibege kalak i Jesus enggo keke dekket enggo idah kalak i, gabe oda kalak i porsea. ¹² Enggo kessa i ipeteridahken Jesus mo diriNa mi dua kalak siseanNa, merupaken rupa sinasing, laus merkuta sada. ¹³ Gabe dekket ngo kalak i roh memberitakensa mi akka dengan nai, kalak i pe, oda geut porsea. ¹⁴ Tikki kundul kalak i mangan, ipeteridahken mo diriNa mi si sipulusada kalak i, ipincang mo ganggu ni roka ni kalak i, ala oda geut porsea mi kalak si enggo mernidah Ia keke i kematen nai. ¹⁵ Jadi idok Jesus mo mi kalak i; laus mo kene mi karina portibi en; jamitaken kene mo berita si mende mi kerina nasa na tineppa. ¹⁶ Kalak si porsea dekket si terdidi, dapetten keluahen, alai kalak si oda porsea, kena hukum ngo! ¹⁷ En mo tanda mi kalak si mengekutken kalak si porsea; pelausenna ngo akka sibolis merkiteken gerarKu dekket mengkataken kata si rimbaru. ¹⁸ I cekep kalak i mo, akka ulok, dekket inum kalak i pe racun kematen, alai oda kaden kalak i; iampeken kalak i mo tangan na mi simersakit, gabe njuah mo. ¹⁹ Asa enggo kessa sidung mengeranai Jesus mi sisean nai, laus mo Ia mi surgo lako kundul mi kamuhen ni Debata. ²⁰ Alai laus ngo kalak i menjamitaken berita si mende mi kerina luat, iurupi Tuhan i ngo kalak i, ipehot ngo jamita kalak i merkite akka tanda-tanda kelengangen.