¹ Enggo kessa itadingken Jesus joro i, sakalak siseanna mendok mi Jesus; Guru tengen mo bagakna batu i dekket mende na kerina sapo en! ² Alai nina Jesus mo bana; idah ko ngo sapo si mbelgah en? oda ngo bellin dua batu mertindih-tindih karina ngo i kennah irumpakken. ³ Tikki kundul Jesus i delleng, i lambung bagas joro ikusoken si Petrus, Jakobus, Johannes, dekket Andreas ngo Ia; ⁴ Paboa mo bi nami, dahari go masa i janah kade ngo tanda na, paboa enggo senggep karinana i? ⁵ ikataken Jesus mo mi sesean i; jaga mo kene, unang ilalingken kalak kene! ⁶ Ai mbue ngo kalak roh seggen menellukk gerarKu! gabe mbue laling bakinenna. ⁷ molo ibege kene berita ni permusuhen dekket guttur ni kalak merperang unang kene tersengget! oda terbaen so masa karina i, alai oda deng ngo i ujungna! ⁸ Alai keke mo seggen bangso meraloken bangso, Raja meraloken Raja, masa mo dekket renur merluat-luat; dekket kelehen potir. Permulan ni Pembeben na ngo i. ⁹ Alai jaga kene mo diri ndene, ai pesohenna ngo kene i loloan mbellen dekket mi jolo ni rapot, litcingenna ngo kene dekket ipecender i jolo ni akka penguhum, dekket akka raja ala ni Aku, lako sitindangi mi kalak i. ¹⁰ Alai kennah perjolo ngo beritanken berita si mende mi ganup bangso. ¹¹ Enggo kessa iembah kalak i kene lako pesohken kene, unang ke rusak i kata naing sidokkonen ndene! manang kade ilean bai ndene, sangombas i, imo kataken kene; ai oda ngo ke si mengerana i lai tendi ngo. ¹² Alai pesohen ni si kakan ngo anggina, lako mi kematen, bagi ma bapa na mi dukakna, dekket keke ma ngo anak na mi pertuana lako membunuhsa. ¹³ Gabe ceggo ngo ate ndeba bai nde ne ala ni gerarKu. Kalak si geut menahanken soh mi ujungna ingo peluahenna. ¹⁴ Alai molo idah kene kinigaor ni simada hukum cender i mada bekkasna (iperokaken si menjaka en mo i), isi mo laus kerina kalak si lot i Judea mi delleng! ¹⁵ kalak sini babo tarum sap unang susur manang masuk mi bagasen sapo lako membuat manang kade pe i sapo i nai. ¹⁶ Si ni tahuma, unang mo pella kumoser lako membuat olisna. ¹⁷ Merjea mo kalak si mende daging na dekket si pesusuken dukakna i tikki i ! ¹⁸ Alai mertangiang mo kene asa unang masa i tikki i mbergoh ari! ¹⁹ Alai masa ngo i akka ari i kepersuken, si oda deng nung masa mulai i peneppan ni Debata mi karina siniteppana soh mi bagendari, mi jolo en pe oda ne ngo masa i. ²⁰ Jadi molo oda iorui Tuhan i akka ari i, oda ngo tagamen meluah nanggo sada jelma; alai ala ni kalak sinipilih nai ngo membaen iorui. ²¹ Molo idokken bai ndene; tengngen mo isi, i sade ngo Kristus i, unang porsea kene. ²² Ai keke mo akka Kristus pergap-gap dekket penurirang pergap-gap, petupaken tanda dekket kelengangen, lako mengelalingken si enggo terpilih, molo terbainsa. ²³ Jaga mo kene! enggo kin ngo kulumbaken bai nde karina! ²⁴ Alai i akka ari i, sidung kessa kepersuken i, gellap mo mata ni ari dekket bulan i pe oda ne mersinendang. ²⁵ Merdabuhen mo bintang i langit nai, janah si merkuasa i langit i pe mengkutur karina portibi en. ²⁶ Jadi idah kalak mo anak ni jelma I roh merdengan embun, dekket gegoh, dekket kesangapen. ²⁷ Janah isuruh mo i surgo nai lako pepulungken sinipilih nai i luat dike nai pe, karina soki ni tanoh en dekket karina soki ni langit. ²⁸ Alai merguru mo kene mi perumpaman mi kayu wara i, enggo kessa mertunas pucukna, roh bulungna, bettohen ndene mo enggo jolmit tikki gara ni ari. ²⁹ Bagi ma ngo, enggo kessa i idah kene masa si bagidi i, bettohen ndene mo enggo jolmit Ia i jolo pentu. ³⁰ Tuhuna ngo sikudokken en bai ndene, oda boi kerri jelma en, molo oda deng senggep kerina i. ³¹ Sidung pe karina langit dekket tanoh en, alai kata ni Tuhan oda geut sidung. ³² Ai molo arina dekket tikkina, oda lot ise bettohen i dekket suruh-suruhen sini surgo dekket anak ni jelma I pe oda ngo ibettoh, pellin Debata ngo bittohen i. ³³ Perokaken mo, merjaga-jaga mo kene. Alana oda ngo ibettoh kene dahari Aku roh. ³⁴ Karina i, pas ma ngo bagi kalak laus mi perdalanen. itadingken mo sapona, ibereken ngo kuasa mi kerina si mengula i sapo na, dekket si jaga sapo asa tong menjaga i jolo pentu. ³⁵ Ala ni, merjaga-jaga mo kene, alana oda ibettoh kene dahari roh sidasa sapo i, manang cibon, manag tengah berngin, manang takuak manuk, manang kusiang. ³⁶ Unang sanga roh ia tumempu, i dapet kene meddem. ³⁷ Kerina sikudokken en bamu, kudokken ma ngo mi kerina kalak; merjaga-jaga mo.