¹ Enggo kessa terang ari pimpinan imam membakin sada pearapoten tua-tua kuta, sibettoh patik dekket karina samhedrin dekket Jesus ieketi kalak i dekket ipesoh bai Pilatus. ² Ikuso Pilatus mo Jesus, ko ngo raja kalak Jahudi? ialusi Jesus mo; kene ngo mendokkon. ³ Sidung i kerina imam menuduh dekket mengkusoi Jesus. ⁴ Dekket Pilatus mengkusoi Jesus, oda boi ialusi kono? enggo mbue kuso-kuso ni kalak i lako meraloken Kono. ⁵ Alai tong ngo oda ialusi Jesus, gabe lengang ngo si Pilatus. ⁶ Tikki hari raya paskah, Pilatus peluahken, sakalak jelma sinikurungen pengidon kalak i. ⁷ Lot sakalak mergerar Barabas ikurungi rebakken kalak simembunuh jelma. ⁸ Jelma mbue i roh mengido mi si Pilatus asa iulaken katerra biasana lako peluahken sakalak jelma si kurungen mi kalak i. ⁹ Gabe roh si Latus mengalusi kalak i, lemmo ngo ate ndene kupeluah bai nde Raja ni Jahudi en? ¹⁰ Ai i bettoh si Latus sian late ni roka ngo malim i dekket kalak Jahudi pesohken Jesus. ¹¹ Alai igittali malim ingo jelma mbue i, asa si Barabas ipeluah mi kalak i. ¹² Jadi idok si Latus mo mengalusi kalak i; attong kade ngo ipengido roka nde bakinenku mi Raja kalak Jahudi en? ¹³ Mersuraki mo kalak i, persilangken mo Ia! ¹⁴ Idok si Latus mo mi kalak i; ai kade ngo lot jahat iulaken? alai mersuraki mo jelma mbue i mengidoken; persilangken mo Ia. ¹⁵ Lako membuat roka ni jelma mbue i si Latus gabe ipeluah mo si Barabas; alai ipesoh mo Jesus asa ipersilangken, enggo kessa ilasaki. ¹⁶ Jadi itogiken akka soldadu i mo Ia mi emper paruhuman i, janah isi ngo iarahken karina jelma sahorong i. ¹⁷ Isellukken kala i mo mi Jesus baju jubah, i dandani mo dori lako membaen tuppal na. ¹⁸ Karina kalak i menghormat Ia janah idok; sittabi mo baMu, Raja ni kalak Jahudi! ¹⁹ Ipasakken kalak i mo tolong i mi takal Na, i ceduri mo Ia, dekket i pekulah kalak i lako mersembah baNa. ²⁰ Enngo kessa ileai kalak i Ia, itanggali mo baju jubah idagingna nai, isellukken mo bana abitna kin. I teggu mo Ia mi ruar, lako memajalken. ²¹ Memelus mo isi sakalak mulak i tahuma na nai, si Simon gerarna i luat kirene nai, bapa ni si Aleksander dekket si Rupus; ingo idokken kalak i lako memersan kayu silang sipersanen Jesus i kin. ²² Iembah kalak i mo Jesus mi Golgata (lapatenna: pertakkuraken). ²³ Ilean kalak i mo baNa anggur mersaor mir, ai oda ijalo. ²⁴ Ipersilangken kalak i ngo Ia, ibagi dekket olisna; tendung ngo ibakin lako membagiken. ²⁵ Jam sibah ngo ipersilangken kalak i Jesus. ²⁶ Dekket isuratken kalak i ngo i silang nai surat salahNa; Raja ni Jahudi! ²⁷ Rebbakken Ia ipersilangken kalak i ngo dua kalak penamun, sada i kamuhenNa, sada i kambirangNa. ²⁸ Dapetmo sinidok i surat i: teretong ngo Ia mi kalak perjahat. ²⁹ Jadi irehei kalak si lumaus i mo Ia, mengopir kalak i dekket idokken; Kono! simencedaken bagas joro ni Debata dekket peliaseken i bagasen tellu ari. ³⁰ Peluah mo diriMu janah susur mo Ko i kayu silang Mi nai. ³¹ Bagi ma ngo pengerehen sittua ni malim dekket si bettoh surat idokken be mo, sinasing boi ipeluah, ia diriNa oda terpluahsa. ³² Ko, Kristus, Raja ni Israel! susur mo ko attong i kayu silang mi nai, asa kuidah dekket porsea kami. Kalang sinisilangken rebbak Jesus, mengekut ngo mengerehe Ia. ³³ Dapet kessa jam sippuludua gellap mo kerina liat tanoh en soh mi jam tellu. ³⁴ Dapet kessa jam tellu, mersora mo Jesus mendok; ale Debataku, Debataku, kasa itadingken Aku (Eloi, Eloi, lama sabakhtani)! ³⁵ Jadi lot deba cender i lambungNa membegeken, gabe idok mo; si Elia ngo sidiloi nai! ³⁶ Melojang mo sakalak kisernemken lumut mi acem, ilekketken mi tolong, ilean mo mi Jesus asa i inum, idok mo; ta idah mo manang na roh ngo si Elia lako pesusurken Ia. ³⁷ Jadi mersurak mo Jesus, laus mo kesahNa. ³⁸ Gabe meribak dua mo kire-kire i bagas joro i, i babo nai soh mi terruh. ³⁹ Enngo kessa idah letnan i Ia, bagi keppe permateNa, gabe idok mo; tuhu ngo keppe kalak en anak ni Debata! ⁴⁰ Menatap-natap ngo deba daberru i sindaoh nai, si Maria Magdalena, si Maria ni si Jakkobus dekket Joses, dekket si Salome. ⁴¹ Iekutken kalak i ngo Ia lako mengkebbasi i tikki i Galilea deng Ia; mbue deng ngo daberru si nasing lako mengekutken Jesus mi Jerusalem. ⁴² Enggo kessa bonari, i ari perkebbasen i, oda deng dapet ari sabat, ⁴³ Roh mo si Josep i arimatea nai, namasuk mi horong malim, salak si mersangap si terpema-pema mi kerajan ni Debata; roh mendahi si Latus, lako mengido bangke ni Jesus. ⁴⁴ tersengget mo si Latus membege Jesus enggo mate, idiloi sada letnan, ikusoi mo ia manang na enggo dekkah mate. ⁴⁵ Enggo kessa ibettoh si Latus i letnan i nai, enggo mate Jesus, ilean mo bangke i mi Josep. ⁴⁶ Itokor si Josep mo kain linen i pesusur mo Ia, ibaluti mo, icibalken mo bangke i mi sada tanemmen i liang batu; igulang mo sada batu mi babah pentu tanemmen i. ⁴⁷ Itengen si Maria Magdalena ngo dekket si Maria ni si Joseb, manag idike Ia icibalken.